Mbamba foé Matthieu a nga tili

13 Môs ôte, Yésus a nga kôlô nda, nde a nga ke tabe mfôme mañ. 2 Ane minsamba mi bôte mi nga tôkane fefele jé, nde a nga bet éfunga été a tabe si, a minsamba mi bôte mise mi nga tebe tetele mfôme mañ. 3 Ane a nga ye’ele mie abui mam a zene ya bive’an, a jô’ô na: “Mbé mefup a nga ke miase mvoñ. 4 Nté a mbe a kele’e a miase mvoñ, nde mefese méziñe me nga ku zene zen, ane anon é nga so a mane zu di me. 5 Mevo’o ya été me nga ku vôme si é ne meko’o mekok, amu si é nji be abui vôm ate, nde me nga faa été été. 6 Ve éyoñe vian ô nga faé, nde ô nga mane di’i bone metô’ô bete, ane me nga mane viele, amu me nji be me bili minkañ. 7 Mefese mevo’o me nga ku bilo’o bi bili biyo été, ane biyo bi nga mane yametane metôk, a wôé me. 8 Ve mefese méziñe me nga ku mbamba si, ane me nga wume bibuma, fes éziñe ya été é nga wume bibuma a lôte 100, fese fo’o bibuma 60, nyu fo’o bibuma 30. 9 Môt a be’e melo ya wôk, a wô’ôk.”

10 Nde beyé’é bé be nga subu nye bebé, a sili nye na: “Amu jé wo belane bive’an éyoñe wo ye’ele be?” 11 A nga yalane be na: “Mia mi bili mvome ya wôk atinane ya mame me Zambe me solô, me fombô’ô Éjôé ya yôp, ve bôte ba, be nji bi mvom éte. 12 Amu môt ase a bili, nnye ba ye beta kô’ôlane na a bi abui; ve nyu ki a nji bi jôm, ba ye beta vaa ja’a mon abim a bili. 13 Ajô te nde ma belane bive’an éyoñe ma ye’ele be; amu ba fombô ve teke yene jôm, ba vô’ôlô, ve teke wôk, nge yem atinane ya été. 14 Nkulan ajô Ésaïe wo tôébane be be. Wo jô na: ‘Mia ye fo’o kee melo, ve teke wôk atinane ya été, mia ye fo’o fombô ve teke yene jôm. 15 Amu minleme mi bôte ba mi ntoo ayet, be maneya fete melo map,* be maneya fe fete mise map na, be bo teke yen, a vô’ôlô a melo map, a wôk atinan a minleme miap, a bulane be ma na me saé be.’

16 “Ve mia, mi ne mevak, amu mise menane ma yen a amu melo menane ma wôk. 17 Amu ma bele ane ma jô mia na, abui bekulu mejô a bezôsô be bôte be nga kômbô yene mame mia yene ma, ve be nji yene me, be nga kômbô fe wô’ô mame mia wô’ô ma, ve be nji wô’ô me.

18 “Éyoñe ji, tame vô’ôlané jam éve’ane ya mbé mefube ja tinan. 19 Fes é nga ku mfôme njoñ, é ne môt ase a vô’ôlô foé ya Éjôé, ve teke wôk atinane ya été, éyoñ éte mbia môt a so, a zu té mbamba foé a te faa nye nlem été. 20 Fes é nga ku vôme si é ne meko’o mekok, é ne môt a wô’ô foé ya Éjôé, a kañese fe je a mevak. 21 Amu mejô me nji bi minkañe be nye, ve nné ane a tôbane mewosan a étibila’a, nde a kolé ôbak.* 22 Fes é nga ku bilo’o bi bili biyo été, é ne môt a wô’ô mbamba foé, ve mame ya émo* ji ma tyelé bôte minleme yôp a ngule medu’ane ya akum, be viane mane té mbamba foé ate nleme wé été, éyoñe te nje a bo teke wume bibuma. 23 Fese ki é nga ku mbamba si, é ne môt a vô’ôlô mbamba foé a wôk atinane ya été, a nga wume bibuma, vana bibuma 100, vana bibuma 60, vôma mbo’o ki bibuma 30.”

24 A nga beta ve be éve’an éfe, a jô na: “Éjôé ya yôp é ne ane mbé mefup a bé mbamba mvoñ. 25 Nté bôte be mbe ôyo, nde môt a mbe a siñe’e mbé mefup a nga zu bé mbia élo’o vôme be nga bé blé, ane a nga ke. 26 Éyoñe bidi bi nga faa a wume bibuma, e teme na mbia élo’o fe a ntoo été. 27 Nde alo masa ya nda é nga ke yene masa a sili nye na: ‘A masa, nga ô nga bé ve mbamba mvoñ afube dôé, mbia élo’o nyi a so vé?’ 28 Nde a nga yalane be na: ‘Môt a siñe ma nnye a nga bo de.’ Ane alo é nga sili nye na: ‘Ye wo yi na bi mane ke vaa mbia élok ate?’ 29 Nde masa a nga yalane be na: ‘Teké’é, amu mi za té mbia élok a blé nsamba. 30 Jôka’ané be bese be yaé nsamba akekui nkôane bidi, éyoñ awolo ya koé bidi da ye kui, ma ye jô bôte ba koé bidi na: Tata’a vaané mbia élok, a ka’a nye mimbom, a di’i nye, mvuse ya valé mia ye vaa blé a futi nye nda ba tôkane bidi.’”

