Mbamba foé Marc a nga tili

6 Ane a nga kôlô valé, a ke ngoto jé, beyé’é bé be mbe nsamba a nye. 2 Éyoñe Sabbat a nga kui, ane a nga taté na a ye’ele synagogue, a abui bôt é mbe é vô’ôlô nye é mbe fe’e ne vema é nga sili na: “Nne a nga yé’é mame ma vé? Za a nga ve nye abime fe’e di a ngule ya bo mesimba a bo ma? 3 Nyina a ne kafinda, mone Marie, monyañe Jacques, Joseph, Judas a Simon, sa nalé? A bekale bé, be ne va a bia, sa nalé?” Nde be nga bene buni nye. 4 Ve Yésus a nga yalane be na: “Bôte be ne teke semé nkulu mejô ngoto jé, zañe bivuvumane bié a nda jé.” 5 A nji kui na, a bo abui mesimba wôé, ane ô vaa na a nga beté bone minkôkone mi be valé mo nyul a saé be. 6 Ane a nga semé, amu njembane mbunane wop. A a nga ke minlame mia bômane be na a ke kañete.

7 A nga loone minlômane mié Awôm a mibaé a taté na a lôme mie mibaé mibaé, a nga ve fe mie ngule ya vaa mbia minsisim. 8 Nde fe a nga ve be abendé na be bo te nyoñe jôm éziñ asu dulu fo’o ve ntum, teke belet, ékpwaé bidi, nge ke atiñe moné mengeteñ. 9 A nga jô be na, be ne jaé besilefase minkol, ve teke nyoñe biyé bibaé.* 10 A nga beta be jô na: “Vôm ase ba ye kañese mia na mi nyiine nda éziñ, taba’ané valé akekui mia ye kôlô vôm ate.” 11 A vôm ase ba ye bo te nyoñe mia, nge vô’ôlô mia, kôla’ané valé, ve ôsusua na mia kôlô, sasa’ané mbuluk ô ne mia mebo, mfa’a ya liti* na be wô’ôya foé. 12 Ane be nga téé a ke ba kañete bôte na ba yiane kôñelane minlem. 13 Ane be nga vaa abui mbia minsisim, a wo’o abui minkôkone mbon, ane mi nga bo mvo’é.

14 Njô bôte Hérode a nga wô’ô jam éte, amu foé é mbe é fombô’ô Yésus é nga mane mialan, ane bôte be nga taté na ba jô na: “Jean Baptiste a wômôya miñwuan, jôme te nje a bo mesimba mese a bo ma.” 15 Bevo’o be mbe be jô’ô na: “A ne Élie.” Ba bevo’o ke be jô’ô na: “A ne nkulu mejô ane ba ya melu mvus.” 16 Ve éyoñe Hérode a nga wô’ô jam éte, a nga jô na: “Jean me nga tyi’i nlô, nnye le a wômôya.” 17 Amu Hérode émien a nga lôme bôte na, be ke bi Jean a ka’a nye ngata’a a fete nye mbôk, étome Hérodiade, minga monyañe wé Philippe, amu Hérode a nga lu’u nye. 18 Amu Jean a nga jô nye biyoñe biyoñe na: “Atiñ é nji kañese na, ô lu’u minga monyoñ.” 19 Nde Hérodiade a mbe a feme’e Jean a jeñe ke zene ya wôé nye, ve a nji bi fane ya wôé nye. 20 Ve amu Hérode a mbe a ko Jean woñ, a yeme’e na a ne môt a ne zôsô a étyi, nde a nga ke ôsu a ba’ale nye. Éyoñ ése a mbe a mane vô’ôlô nye, a nji be a yeme’e jam a ne bo, ve a nga ke ôsu a vô’ôlô nye a meva’a mese.

21 Ve Hérodiade a nga bi fane ya tôé nsôñane wé, éyoñe Hérode a nga bo abô’ô ya abialé dé, a bañete beta be bôte ya ngovina, bejôô bezimbi a beta be bôte ya Galilée. 22 Ane ngone Hérodiade é nga zu jem, Hérode a bôte bese be mbe be ja’a* a nye, be nga nye’e abôk éte, nde njô bôt a nga jô ngone minga na: “Sili’i ma jôm ése wo yi, ma ye ve wo je.” 23 Ane a nga kane nye ngana a jô’ô na: “Jôm ése wo sili ma, ma ye ve wo je, to’o ma kap éjôé jame zañ a ve wo éfase jia ya été. 24 Nde a nga kui nseñ a ke sili nyia na: “Jé ma yiane ke sili?” Ane nyia a nga yalane nye na: “Nlô Jean Baptiste.” 25 Été été, a nga ji’a beta ke yene njô bôt a jô nye na: “Va’a ma vôme me tele nyi, nlô Jean Baptiste éyaseyas ésua été.” 26 Akusa bo jam éte é nga taé nye nlem, njô bôt a nji be ve bene bo de, amu a nga kane ngana, a amu beyeñe* be mbe valé. 27 Nde, été été, njô bôt a nga lôme mone bezimbi a jô nye na a zuu nye nlô Jean. Nde a nga ke nda mimbôk, a ke tyi’i Jean nlô, 28 a soo nlô ôte éyaseyas ésua été. Ane a nga ke ve wô mona minga, mona minga ke a ke ve wô nyia wé. 29 Éyoñe beyé’é be Jean be nga wô’ô jam éte, ane be nga so a nyoñe mbime wé a ke jame nye.”

