Kalate Paul a nga tili Bephilippien

1 Ma, Paul a Timothée, mojañe bia nye bia saé nsamba, bi ne alo Krist Yésus. Ma tili mintobane ya Philippes, mmie mi ne beyé’é be Krist Yésus, ma tili fe betebele a bevolô ya ékôane bekristen.*

2 Beta mvam a mvo’é bia so be Zambe Ésa wongan, a Tate Yésus Krist, bi tabe’e be mia.

3 Ma ve Zambe wom akiba éyoñ ése ma simesane mia. 4 Éyoñ ése, ma bo meye’elane me nja’an* asu môt ase ya be mia. Ma bo de a mevak 5 amu ésaé ése mi nga bo na mbamba foé a miaseban,* ataté môs ôsu azukui den. 6 Me too fo’o ndi na, nyu a nga taté mbamba ésaé be mia, a ye bo je akekui memane, e môse Yésus Krist. 7 É ne zôsô mfa’a wome na me simesane na mia bese mia ye bo nalé, amu ma nye’e mia abui. Amu bia be mia bi ne benyoñe ngabe ya beta mvame Zambe to’o me ne mimbô’ô den, to’o éyoñe me mbe me bela’ane metiñe na me kaman a yemete mbamba foé mise bijôé.

8 Zambe a ne ma ngaa na me ne ôjeja’a ya yene môt ase ya be mia, amu ma wô’ô mia mintaé fo’o ve avale Yésus Krist fe a nga wô’ô mia mintaé. 9 Jame ma ke ôsu a sili Zambe meye’elane nde di na, nye’ane wônan ô ke ôsu a fuluku, a na mi bi nya ñyemane a mbamba ñyenane mam. 10 Na mi yemelane mame ma dañe mfi, mi bo teke bijô a teke kolé bôte bevok ôbak akekui môse Krist; 11 a na mi bo njalan a ébuma ya zôsô a zene ya be Yésus Krist asu duma a étôto’o Zambe.

12 Nde a bobejañ, ma yi na mi yeme na, été me tele va é vianeya bo na mbamba foé a dañe beta kateban, 13 amu nalé, bezimbi bese ba ba’ale njô bôt, a bôte bevo’o bese ba yeme na me ne mimbôk amu éyôlé Krist. 14 Mengata’a mame me volôya abui bobejañe ya nsisime na é bi ngule nlem, a na be kate bôte mejô me Zambe teke ko woñ.

15 É ne fo’o été na abui da kañete ajô Krist amu da kômbô yené* ékôane bekristen été, a amu da bo mesengan,* ve ba bevo’o ba bo de a mbamba nsôñan. 16 Balé bete ba kañete ajô Krist a nye’an, amu ba yeme na Zambe a nga ve ma mbe’e ya kamane mbamba foé; 17 ve ba ba bo mesengane ba bo de amu ba nye’e bitom, sa ke amu be bili mbamba nsôñan, ba yi na me tôbane minju’u nda mimbô’ô va. 18 To’o jé, to’o jé, me ne mevak amu ajô Krist da ke ôsu a kateban. To’o bôte ba bo de be bili mbamba nsôñan, to’o be bili mbia nsôñan. Mfa’a wom, ma ye fo’o ke ôsu a vak, 19 amu ma yeme na ma ye su’ulane bi ényiñ amu mia bo meye’elane me nja’an a mvolane ya nsisime Yésus Krist a ve bia. 20 Nalé a wô’an a jame ma yange a nleme wom ôse a ndi nleme jam, na me vo’o same a zen éziñ, ve na me jô, teke ko woñe na den, Krist a ye bi duma, aval a jaéya zu a bi de a zene ya nyule jam, to’o ma nyiñ, to’o ke ma wu.

21 Amu mfa’a wom, nge ma nyiñe ma nyiñ amu Krist, nge ma wu a ne fe mvo’é asu dam. 22 Nge ma yiane ke ôsu a nyiñe mfa’a ya minsôn, a ne ma’ane ya ésaé jam; ve ma kate ki mia jame ma ye top. 23 Mame mebaé me tele ma ôsu, ma kômbô fo’o bi éto fili a tabe a Krist, amu jame da dañe mvaé nde ñhe le. 24 Ve asu mfi wônan é ne nya mfii na, me ke ôsu a nyiñe mfa’a ya minsôn. 25 Mbôle ma tu’a yeme nalé, ma ye tabe a mia, a ke ôsu a saé a mia na mi wôn a vak mbunane wônan été, 26 ndembene meva’a menane me ne fuluku be Yésus Krist, a zene ya mvolane wome nté me ngenane valé a mia.

27 Kelané ôsu a nyiñ* avale da yiane mbamba foé bia kañete a lat a Krist, ndembene to’o ma so na ma zu yene mia, to’o me nji bo, me ke ôsu a wô’ô na mi bili ôsimesane wua a nleme wua,* na mia wosane nsamba na mia ke ôsu a buni mbamba foé, 28 a na, mi nji ko bôte ba siñe mia woñ. Mame mete me ne ndeme ya na bôte bete ba ye jañ, me ne fe ndeme ya na Zambe a ye nyii mia. 29 Amu mi nga bi ébotane ya buni Krist, a ji ya jibi minjuk amu jôé dé. 30 Amu mia bo mewosane mi nga yene mamiene me bo’ok, mia wô’ô fe na me ngenane me tii a mewosane mete.