Kalate Paul a nga tili Behébreu

5 Amu beta prêtre ase be nga nyoñe be bôt a nga teléban asu mame me tii a Zambe, ndemben a ne ve mimvean a metuna’a asu minsem. 2 A ne ngule ya bo mbamba nlem* a bôte be nji yeme jam é ne zôsô, a ba bo minsem* amu nye fe a bo bikop, 3 a amu nalé, a yiane bo mimvean asu minseme mié émien avale fe a bo asu bôte bevok.

4 Môt a nji nyoñe duma éte amu a kômbô de nyoñ a nkômbane wé, ve a nyoñe de fo’o ve éyoñe Zambe a te loone nye, aval a nga loon Aaron. 5 Aval éte fe Krist a nji tebe beta prêtre a émien, ve a nga nyoñe duma éte be Nyu a nga jô nye na: “Ô ne mone wom; den, me ntoo éso.” 6 Aval a jô fe vôme mfe na: “Ô ne prêtre ya nnôm éto aval ane Melkisédek.”

7 Éyoñ a mbe si,* Krist a nga bo meye’elane me nja’an a meye’elane ba de’ele mo a miñyôn a milik, a nga ye’elane Nyu a mbe ngule ya nyii nye awu, ane a nga bi éyalane ya meye’elane mé amu a mbe a ko Zambe woñ. 8 Akusa bo a mbe mon, a nga yé’é bo mewôk a zene ya minjuk a nga tôbane mie; 9 éyoñ a maneya bo mewô’ô mame mese, ba be nga bo nye mewô’ô be ne nyiiban a nyoñ ényiñe ya nnôm éto a zene jé, 10 amu Zambe a nga telé nye ane beta prêtre aval ane Melkisédek.

11 Bi bili abui mame ya jô mfa’a wé a mame mete me ne ayaé ya timin, amu mi ne te ve ngule ya wôk. 12 Amu akusa bo na éyoñe ji,* mi nga yiane bo beye’ele, mi ngenane mi yii na môt a ye’ele mia, ataté mintene miñye’elane ya atata’a ya minjôane mi Zambe mi ne étyi, a mia beta kômbô bulane menyañ, sa ke benya bidii. 13 Amu nyu a ke ôsu a nyu menyañ a nji yeme mejô ya zôsô amu a ne mone mongô. 14 Ve benya bidii be ne asu benya bôtô, ba be bili fulu ya fas, a nalé a ve be ngule* ya yemelane jé é ne mvaé a jé é ne abé.