30 Minlômane mi nga zu koone Yésus a kate nye mame mese be nga bo, a ma be nga ye’ele. 31 A nga jô be na: “Za’ané bi ke vôme bi ne étam, mi tame wo’one mone jôm.” Amu be nji bi éyoñe ya di, bôte be mbe be so’o be kelek. 32 Ane be nga dañ éfunga a ke vôme be ne ve bebe. 33 Ve bôte be nga yen ane ba ke a abui é nga yeme de, ane bôte be nga so bitisone bise a ke mbile na, be ke yange be ôsu. 34 Éyoñe Yésus a nga sis éfunga, a nga yene beta nsamba bôt, ane a nga wô’ô be éngôngol, amu be mbe ane mintômba mi ne teke mba’ale, ane a nga taté na a ye’ele be abui mam.

35 Ve éyoñ alu é nga vin, beyé’é bé be nga zu koone nye a jô nye na: “Teke nlam éziñ ô ne bebé a vôme bi ne nyi, alu ki é nga vin. 36 Jô’ô be na, be ke vôme be ne koone bidi a ne bebé a valé, a minlame minlam, na bebiene be ke kuse jôme ya di.” 37 A nga yalane be na: “Miabebiene va’ané be jôme ya di.” Ane be nga jô nye na: “Ye bia yiane ke kuse belete tañe bedenier* 200, a zu ve bôte na be di?” 38 Nde a nga sili be na: “Mi bili belete tañ aya? Kelané fombô.” Éyoñe be maneya fombô, nde be nga yalane nye na: “Étan, a kos ébaé.” 39 Ane a nga jô bôte bese na be tabe si minsamba minsamba, bilo’o yôp. 40 Be nga tabe si minsamba minsamba, wuna bôte 100, wu ôvo’o bôte 50. 41 Ane a nga nyoñe belet étan a kos ébaé a bete mise yôp, a ye’elane Zambe. Mvuse ya valé a nga mane be’e belet a taté na, a ve je beyé’é na be kabe je bôt. A nga mane fe be’e kos ébaé asu bôte bese. 42 Nde bese be nga di a jaé, 43 bifuse bi nga bu’u be nga kôane bie a jalé bikat 12, teke lañe kos. 44 Abime bôt é nga di belet é mbe befame 5 000.

45 Été été, Yésus a nga jô beyé’é bé na be ke bet éfunga a ke yange nye abôñe mañe yat, mfa’a ya Bethsaïda nté émien a li’i a ya’ane nsamba bôt. 46 Ve éyoñ a nga mane suu be, nde a nga bete nkôle na a ke ye’elan. 47 Éyoñ alu é nga bo, éfunga é mbe zañe mañ été, ve Yésus a mbe étame nkôl. 48 Nde, éyoñ a nga yene na beyé’é bé ba kate kôme fulu éfunga, amu évuñulu é mbe é so’o be ôsu, a mbe bebé mewolo melale ya mame tyé, akekui mewolo mesamane ya mame tyé. Ane a nga wulu mendime yôp, a ke vôm éfunga é nga too, a nga bo ve ane a zu lôte be. 49 Ayene be nga yene nye a za’a a wulu mañe yôp, be nga sili na: “Jé ja zu jili?”* Ane be nga taté na ba yôtan. 50 Amu éyoñe bese be nga yene nye, be nga ko woñ. Ve été été, a nga jô be na: “Te mia ko woñ, taba’ané ne séé, ma le.” 51 Nde a nga ke koone be éfunga été, a évuñulu é nga tebe. Bese be nga kame jam éte beta nkaman, 52 amu be nji ke kôme wôk atinane ya jame Yésus a nga bo a belet, be mbe be ngenane be jeñe’e mezene ya wô’ô jam ése.

53 Éyoñe be dañeya mañ, ane be nga kui Génésareth a telé éfunga bebé valé. 54 Ve nné ane be nga sis éfunga, nde bôte be nga yeme nye. 55 Be nga ke mimbile ngoto ése, a be’e ba bese be mbe be konô’ôk biñone biap yôp, a kee be vôme be nga wô’ô na a ne. 56 Vôm ase a mbe a kelek, minlam, bitison a bone minlam, be mbe be za’a bôé minkôkone minseñe mi makit, a be nga ye’elane nye na a jô’é be be nambe fo’o ve meze’ele ya éyé jé ya yôp. A ba bese be nga nambe me be nga bo mvo’é.