Nlitan Jean a nga yen

20 A me nga yen éngele a so’o yôp a bili édiba’a ya édok ébé a beta ngôkop wo wé été. 2 A nga bi dragon, nyo ya atata’a, nnye a ne Diable a Satan, a a nga ka’ate nye tañe mimbu 1 000. 3 A a nga wua nye édok ébé été, vôm a nga fete nye a dip anyiine ya vôm ate, ndemben a ye ke fe beta du’u meyoñe môs éziñ akekui mimbu 1 000 mia ye man. Mvus éyoñ éte, ba yiane beta suu nye tañe mone nté.

4 A me nga yene bito bi njôan, a be nga ve ba be mbe be too bie yôp, ngule ya tyi’i mejô. Ôwé, me nga yene binyiñe* ya ba be nga wu* amu be nga kañete ajô Yésus, a amu be nga kobô ajô Zambe, a fe ajô ba be nji ke kañe tit afane nge ke éve’ela jé a ba be nji bi ndeme mvome mesu jap a mo map. A be nga beta nyiñ a jôé a Krist tañe mimbu 1 000. 5 Jame di, é ne ñwômane miñwuan ôsu. Mimbime mivo’o mi nga bu’u, mi nji wômô akekui mimbu 1 000 mi nga man. 6 Mevak a étyi be môt ase a nyoñe ngap a ñwômane miñwuan ôsu; mfa’a ya bôte bete, awu baa é nji bi ngul éziñ, ve ba ye bo beprêtre be Zambe a beprêtre be Krist, a ba ye jôé ane bejô bôt a nye tañe mimbu 1 000.

7 Éyoñe mimbu 1 000 mia ye man, ba ye beta kuli Satan mbôk, 8 a a ye kui asu na, a du’u meyoñe me ne si ése meku’u menyin, ôwé, Gog ba Magog, a ye sulane be asu bita. Tañe jap é ne ane nsele’e ya mañ. 9 A be nga mane mialane si ése a be nga mane bômane nlame mimfufup a tisone ba nye’e. Ve nduan é nga so yôp a mane di’i be. 10 A Diable, nyu a mbe a du’u be a nga wuaban ato’o nduan* a soufre, vôme tit afane ba évuse nkulu mejô be mbe be ntoo; a ba ye wôk ényane* môse ba alu nnôm éto a nnôm éto.

11 A me nga yene beta éto njôan a too éfumulu a Nyu a mbe a too nye yôp. Si a yôp bi nga tup a kôlô nye ôsu. Amu vôme ya tabe a nji fe beta bo asu dap. 12 A me nga yene miñwuan, beta be bôt a bone be bôt, be mbe be tele ôsu éto njôan, a be nga yoé mimvulekane bekalate. Ve mvulekane kalate ôfe ô nga yoéban; a ne mvulekane kalate ya ényiñ. Miñwuane mi nga tyi’ibane mejô a lat a mame me mbe ntilane mimvulekane bekalate, aval ane mimboone miap mi mbe. 13 A mañe me nga ve mimbime mi mbe été, a awu ba Soñ,* be nga ve mimbime mi mbe be be, a be nga tyi’ibane mejô, môt ase aval ane mimboone mié mi mbe. 14 A awu ba Soñe* be nga wuaban ato’o nduan. Ato’o nduan* é ne ndeme ya awu baa. 15 A ba bese biyôlé bi nji be ntilane kalate ya ényiñ, be nga wuaban ato’o nduan.