31 A nga beta ve be éve’an éfe, a jô na: “Éjôé ya yôp é ne ane fese moutarde* môt a nga nyoñ a bé je afube dé. 32 E mefese mese, fese éte nje ja dañe tyôtyoé, ve éyoñ é maneya yaé, é ne bo anen, bebé ane élé, aval é ne na anone ya yôbe da zu lôñe mumba’a mintyaé mié.”

33 A nga ye’ele be a zene ya éve’an éfe: “Éjôé ya yôp é ne ane mvusu minga a nyoñ a fulan a abui avut,* akekui avut ése da mane vus.”

34 Yésus a nga ye’ele bôte mame mete mese a zene ya bive’an. É ne été na a nji be a kobô’ô be teke belane bive’an. 35 Nalé a nga tôé jame nkulu mejô a nga jô na: “Ma ye ye’ele bôt a bive’an; ma ye kate bôte mame me mbe nsolan aso éyoñe bone be nga taté na ba bialé si.”*

36 Éyoñ a nga suu nsamba bôt, ane a nga bulane nda. Nde beyé’é bé be nga zu yene nye a jô na: “Kate’e bia jam éve’ane ya mbé mefube ja tinan.” 37 Ane a nga yalane be na: “Môt a nga bé mbamba mvoñ a ne Mona môt. 38 Afup é ne bôte ya si nyu. Mbamba mvoñe ki a ne bone ya Éjôé, ve mbia élo’o ki a ne bone be mbia môt, 39 môt a siñe mbé mefup, nyu a nga zu bé mbia élok a ne Diable. Éyoñe ya nkôane bidi ki, é ne memane ya émo,* bôte ba saé afube ki be ne beéngele. 40 Ajô te, avale be nga mane ka’a mbia élo’o mimbom, a di’i nye, avale te fe da ye bobane memane ya émo.* 41 Mona môt a ye lôme beéngele bé, ba ye tôkane biôme bise, a bôte bese ba bo na bôte be kolé ôbak, a ba bese ba biasé atiñ, a titane be Éjôé jé. 42 Ba ye wua be mbe’e nduan été. Nne ba ye yône wôé a latane mesôñ. 43 Éyoñe te nje, bezôsô be bôte ba ye faé ane nlô jôbô Éjôé Ésa wop. Môt a be’e melo ya wôk, a wô’ôk.

44 “Éjôé ya yôp é ne ane jôm é ne édima é solô afup été, nje môt éziñ a nga som a beta solé je; amu a wôk avak, a bulan, a mane kuan akume dé ése, a ke kus afup éte.

45 “Éjôé ya yôp é ne fe ane mbo makit a ke a jeñe señ é ne édima. 46 Nné ane a yene señe jia é ne nya édimaa, a nga bulan a mane kuane biôme bise a bili a kuse je.

47 “Éjôé ya yôp é ne fe ane avote ba wua mañ été, a da bi kane kos ése. 48 Éyoñ avot é jaéya, ba limiti de kindik, be tabe si a fiale kos; nyi é ne mvo’é, be futi je minkun été, ve kos é nji bo mvo’é, ba wua je fé. 49 Nne mame ma ye bobane nalé memane ya émo.* Beéngele ba ye so, a kandé mbia be bôt a bezôsô be bôt, 50 ba ye wua mbia be bôte mbe’e nduan été. Nne ba ye yône wôé a latane mesôñ.

51 “Ye mia te kôme wôk atinane ya mame mete mese?” Nde be nga yalane nye na: “Ôwé.” 52 Nde a nga jô be na: “Amu é ne nalé, yemané ñhe na, ñye’ele ase a ye’ele bôte mame ma fombô Éjôé ya yôp, a ne ane mie ndaa, nnye ate a kuli biôme bi ne mimfefé a biôme bi ntoo minnôm e nda akume jé.”

53 Nné ane Yésus a nga mane ve be bive’ane bite, ane a nga kôlô vôm ate. 54 Éyoñ a bulaneya ngoto jé, nde a nga taté na, a ye’ele bôt e synagogue wop, a bôte be mbe fe’e ne vema a sili na: “Fe’e môte nyi a bili, ja so nye vé? A soo ngule ya bo mesimba mese ma vé? 55 Ye sa ke mone kafinda nyi? Nga nyia wé a ne jôé na Marie, nga bobenyañe bé be ne na: Jacques, Joseph, Simon a Judas? 56 Nga bekale bé be ne a bia va? Nne a nga nyoñe ngule nyi ése vé?” 57 Nde be nga bene buni nye. Ve Yésus a nga yalane be na: “Bôte be ne teke semé nkulu mejô ngoto jé a nda jé.” 58 Amu njembane mbunane wop, a nji bo abui mesimba vôm ate.