Mbamba foé Matthieu a nga tili
1 Kalate éndane Yésus Krist,* mone David, mone Abraham:
2 Abraham a nga biaé Isaac;
Isaac a nga biaé Jacob;
Jacob a nga biaé Juda a bobenyañe bé;
3 Juda ba Tamar be nga biaé Pérez a Zéra;
Pérez a nga biaé Hèzrôn;
Hèzrôn a nga biaé Ram;
4 Ram a nga biaé Aminadab;
Aminadab a nga biaé Nashôn;
Nashôn a nga biaé Salmôn;
5 Salmôn ba Rahab be nga biaé Boaz;
Boaz ba Ruth be nga biaé Obed;
Obed a nga biaé Jessé;
6 Jessé a nga biaé David, njô bôt.
David ba minga Urie, be nga biaé Salomon;
7 Salomon a nga biaé Roboam;
Roboam a nga biaé Abia;
Abia a nga biaé Asa;
8 Asa a nga biaé Josaphat;
Josaphat a nga biaé Joram;
Joram a nga biaé Ozias;
9 Ozias a nga biaé Jotam;
Jotam a nga biaé Achaz;
Achaz a nga biaé Ézéchias;
10 Ézéchias a nga biaé Manassé;
Manassé a nga biaé Amon;
Amon a nga biaé Josias;
11 Josias a nga biaé Yekonia ba bobenyañe bé éyoñe bejuif be nga ke minkôm e Babylone.
12 Éyoñe bejuif be bulaneya minkôme ya Babylone, Yekonia a nga biaé Shéaltiel;
Shéaltiel a nga biaé Zorobabel;
13 Zorobabel a nga biaé Abioud;
Abioud a nga biaé Éliakim;
Éliakim a nga biaé Azor;
14 Azor a nga biaé Zadok;
Zadok a nga biaé Akim;
Akim a nga biaé Élioud;
15 Élioud a nga biaé Éléazar;
Éléazar a nga biaé Matân;
Matân a nga biaé Jacob;
16 Jacob a nga biaé Joseph nnôme Marie, nyia Yésus, nnye ba loone na Krist.
17 Ataté be Abraham akekui be David, miaé mi bôt 14 mi nga lôt; ataté be David akekui éyoñe bejuif be nga ke minkôm e Babylone, miaé mi bôt 14 mi nga lôt; ataté éyoñe bejuif be nga ke minkôm e Babylone akekui be Yésus, miaé mi bôt 14 mi nga lôt.
18 Avale di nde mame me nga boban éyoñe Yésus Krist a nga bialé. Éyoñ éte Marie nyia Yésus a mbe a mbili atiñ alu’u ba Joseph, ve ôsusua na ba lu’an, a nga nyoñ abum a ngule ya mfufube nsisim.* 19 Ve amu Joseph a mbe zôsôa môt, a nji kômbô wo’o nye ôsone nyul e bôt été, nde a nga tyi’i na, a zu tyam atiñ alu’u dap asoé. 20 Ve éyoñ a maneya fase nalé, nde Joseph a nga yeme biyeyem, éngele Yéhôva* a jô’ô nye na: “A Joseph, mone David, te ko woñe ya nyoñe minga wôé, Marie nda jôé, amu a te be’e abum éte a ngule ya mfufube nsisim. 21 A ye biaé mona fam, wo yiane yôlé nye na Yésus,* amu a ye kôté bôte bé mfa’a ya vaa be éjôé ya mam abé map si.” 22 Mame mete mese me nga boban amu na, jame Yéhôva* a nga jô a zene ya nkulu mejô wé é tôéban, a nga jô na: 23 “Tame yen! Éndune ngone ja ye nyoñ abum a biaé mona fam, ba ye yôlé nye na, Émmanuel,” éyoñe ba kôñelan, éyôlé éte ja tinane na, “Zambe a ne a bia.”
24 Ane Joseph a nga vee ôyo, nde a nga bo aval éngele Yéhôva* a nga jô nye na a bo; ane a nga nyoñe minga wé a futi nye nda si. 25 Ve a nji ke binoñ a nye akekui a nga biaé mona fam, nde a nga yôlé nye na Yésus.