Mbamba foé Matthieu a nga tili

22 Ane Yésus a nga beta kobô be a bela’ane bive’an a jô’ô na: 2 “Bi ne vek Éjôé ya yôp a njô bôt a nga bo abôk aluk asu mone wé. 3 Nde a nga lôm alo dé é ke loone bôt a nga bañete na be zu tabe abôk alu’u mon, ve be nga bene so. 4 Ane a nga lôm alo afe a jô de na, ‘Kelané kate bôte me nga bañete na: “Tama yenan! Me maneya kômesane bidi, me maneya tyi’i benyak, a betite be ne avoñe tyiñ, jôm ése é ntoo nkômesan. Za’ané abôk aluk.”’ 5 Ve be nji bisi nloon, wua ya be be a nga ke afube dé, nyu mbok a nga ke bo makite mé; 6 ve ba bevo’o be nga bi alo dé, be nga yite de a mane wôé de.

7 “Njô bôt a nga wô’ô mbia ôlun, ane a nga lôme minkane bita mié na mi wôé bewôé bôte bete, a na be di’i tisone jap. 8 Nde a nga kat alo dé na, ‘Abôk aluk é ntoo nkômesan, ve bôte me nga bañete be litiya na be nji yiane tabe abôk éte. 9 Nde kelané beta minjoñ, mi bañete môt ase mia ye koone nye na a zu abôk aluk.’ 10 Ane alo éte é nga ke minjoñe minjoñ, a bañete bôte bese be nga koone be, mbia be bôt a mbamba be bôt, a aba ba bo abôk aluk é mbe njalan a bôte be nga zu di.

11 “Éyoñe njô bôt a nga zu a fombô beyeñ, nde a nga yene môt a nji be a be’e biyé bia yian abôk aluk. 12 Ane a nga sili nye na, ‘A môt, wo te zu bo jé va, teke jaé biyé bia yian abôk aluk?’ Môt ate a nji jô jôm. 13 Ane njô bôt a nga jô bebo bisaé bé na, ‘Tiñetané nye mo a mebo, mi wua nye atan e dibi si, nne a ye yône wôé a latane mesôñ.’

14 “Amu abui é ne nloon, ve ba be ne ntobane be ne tyôtyoé.”

15 Ane bepharisien be nga ke ésok, a bôndé fe’e ya bi nye a zene ya mam a ye jô. 16 Nde bepharisien be nga lôme nye beyé’é bap, fufulu a bôte ya ngame Hérode, be jô’ô nye na: “A Ñye’ele, bia yeme na ô ne zôsô, a na, wo ye’ele bôte mejô me Zambe e zôsô été, nde fe wo bo ki mame na bôte be yene wo mvaé, amu ô ne teke fombô bôte mesu.* 17 Kate’e bia, wo simesan aya? Ye atiñe da kañese na môt a ya’ane César toya* ye momo?” 18 Ve Yésus a mbe a yeme’e na be ne mbia be bôt. A nga sili be na: “Amu jé mia ve’ele ma, a bôte medu’an? 19 Lita’ané ma nsañe moné ba ya’ane wô toya.” Ane be nga zu ve nye denier* wua. 20 Ane a nga sili be na: “Asu za é ne nkañane va, a jam é ne ntilane va da fombô za?” 21 Be nga yalane nye na: “César.” Ane a nga jô be na: “Bula’ané César biôme bi César, ve Zambe biôme bi Zambe.” 22 Éyoñe be nga wô’ô mejô mete, be mbe fe’e ne vema. Ane be nga li’i nye valé a ke.

23 Môs ôte besadducéen, mbe bete ba jô na ñwomane miñwuane wo ye ke boban, be nga zu yene nye a sili nye na: 24 “A Ñye’ele, Moïse a nga jô na, ‘Nge môt éziñ a wu teke biaé bon, monyañe wé a yiane lu’u minga a te lik. Bon a ye biaé a minga ate, ba ye nyoñeban ane bone be môt a nga wu.’ 25 Bobenyañe zangbwal be mbe a bia va, nde nyu ôsu a nga lu’u minga a wu teke li’i mon, ane monyañ a nga li’i a nyoñe minga wé éyoñ a wuya. 26 Nalé a nga kui fe be nyu baa, nyu lale akekui bese zangbwal. 27 Ane minga a nga su’ulane wu. 28 Nde, éyoñe ya ñwômane miñwuan, minga ate a ye bo minga za? Amu bese zangbwal be nga lu’u nye.”

29 Ane Yésus a nga yalane be na: “Mia kop, amu mi nji yeme Mintilan, nge ngule Zambe. 30 Amu éyoñe ya ñwômane miñwuan, befame be nji lu’u binga, binga ke be nji ke meluk, amu be ntoo ane beéngele ya yôp été. 31 Mfa’a ya ñwômane miñwuan, ye mi nji lañe jame Zambe a nga jô mia na, 32 ‘Me ne Zambe Abraham, Zambe Isaac, a Zambe Jacob’? A nji bo Zambe miñwuan, a ne Zambe bevevee.” 33 Éyoñe minsamba mi bôte mi nga wô’ô mejô mete, mi mbe fe’e ne vema, amu mam a mbe a ye’ele’e mie.”

34 Éyoñe bepharisien be nga wô’ô na, Yésus a dibeya besadducéen menyu, ane be nga so nsamba a zu koone nye. 35 Môte wua ya be be, nyu a mbe a kôme’e yeme Metiñe me Moïse a nga ve’ele nye, a sili nye na: 36 “A Ñye’ele, e Metiñe me Moïse mese, atiñ avé da dañ?” 37 A nga yalane nye na: “‘Wo yiane nye’e Yéhôva* Zambe wôé a nleme wôé ôse, a ényiñe* jôé ése, a ôsimesane wôé ôse.’ 38 Atiñe da dañe nde ñhe le, a ne fe atiñ ôsu. 39 Di baa é ne fe avale te nde di: ‘Wo yiane nye’e môte mbok ane wo nye’e womien.’ 40 Metiñe mete mebaé me ne mbôka’a ya Metiñe me Moïse mese a mejô bekulu mejô.”

41 Nté bepharisien be mbe be ngenane nsamba valé, Yésus a nga sili be na: 42 “Mia simesan aya mfa’a ya Krist? A ne mone za?” Be nga yalane nye na: “A ne Mone David.” 43 A nga sili be na: “Amu jé ñhe David, a ngule ya mfufube nsisim, a nga loone nye na ‘Tate,’ éyoñ a nga jô na, 44 ‘Yéhôva* a nga jô Tate wome na: “Tabe’e si mbo nnôme wom, akekui ma ye bôé bôte ba siñe wo mebo môé si”’? 45 Nge David a nga loone nye na ‘Tate,’ aval avé a ne beta bo mone wé?” 46 Môt éziñ a nji be ngule ya yalane nye, ataté môs ôte, môt éziñ a nji ve’ele beta ke sili nye nsili.