Mame minlôman
11 Ane minlôman a bebuni be mbe Judée be nga wô’ô na bôte ya meyoñe be fe be kañeseya mejô me Zambe. 2 Nde éyoñe Pierre a nga bete Jérusalem, bôte be mbe be su’u ajô ntyi’an atyele be nga taté na ba komekane* nye 3 be jô’ô na: “Wo te nyiine nda bôte be ne teke ntyi’an atyel a di a be.” 4 Éyoñ éte Pierre a nga taté na a kate be jam ébien é nga boban a jô’ô na:
5 “Me mbe me ye’elane tisone ya Jopée, ane me nga ku avem a bi ñyenan, jôm* é too ane ndombo é sisik, é so’o yôp, é yanda’ane meku’u menyine ya si, é za’a vôme me mbe. 6 Éyoñe me nga tu’a bebe été wôé, me nga yene betite ya si be be’e mebo menyin, betite ya afan, ba ba vutan a abum a ba ba ya’é a anone ya yôp. 7 Me nga wô’ô fe éngele a jô’ô ma na: ‘Kôlô’ô si a Pierre, wôék ô di!’ 8 Ve me nga jô na: ‘Momo a Tate, amu nté ane me nga bialé, jôm é ne étyi nge mvit aval atiñe da jô, é ngenane te nyiin anyu dam.’ 9 Éyoñe baa éngele a nga jô ma na: ‘Te beta jô na biôme Zambe a maneya fubu bi ne mvit.’ 10 Jame di é nga bobane biyoñe bilal, éyoñ éte biôme bise bi nga beta mane betebane yôp. 11 Nde fe, éyoñ éte ébien, bôte belale be mbe be ntele nda bi mbe bi too, be nga lôme be be ma be so’o Césarée. 12 Nde mfufube nsisim a nga jô ma na me ke a be teke sôô, ve bobejañe besamane ba be nga ke fe a ma a bi nga nyiine nda môt ate.
13 “A nga kate bia aval a nga yen éngele a tele nda jé a jô’ô na: ‘Lôme’e bôte Jopée be ke loone Simon, nyu fe ba loone na Pierre, 14 a ye kate wo mame wo yiane bo a bôte ya nda jôé asu na mi bi ényiñ.’ 15 Ve éyoñe me nga taté na ma kobô, mfufube nsisim a nga vebane be be, fo’o ve aval a nga vebane be bia atata’a. 16 Ane me nga simesane mejô Tate a mbe a jô’ô na: ‘Jean a nga du bôte mendim été, ve mia, mia ye duban a mfufube nsisim.’ 17 Nde, nge Zambe a nga ve be avale mvean ô ne zezé a nga ve fe bia, bia bi nga buni Tate Yésus Krist, ma me mbe za na me kamane Zambe* na a bo jam a yene mvaé ya bo?”
18 Éyoñe be nga wô’ô mame mete, be nga telé nsañeta’ane* a be nga ve Zambe duma be jô’ô na: “Nde, Zambe a nga ve fe bôte ya meyoñe fane ya kôñelane minlem, ndembene be ne bi ényiñ.”
19 Ba be nga mane tyamelan amu étibila’a é nga taté mvus awu Étienne, be nga ke akekui Phénicie, e Chypre a Antioche, ve be mbe be kele’e ba kañete mbamba foé be bejuif. 20 Ve bôte béziñe ya Chypre a Cyrène be nga suan Antioche a be nga taté na ba kobô a bôte be mbe be kobô’ô Grec, be kate’e be mbamba foé ya Tate Yésus. 21 Nde fe, wo Yéhôva* ô mbe a be, a abui bôt é nga buni a ke be Tate.
22 Nkañete ya jam é nga boban Antioche ô nga kui ékôane bekristene ya Jérusalem, ane be nga lôme Barnabas Antioche. 23 Éyoñ a nga kui wôé, a nga yene beta mvame Zambe, a nga wôk avak a taté na a ve be bese ngule nyule na be ke ôsu a wulu ba’aba’a a Tate a nlem ôse; 24 amu a mbe mbamba môt, a too fe njalan a mfufube nsisim a mbunan. Amu nalé abui bôt é nga buni Tate. 25 Nde a nga ke tisone ya Tarse na a ke jeñe Saul, akekui a ye yene nye. 26 Éyoñ a yeneya nye, a nga zuu nye Antioche tañe ngumba mbu, be mbe be tabe’e bisulan a ékôane bekristene ya Antioche a ye’ele bôt. A mbe Antioche nnye beyé’é be nga taté loobane na bekristen avale nkômbane Zambe ô mbe.
27 Melu mete, bekulu mejô be mbe be so’o Jérusalem, be kele’e Antioche. 28 Wua ya be be a too jôé na Agabus, a nga tebe a bo nkulan ajô a ngule ya mfufube nsisime na zaé ja ye bo be bôte bese ya si ése a nalé a nga bobane fo’o melu me Claude. 29 Ane beyé’é be nga tyi’i na, ba zu lôme bobejañe ya Judée mimvolan* abime môt ase a mbe ngule ya ve; 30 nde fe be nga bo nalé, be nga lôme bemvendé mimvolane mite a zene ya be Barnabas ba Saul.