Kalate ôsu Paul a nga tili Becorinthien

9 Ye me nji bo fili? Ye me nji bo nlôman? Ye me nji yene Yésus Tate wongan? Ye mi nji bo ésaé jame be Tate? 2 To’o me nji bo nlôman asu bôte béziñ, ve nya ajôô, me ne nlôman asu denan, amu mi ne sitame ja liti ésaé nlômane jame be Tate.

3 Jame me ne jô mfa’a ya bôte ba fase ma nde di: 4 Bi ne ngule ya* di a nyu, sa nalé? 5 Nga bia fe bi bili ôva’a ngule ya wulu a minga a buni,* aval ane minlômane mivok, bobenyañe* be Tate a Céphas?* 6 Nge ke na, ye bia Barnabas étame bi nji yiane saé na bi toñe biabebien? 7 Mone bezimbi mbé a ya’ane tañe ya ésaé a bo, nté a ngenane mone bezimbi? Za a bé afube mindik teke di bibuma ya été? Nge ke na, mba’ale mintômba mbé, a ba’ale mintômba a ne te nyu menyañe ya mbam?

8 Ye ma kobô mame mete fo’o ve ane môta binam? Ye Metiñe me Moïse fe, me nji kobô mame mete? 9 Amu é ne ntilane Metiñe me Moïse na: “Wo ye bo te tiñeti anyu nnôme nyak éyoñ a wulu mefese yôp a vaa bikô’ôla.” Ye beyôme benyak mbe Zambe a kamane be? 10 Nge na, ye sa ke asu dangane nde a nga jô mame mete? Ôwé, mame mete me ne ntilan asu dangan, amu môt a bé a nyu a se’ese mefes, bese bebaane ba yange ma’an.

11 Nge bi nga bé mame ya nsisime be mia, ye jam éte é ne adite nge bia kôane bone mimvolane ya minsône be mia? 12 Nge bôte befe be bili ngule ya* nyoñe mimvolane be mia, nga bia bia yiane dañe bi ngul éte? Ve jame da, bi nji beté ôdo’é asu ya na foé bia kañete mfa’a Krist é bo te bi jame da kolé de ôbak. 13 Ye mi nji yeme na ba ba bo bisaé bi ne étyi ba di biôme ya temple a na, ba ba saé autel ba di biôme ba ve autel yôp? 14 Avale te fe, Tate a ve atiñe na, bôte ba kañete mbamba foé be nyiñe fe a zene ya mbamba foé.

15 Ve ma me nji belane jame da ya mame mete mese. Nde fe me nji tili mame mete asu na mi ve ma jôm éziñ, amu, da dañe mvaé asu dame na me wu a lôte na . . . teke môt a ye vaa ma jame ma bo de éngelezek! 16 Nde ñhe, nge ma kañete mbamba foé, a nji bo jame ya bo de mebun, amu a ne jame ma yiane bo. E nya ajôô, éngôngol a ma nge ma bo te kañete mbamba foé! 17 Nge ma bo de a nkômbane wom, me bili ma’an, ve to’o me nji bo de a nkômbane wom, nalé a nji vaa na be nga ve ma ésaé ya bo. 18 Ma’ane mame me ne ñhe mevé? Me ne na, éyoñe ma kañete mbamba foé ma bo de teke tañ, ndembene me bo te beté ôdo’é mfa’a ya ngule* me bili asu mbamba foé.

19 Amu to’o me ne fili asu bôte bese, me nga bo mamien ôlo asu bôte bese, ndembene me ne volô abui bôte na é bo bekristen. 20 Asu bejuif me nga bo ane mone juif ndembene me ne volô bejuif na be bo bekristen; asu bôte be ne Metiñe me Moïse si, me nga bo môt a ne Metiñe me Moïse si a too ke na, mamiene me nji bo me si, ndembene me ne volô abui bôt é ne Metiñe me Moïse si na é bo bekristen. 21 Asu bôte be nji bo atiñe* si, me nga bo ane me nji bo atiñe si, a too ke na me nji bo metiñe si mfa’a ya Zambe, ve me ne metiñe si mfa’a ya Krist, ndembene me ne volô ba be nji bo atiñe si na be bo bekristen. 22 Asu ba be ne atek, me nga bo atek, ndembene me ne volô ba be ne atek. Me nga bo mame mese asu bôte mevale mese, ndemben a mezene mese me ne volô bevo’o béziñ. 23 Ve ma bo mame mese asu mbamba foé ndembene me ne kañete nye bôte bevok.

24 Ye mi nji yeme na mmatane mbil, bemate mbile bese ba mate, ve wua nnye a nyoñe ma’an? Mata’ané aval é ne na mi nyoñe ma’an. 25 Bôte bese ba ke bivôé* ba jôé bebiene mimfa’a mise. É ne fo’o été na, bôte bete ba bo de amu ba yi na be bi couronne ja ye ndaman, ve bia, bia bo de amu bia yi na bi bi couronne ja ye ke ndaman. 26 Ajô te, ma mate a ngume nsôñan; ma bibi bikuta, ve sa ke ñyem; 27 ve ma bibi nyule jame bikuta* a kee je ane ôlo, ndemben éyoñe me maneya kañete bôte bevok, mamiene me bo teke yené abé* mise me Zambe a zen éziñ.