Kalate ôsu Paul a nga tili Becorinthien

13 Nge ma kobô minkobô mi bôt a minkobô beéngele ve teke nye’an, me ntoo ane éfus étyé ja bo biduñe nge ke biwoé bia duñe ne bañbañ. 2 A nge me bili mimveane ya nkulane mejô a nwô’ane ya minsolane mi mame mi ne étyi mise a ñyeman ôse, a nge me bili mbunan ôse aval é ne na me nga vaa minkôl,* ve nge me nji bi nye’an, me se ke jôm.* 3 A nge ma ve biôme bise me bili na, me volô bôte bevok, a nge ma kee nyule jame ndembene me ne bo éngelezek, ve nge me nji bi nye’an, jôm éte é nji volô ma jôm.

4 Nye’an ô ne ôjibi* a mbamba nlem. Nye’an ô nji bo aban. Ô nji bo énguñ, ô nji bo éngelezek, 5 ô ne te bo mame me ne te yian,* ô ne te jeñe mame mé émien, te soñe bôt. Te lañesan abé.* 6 Ô ne te vak a ékotekot, ve wo vak a benya mejôô. 7 Wo jibi mame mese, wo buni mame mese, ô too ndi a mame mese, ô ne mbane ya jibi mame mese.

8 Nye’an ô vo’o man. Ve nge mimveane ya kuli mejô mi ne, mia ye man; nge minkobô mevale mevale* mi ne, mia ye tebe; nge ñyeman ô ne, wo ye man. 9 Amu ñyemane wongan ô nji bo ngumba a nkulane mejô wongan ô nji bo ngumba. 10 Ve éyoñe jôm é ne ngumba ja ye so, ji é ne éfase ja ye man. 11 Éyoñe me mbe mongô, me mbe me kobô’ô ane mongô, me simesa’an ane mongô, me fase’e ane mongô; ve éyoñe ji, me ntoo nya môtô, me jô’éya mefulu me mongô. 12 Amu éyoñe ji, bia yen éve’ela bijujuk* a zene ya ngobô é ne étyé, ve éyoñ éziñ, bia ye kôme yene ne ngeññ. Éyoñe ji ma yeme ve éfas, ve môs éziñe ma ye tu’a yeme* fo’o ve avale ba kôme ma yem. 13 Ve mame ma melale ma tabe: mbunan, ndi nlem, nye’an; ve jame da dañe mame mete mese é ne nye’an.