Kalate Paul a nga tili Begalate

4 Éyoñe ji ma jô na, nté ôse môte ba ye ve élik a ngenane mone mongô, a nji selan ôlo akusa bo a ne tate ya biôme bise, 2 ve a ne éjôé beba’ale a betebele si, akekui môs ésa wé a nga telé. 3 Avale te bia fe, éyoñe bi mbe bongô, bi mbe alo amu bi mbe bi tôñe’e asimesane ya émo.* 4 Ve éyoñ éyoñe be nga telé é nga kpwaan, Zambe a nga lôme Mone wé na a zu bialé abume be minga a a mbe atiñe si, 5 ndemben a ne ya’ane tañe ya kôté ba be ne Metiñe me Moïse si, asu na bi nyoñeban ane bon.

6 Éyoñe ji amu mi ne bon, Zambe a nga lôme nsisime Mone wé minleme miangan été, a wo jô e yôp été na: “Abba,* Tate!” 7 Nde, ô nji beta bo ôlo ve ô ntoo mon; a nge ô ne mon, ô ne ñhe fe nyoñe élik a zene ya be Zambe.

8 Ve éyoñe mi nji be mi yeme’e Zambe, mi mbe mi sa’ane ba be nji tu’a bo bezambe ane alo. 9 Ve éyoñe ji, mi nga yeme Zambe, nge ke na Zambe a nga yeme mia, aval avé mia beta bulane ke bo mame me bongô me ne nte’an a bua, a mia kômbô beta ke saane mame mete ane alo? 10 Mia kôme jeme mebô’ô ya melu, bengon, biyoñ a mimbu. 11 Ma ko woñ asu denane na, a zen éziñe me nga jañele éyoñe jam asu denan.

12 A bobejañ, ma ye’elane mia na mi bo ane me ne, amu ma fe me nga ju’u be ane mi ne. Mi nji bo ma jôm éziñ é ne abé. 13 Ve mia yeme na, ôkone wome ya minsôn, ñwô ô nga ve ma fan ôsu ya kañete mia mbamba foé. 14 A akusa bo me mbe nkôkon, mi nji nyoñe ma ane jôme ba biasé, nge jôm é ne nyé;* ve mi nga nyoñe ma ane éngele Zambe, ane Krist Yésus. 15 Ava’a mi mbe mi bili é nga ke vé? Amu mamiene ma bo’olô na, nge é mbe ngule ya boban, mi nga ye fôndé mise menan a ve ma me. 16 Nde, ye me ntoo nsiñe wônan amu ma kate mia benya mejôô? 17 Be bili ayôñe ya wone mia, ve sa ke amu mbamba nsôñan; ba kômbô futi metyama’ane zañe bia be mia, ndembene mi ne tôñe be tyi’ibi. 18 Ve, é ne mvaé kom ése na, môt a nyoñe ngap a mia nya abuii asu mbamba nsôñan, sa ke fo’o ve éyoñe me ne a mia, 19 a bone be bone bam, mia mia beta bo na nlem ô taé ma ane mintaé ya abiaé akekui Krist a kômbane* minleme mienan été. 20 Me mbe me yiik na me bo a mia éyoñe ji, a kobô mia aval afe, amu me nji yeme jame me ne simesane mfa’a wônan.

21 Katané ma, mia mia kômbô tabe atiñe* si, ye mi nji wô’ô jame Metiñe me Moïse ma jô? 22 Éve’an é ne na, é ne ntilane na Abraham a nga bi bobefame bebaé, wua a mbo ésaé minga a nyu mbok a fili minga; 23 ve nyu mbo ésaé minga a nga biaé, a nga bialé avale bone bese be wô’ô bialé,* a nyu fili minga a nga bialé a zene ya ngaka’a. 24 Mame mete me bili atinan afe, amu binga bete bebaé ba tinane bilate bibaé; ji ya Nkôle Sinaï nje é bili bon asu éto ôlo a é ne Agar. 25 Éyoñe ji, Agar a ne ndeme ya Sinaï, nkôl ô ne Arabie, a été jé é ne ane été Jérusalem ya éyoñe ji, amu a ne ôlo a bone bé. 26 Ve Jérusalem ya yôp a ne fili, a a ne nyia wongan.

27 Amu é ne ntilane na: “A nkôkôme minga, va’ak, wo ô nji biaé mon; yôta’an a loñ ôyenga, wo minga a nji yeme mintaé ya abiaé, amu bone be minga be nga lik, be ne abui a lôte ba be nyu a bili nnôm.” 28 Éyoñe ji, a bobejañ, mi ne bone ya ngaka’a aval Isaac a mbe. 29 Ve, fo’o ve avale nyu a nga bialé avale bone be wô’ô jaé bialé,* a nga taté na a tibili nyu a nga bialé a zene ya nsisim, avale te nde fe a bo den. 30 Ve jé éfuse ya mintilane ja jô? “Tita’ane mbo ésaé minga a mona fame wé, amu mona fame mbo ésaé minga, a ye ke nyoñ élik a zen éziñ a mona fame ya minga a ne fili.” 31 Nde, a bobejañ, bi nji bo bone be mbo ésaé minga, ve ba be fili minga.