Kalate baa Paul a nga tili Becorinthien
4 Nde, amu bi bili ésaé nkañete ji a zene ya mvam é nga litibane be bia, bi nji bili atek. 2 Ve bi nga jô’é mame me ne ôsone ba solé, teke wulu medu’an été nge toñekane mejô me Zambe; ve bia bo na bôte be yeme benya mejôô a bia ve mone môte ya nleme môt ase mbamba éve’ela e mise me Zambe. 3 E nya ajôô, nge mbamba foé bia kañete a solô, a solô be bôte ba ke njañan, 4 be bôte zambe ya émo* ji a maneya futi ndim asimesane bôte be nji buni, ndembene minkôkôé* ya étôto’o ya mbamba foé ajô Krist, nnye ate a ne éve’ela Zambe, mi ne bo te faé be be. 5 Bi nji kañete ajô dangane biabebien, ve bia kañete na Yésus Krist a ne Tate, a na bi ne alo denan amu Yésus. 6 Amu Zambe a ne nyu a nga jô na: “Éfufup é faék dibi été,” a a nga faé minleme miangane na, minkôkôé ya ñyemane mame Zambe mi yené be be a zene ya asu Krist.
7 Ve bi bili jôm é ne édima, meviek me étek* été, ndembene ngule ja dañe nyi ja yian é ne so be Zambe sa ke be bia. 8 Bi yeme bevôme bese, ve sa ke aval é ne na bi kate fô’ôsan; bi ne fe’e ne vema, ve sa ke aval é ne na teke fe yeme jame ya bo;* 9 bia tôban étibila’a, ve bi nji li’i étam; bia wuabane tyia, ve bi nji jañ. 10 Vôm ase bi nga ke, bi nga jibi kane mbia be mame Yésus a nga jibi, ndemben ényiñe Yésus é ne fe yené menyule mangan. 11 Amu bia bia nyiñ, awu é ne bia bebé kom ése amu Yésus, ndemben ényiñe Yésus é ne fe yené éwuwua nyule jangan. 12 Nde awu da bo ésaé be bia, ve ényiñe be mia.
13 Éyoñe ji, amu bi bili avale nsisime ya mbunane da, ane é nga tilibane na: “Me nga liti mbunan, nde me nga kobô”; bia fe bia liti mbunan, nde bia kobô, 14 bi yeme’e na Nyu a nga wômôlô Yésus a ye fe wômôlô bia a Yésus, a na a ye liti bia nsamba a mia. 15 Amu mame mete mese me ne asu denan, ndemben abui beta mvame Zambe é tu’a bo abui amu abui bôte da ve duma Zambe akiba.
16 Ajô te bi nji bili atek, ve to’o nge môte bi ne mfa’a ya atan a mane ndaman, môte bi ne mfa’a ya été wôé a bo mfefé môs ane môs. 17 Amu akusa bo minju’u* bia tôbane mie mi nji bo fo’o ve asu ôyôme nté, mi ne fe éfufup, minju’u mite mia bo na bi nyoñe duma da dañ anen, anen abui fo’o a é ne nnôm éto. 18 Nté bia beme mise mangan, sa ke biôme bia yené, ve biôme bi ne te yené, amu biôme bia yené bia lôt, ve biôme bi nji yené bi ne nnôm éto.