Mame minlôman

15 Bôte béziñe be nga so Judée a be nga taté na ba ye’ele bobejañe na: “Nge mi teke tyi’ibane metyel aval ane Metiñe me Moïse ma jô, mi vo’o bi ényiñ.” 2 Ve éyoñe Paul ba Barnabas be nga sañetan a fas ajô éte a bôte bete, be nga tyi’i na Paul, Barnabas a bôte béziñ, be bet e be minlôman a bemvendé ya Jérusalem na be tu’a fas ajô éte.

3 Éyoñe bibu’a ya ékôane bekristene bi litaneya be, bôte bete be nga tyi’ilane Phénicie a Samarie, be mbe be kate’e bôte bone be mame bese be tii a avale meyoñe me nga kôñelane minlem a nalé a mbe a va’a bobejañe bese abui mevak. 4 Éyoñe be nga kui Jérusalem, bobejañe ya ékôane bekristen, minlôman a bemvendé be nga nyoñe be a nye’an ôse, a be nga kañete be abui mame Zambe a nga bo a zene jap. 5 Ve bôte béziñe be mbe be tôñe’e miñye’elane bepharisien be nga su’ulane bo bebuni, be nga kôlô si a jô na: “Da sili na be tyi’iban atyel a jô be na be tôñe Metiñe me Moïse.”

6 Nde minlôman a bemvendé be nga sulane mfa’a ya tu’a fase jam éte. 7 Éyoñe be sañetaneya* abui, Pierre a nga tebe tetele a jô be na: “A bôt, a bobejañ, mia kôme yeme na atata’a, Zambe a nga tobe ma zañe jenan, na a zene ya anyu dam, bôte ya meyoñe be wô’ô mbamba foé a buni. 8 A Zambe, nnyu a yeme minlem a nga liti na a kañese be éyoñ a nga ve be mfufube nsisim, fo’o ve aval a nga ve bia. 9 A nji liti nsela’ane éziñe zañe bia be be, ve a nga fubu minleme miap a zene ya mbunan. 10 Nde amu jé mia ve’ele Zambe a zene ya tyelé tyiñ beyé’é a ngul éboñeté bemvamba bangane nge biabebiene bi nji kui na bi be’e je? 11 Avale fe bia nyiiban, bi bili mbunane bi jô’ô na be fe ba nyiiban a zene ya beta mvame Tate Yésus.”

12 Nde nsamba bôt ôse ô nga ku évôl a ô nga taté na wo vô’ôlô ane Barnabas ba Paul ba kañete abui mendem a bitua bi mame Zambe a nga bo e meyoñ a zene jap. 13 Éyoñe be maneya kobô, Jacques a nga felan a jô’ô na: “A bôt, a bobejañe vô’ôlané ma. 14 Avale bi ndeme mane wôk, Syméôn* a nga kañete bia avale Zambe a nga simesane bôte ya meyoñe mefe a na, zañe jap a nga taté tobe bôt asu éyôlé jé. 15 Mejô mete ma kôme lu’an a mejô bekulu mejô be nga tili, aval é ne ntilane na: 16 ‘Éyoñe mame mete me maneya ma ye bulan a beta lôñe nda éndélé* David é nga ku; ma ye nyoñe bili’i ya nda éte a beta lôñe je, 17 ndembene mebuka’a me bôte me ne jeñe Yéhôva* a nlem ôse, fufulu a bôte ya meyoñe mese, bôte ba looban a éyôlé jé, nne Yéhôva* a jô nalé, nyu a bo mame mete, 18 mam a nga tyi’i na a bo den a ntoo ayap éyoñ.’ 19 Nde ma simesane* na é nji bo mvo’é ya ndeñele bôte ya meyoñe ba zu kañe Zambe, 20 ve bi tili be na be tyi jôm ése ba te ve bengulemelan, mvite mame ya bisôk,* jôm é ne teke ntyi’ane tyiñ* a metyi. 21 Amu aso melu mvus azukui den, Moïse a bili bôte ba kañete mejô mé bitisone bise, amu Sabbat ase ba lañe bekalate bé besynagogue na bôte bese be wôk.”

22 Nde minlôman a bemvendé a ékôane bekristen ése be nga tyi’i na ba lôme bôte béziñe ya be be Antioche, a Paul ba Barnabas; be nga lôme Judas, nnye fe be mbe be lo’one na Barsabas, be nga lôme fe Silas mbe bete be mbe be wulu’u bobejañ. 23 Be nga ve be kalate a jô’ô na:

“Bia, minlôman a bemvendé bobenyañe benan, bia tili mia a bobejañe mi nji bo bejuif mi too Antioche, Syrie a Cilicie: Bia batane mia! 24 Amu bi nga wô’ô na bôte béziñe be nga kôlô zañe jangan a zu ndeñele mia a mame be nga jô, be jeñe’e na be tyelé mia* minleme yôp akusa bo bi nji lôme be na be kate mia jôm éziñ. 25 Nde bi nga tyik a nleme wua na, bia tobe bôte béziñ a lôme be be mia nsamba a Paul ba Barnabas, bobejañe bia nye’e, 26 bôte be nga ve binyiñe* biap asu éyôlé Tate wongane Yésus Krist. 27 Bia lôme fe Judas ba Silas na, be fe be zu kate mia mame mete. 28 Amu mfufube nsisim a biabebiene bia te yene mvaé na bi bo te kô’ôlane mia mbe’e ôfe, ane ô vaa ve mame me ne mfi ma: 29 mi ke ôsu a tyi jôm ése ba te ve bengulemelan, metyi a jôm é ne teke ntyi’ane tyiñ,* mvite mame ya bisôk.* Nge mi kele ôsu a tube mame mete, mia ye bo mvo’é. Mi taba’ane mvo’é!”*

30 Nde éyoñe bôte bete be nga kôlô, be nga siliki Antioche a be nga sulan a nsamba ôse a ve be kalate. 31 Éyoñe be nga mane lañ, be nga vak, amu kalate ate a nga ve be ngule nyul. 32 Judas ba Silas be mbe fe bekulu mejô, be nga ke ôsu tañ abui melu a bo minkañete na be volô bobejañ a ve be ngule nyul. 33 Éyoñe be nga lôt ôbe nté valé, bobejañe be nga suu be na be bulane be bobejañe be nga lôme be mvo’é. 34 *—— 35 Mfa’a Paul ba Barnabas be nga li’i Antioche, ba be bôte ya wôé be mbe be ye’ele’e a kate mbamba foé ya ajô Yéhôva.*

36 Mvuse bone melu, Paul a nga jô Barnabas na: “Éyoñe ji ntame* bulan, bi ke jome bobejañe ya bitisone bise bi nga kañete ajô Yéhôva,* bi yene nge be ne mvo’é.” 37 Barnabas nnye a mbe a yemete’e na, be mba’a mba’a ve ke a Jean, nnye fe ba loone na Marc. 38 Ve Paul nye a nji be a yiik na be ke a nye, amu a nga ke li’i be Pamphylie a nji ke bo ésaé a be. 39 Nde mbia ngule zô’é a nga bo zañe jap aval é ne na be nga kandan, nde Barnabas a nga nyoñe Marc be ke bet éfunga a ke Chypre. 40 Paul a nga tobe Silas, a éyoñe bobejañe be maneya ye’elane beta mvame Yéhôva* na a ba’ale Paul, ane a nga ke. 41 Nde a nga tyi’ilane Syrie a Cilicie a va’a bikôane bekristene ngule nyul.