Kalate Paul a nga tili Beromain

4 Nge é ne ñhe nalé, jé bi ne jô mfa’a ya mvamba wongane ya minsôn, Abraham, jé a nga bi? 2 Éve’an é ne na, nge Abraham a nga bi mekabe na a ne zôsô amu mimboon, a nga ye bi amu ya bo éngelezek, ve sa ke mise me Zambe. 3 Amu éfuse ya mintilane ja jô aya? “Abraham a nga buni Yéhôva* ane a nga lañeban ane zôsôa môt.” 4 Nde ma’ane me môt a bo ésaé me nji lañebane nye ane beta mvam, ve ane tañe ba yiane ya’ane nye, amu ésaé a te bo.* 5 Mfa’a ôvok, môt a nji bo ésaé ve a bili mbunane be Nyu a ve môt a biasé miñye’elane mi Zambe mekabe na a ne zôsô, mbunane wé wo bo na a lañebane zôsô. 6 Avale David fe a nga kobô ajô ya meva’a ya môte Zambe a nyoñe na a ne zôsô, akusa bo na mimboone mié mi nji be mi tu’a wô’an a metiñe me Zambe, a nga jô na: 7 “Mevak a bôte mbia be mame bap be nga jaméban a bôte minseme miap mi nga butiban;* 8 mevak a môte Yéhôva* a ye ke lañe nsem.”

9 Nde ye meva’a mete ma so fo’o ve asu bôte be ne ntyi’an atyel, nge ke na me ne fe asu ba be ne te ntyi’an atyel, amu bia jô na: “Mbunan Abraham ñwô ô nga bo na a lañeban ane zôsôa môt.” 10 Éyoñ évé nje Zambe a nga lañe nye ane zôsôa môt? Ye éyoñ a mbe a ntoo ntyi’an atyel, ye éyoñ a mbe a ngenane te ntyi’an atyel? A mbe a ngenane te ntyi’an atyel éyoñe Zambe a nga lañe nye na a ne zôsô. 11 A nga bi ndem, nje éte é ne ntyi’an atyel, ane sitame* ya zôsô a zene ya mbunan a mbe a bili a too ki na, a mbe a too te ntyi’an atyel, asu na a bo ésa bôte bese be bili mbunan a too ki na be ne te ntyi’an atyel, asu na be lañeban ane bôte be ne zôsô. 12 A ndemben a ne bo ésa mvoñe bôt é ne ntyi’an atyel, sa ke ve bôte ba su’u ntyi’an atyel, ve ba fe ba nyiñ avale da wô’an a mbunan ésa wongan Abraham a mbe a bili éyoñ a mbe te ntyi’an atyel.

13 Amu, a nji be a zene ya Metiñe me Moïse nye Abraham, nge ki mvoñe bôte jé, be nga bi ngaka’a na ba yiane bo benyoñe ngabe ya mfefé émo, ve a mbe amu zôsô a zene ya mbunan. 14 Amu nge ngaka’a nyu é nga boban ve asu bôte ba tôñe Metiñe me Moïse, mbunan ô ntoo zezé jôm, a ngaka’a é boya momo. 15 Nya ajôô, Metiñe me Moïse ma kuli ayaa, ve vôme Metiñe me Moïse me nji bo, ntyamane metiñe fe ô nji bo.

16 Jôme te nje, a ne amu mbunan, nalé ate a wô’an a beta mvame Zambe asu na mvoñe bôte jé ése é tabe ndi na, ngaka’a éte ja ye tôéban, sa ke ve asu ba ba tôñe Metiñe me Moïse, ve fe asu ba ba tôñe mbunan Abraham, nnye ate a ne ésa wongane bia bese. 17 (A ne fo’o jam é ne ntilane na: “Me nga telé wo ésa ya abui meyoñ.”) Jam éte é nga bobane mise me Zambe, nnye ate a mbe a buni’i, a nnye a bo na jôm ése é wuya é nyiñ, a nyu a loone biôme bi ngenane te boban ane biôme bi ntoo.* 18 A mbe a too ndi a buni’i na a ne bo ésa ya abui meyoñ, akusa bo na jam éte é nji be boban, a nga buni de amu é mbe njôane na: “Nne mvoñe bôte jôé ja ye bo ana.” 19 A mbe a yeme’e na nyule jé ébien é ntoo ane é ne ñwuan, (amu a mbe a ntoo bebé mimbu 100), a na Sara a mbe nkôkôm,* ve mbunane wé ô nji tek. 20 Ve amu ngaka’a Zambe, a nji sôô amu njembane mbunane ve a nga bo ngul a zene ya mbunan, a amu nalé a nga ve Zambe duma. 21 A mbe fe a too nya ndii na jôme Zambe a nga kak, a ne fe ngule ya bo je. 22 Nde, “jam éte é nga lañebane be nye ane zôsô.”

23 Bifia “jam éte é nga lañebane be nye” bi nji tilibane ve asu dé étam, 24 bi nga tilibane fe asu dangan, bia mame mete ma lañeban amu bia buni môt a nga wômôlô Tate wongane Yésus. 25 A nga vebane be bôte na be wôé nye asu bikobe biangan a a nga wômô miñwuane na bi loobane na bezôsô.