Kalate Paul a nga tili Philémon
1 Ma Paul, mone mimbôk amu Krist Yésus, bia mojañe Timothée, ma tili Philémon kalate, monyañe wongane bia nye’e, bia be nye bia bo ésaé. 2 Ma tili fe kale jangan Apphia a Archipe monyañe wongan, nnye ate a saane Krist nsamba a bia, aval ane mone bezimbi. A ékôane bekristene* ja tôkane nda jôé:
3 Beta mvam a mvo’é bia so be Zambe Ésa wongan, ba Tate Yésus Krist bi tabe’e be mia.
4 Éyoñ ése ma ye’elane Zambe ajô dôé, ma ve nye akiba, 5 amu ma ke ôsu a wô’ô bobejañe be kobô’ô ajô ya mbunane wôé, a abime wo nye’e Tate Yésus a mintobane mise. 6 Ma ye’elane Zambe na, mbunan ô bili nsamba a bôte bevok, ô tindi wo na ô yeme mbamba be mame bese bia bi a zene ya be Krist. 7 Amu me nga wôk abui mevak, nleme wom ô nga bômbô si éyoñe me nga wô’ô be kobô’ô ajô ya nye’ane wôé. Amu minleme mintobane mi nga volôbane fo’o.
8 Jôme te nje, amu Krist, me bili ngule ya kobô wo teke woñe na ô bo mam avale da yian, 9 ve ma jibi ye’elane wo, amu ma yem abime nye’an é ne wo nlem; ma Paul, me ne nnôme môt, me too ke mone mimbôk amu Krist Yésus. 10 Ma ye’elane wo ajô ya Onésime, mone wom, amu me ntoo nye ésa e nda mimbô’ô va.* 11 Ôsusua, a nji be wo mfi éziñ, ve éyoñe ji, a ntoo bia wo mfi. 12 Ma bulane lôme wo nye, ôwé, nleme wome mamien.
13 Me nga ye yene mvaé ya ba’ale nye va asu na a volô ma señe jôé, nté me ngenane mimbôk amu mbamba foé. 14 Ve me nji kômbô bo jôm éziñe teke taté sili wo asu na nkômbane wôé ô boban, ve sa ke amu ma tindi wo, ve amu womiene wo yi. 15 Éko éziñ, jôme te nje a nga kôlô be wo mone nté,* asu na a beta bulane be wo nnôm éto, 16 sa ke fe ane ôlo, ve ane môt a ne mfi a dañ ôlo, ane monyoñe wo nye’e. Ma nye’e nye abui, ve womiene fe wo ye dañe nye’e nye ane ôlo wôé a monyoñe be Tate. 17 Nde nge me ne mvôé* jôé, nyoñe’e nye a mbamba nlem, aval ane nge a ne ma. 18 Nde fe, nge a nga bo wo mbia jam éziñ, nge a bili wo jôm éziñ, lañe’e de na ma me bili wo mvôla. 19 Ma Paul, ma tili a wo wome na mamiene ma ye zu ya’ane mvôla a bili wo. Te vuane fe na, womiene fe ô bili ma mvôla, ényiñe jôé ébien. 20 Ôwé a mojañ, me too ndi na, wo ye volô ma mfa’a ôte amu Tate. Bô’é ma nleme si e Krist été.
21 Amu me too ndi na wo ye bo mame mese ma te sili wo, nde ma tili wo kalate nyi me yeme’e na, wo ye bo a dañ abime ma te tili wo na ô bo. 22 Ma yi fe na ô kômesane ma étaba’a, amu me too ndi na a zene ya meye’elane menan, ma ye beta bo fili ya zu be mia.
23 Épaphras, monyañe wome bia nye bi ne mimbôk amu Krist Yésus, a batane wo, 24 Marc ba Aristarque, Démas a Luc, bôte bia be be bia saé ba batane fe wo.
25 Beta mvame Tate Yésus Krist a tabe’e be mia amu mbamba nleme wônan.