Nlitan Jean a nga yen
13 Ane a* nga tebe nsele’e ya mañe yôp.
A me nga yene tit afan é so’o mañ été é bili minlak awôm a minlô zangbwal, a nlak ôse ô mbe ô bili diadème wua,* a biyôlé bi ébiasé bi mbe ntilane minlô mié. 2 A tit afane me nga yen é mbe ane léopard,* ve mebo mé me mbe ane mebo me ours, a anyu dé é mbe ane anyu ngbwengbwem. A dragon a nga ve tit éte ngul a éto njôane jé a beta éjôé.
3 Me nga yene na, nlô wé wua ô mbe ô yiane bi mbia aveñ, ve beta aveñ ate a nga mane yet, a bôte bese ya si be mbe be tôñe’e tit afane be too fe’e ne vema. 4 A be nga kañe dragon amu a nga ve tit afan éjôé, a be nga kañe tit afane be jô’ô na: “Za a ne ane tit afan, a za a ne wosane je?” 5 Be nga ve nye anyu da kobô beta be mam a di da kobô mame me ébiasé, a be nga ve nye ngule ya bo aval a yi tañe ngone 42. 6 A a nga yoé anyu dé na a kobô Zambe ébiasé, a na a kobô éyôlé Zambe ébiasé a vôme Zambe a too, to’o ba be ne e yôp été. 7 Be nga ve nye nkañesane ya wosane mimfufup a dañe mie, a be nga ve nye ngule ya jôé menda me bôte mese, kane bôt ése, minkobô* mise a meyoñe mese. 8 A bôte bese ya si ba ye kañe nye. Ataté éyoñe bone be nga taté na ba bialé si, teke éyôlé éziñe ya biyôlé biap é nga tilibane mvulekane kalate ya ényiñe Mone ntômba be nga wôé.
9 Nge môt éziñ a be’e melo, a wô’ôk. 10 Nge môt éziñ a yiane minkôm, a ye fo’o ke minkôm. Nge môt éziñ a wôé a nkpwaté mekôn,* a yiane wu a nkpwaté mekôn. Vôme nyi a sili mbane ya jibi a mbunan asu mimfufup.
11 Nde me nga yene tit afane fe é so’o si, a é mbe é bili minla’a mibaé ane minla’a mi mone ntômba, ve é nga taté na ja kobô ane dragon. 12 Tit afan é bili minla’a mibaé é mbe é bili éjôé ése tit afan ôsu é mbe é bili, mise me tit afan ôsu été. A ja bo na si a bôte bese ba nyiñ été, be kañe tit afan ôsu, nje éte é nga mane yete beta aveñ a nga balé je. 13 Ja bo beta mendem aval é ne na, bôte ya si ba yen ane nduane ja so yôp é za’a si.
14 Ja du’u bôte be too si, amu mendeme be nga ve nye ngule ya bo e mise me tit afan, nté ja kate bôte ba nyiñe si na be bo éve’ela ya tit afan, nje éte nkpwaté mekôn ô nga balé ve é ngenan é vee. 15 Be nga ve nye ngule ya ve éve’ela ya tit afane mvebe,* ndemben éve’ela ya tit afan é ne kobô a bo fe na ba bese ba bene kañe tit afane be wu.
16 A yemete bôte bese, bone be bôt a beta be bôt, minkukum a miñzôzoé, bôte be ne fili a alo na be nyoñe ndem e wo ya mbo nnôme wop nge ke mvome mesu jap, 17 asu na môt éziñ a bo te ngule ya kuse nge kuan, vengevenge ve a bili ndem, nalé ate a tinane na, éyôlé tit afane nge ki nombo a wô’an a éyôlé jé. 18 Vôm ate nnye ñhe a sili fek: Môt a yeme yene mam a bo’o tañe ya tit afan, amu é ne nombo môta binam, a nombo éte é ne 666.