Kalate ôsu Jean a nga tili
5 Môt ase a buni na Yésus a ne Krist, nnye a ne mone Zambe, a môt ase a nye’e Ésa a nye’e fe mon. 2 Bia yeme na bia nye’e bone be Zambe éyoñe bia nye’e Zambe a tôñe metiñe mé. 3 Amu e nye’e Zambe a tinane na, bi tôñe metiñe mé; a metiñe mé me nji bo ayaé ya tôñ. 4 Amu nyu ase* a so be Zambe a dañeya émo ji. Mbunane wongane ñwô ô nga volô bia na bi dañ émo.
5 Za a ne dañ émo? Ke môt a buni na Yésus a ne Mona Zambe. 6 Yésus a nga so a zene ya mendim a zene ya metyi, a nji so ve a zene ya mendim étam, ve a nga so a zene ya mendim a zene ya metyi. Nsisime ñwô wo bo’olô de, amu nsisime wo kate benya mejôô.* 7 Amu biôme bilale bi mbie bia bo’olô de: 8 nsisim, mendim a metyi; bise bilale bi ne fe tyiñe jia.
9 Nge bia kañese jame bone be bôte ba jô, wôna jame Zambe a jô nde ñhe bia yiane dañe kañese. Zambe émien a kate bia na Yésus a ne Mone wé. 10 Môt a buni Mona Zambe a liti na nleme wé été, a kañeseya mame mese Zambe a nga ye’ele nye. Môt a nji buni Zambe, a jô na Zambe a ne nlaa minsos, amu a bene buni mame mese Zambe a nga jô a lat a Mone wé. 11 Jame bi nga yé’é é ne na, Zambe a nga ve bia ényiñe ya nnôm éto; a bia bi ényiñ éte a zene ya be Mone wé. 12 Môt ase a kañese Mon a bili ényiñe ji; nyu ase a bene kañese Mona Zambe a nji bi ényiñe ji.
13 Ma tili mia mame ma, mia mia buni atyi’i Mona Zambe, asu na mi yeme na mi bili ényiñe ya nnôm éto. 14 Ndi nleme bi bili mfa’a wé é ne na, jôm ése bia sili nye é wô’an a nkômbane wé a wô’ô bia. 15 A nge bia yeme na a wô’ô bia éyoñ ése bia sili nye mam, bia yeme fe na a ye ve bia mame mete, amu bia te sili nye me.
16 Nge môt éziñ a yene monyañe wé a bo’o nseme wo kee ki môt awu, môt ate a yiane ye’elane Zambe asu monyañe wé ate, a Zambe a ye ve nye ényiñ, amu a te bo nsem ô vo’o kee môt awu. Ve, avale nsem éziñe da kee môt awu. Me nji jô mia na mi ye’elane Zambe amu avale nsem éte. 17 Jam ése é ne ékotekot é ne nsem, ve avale nsem éziñe da kee ki môt awu.
18 Bia yeme na nyu ase a nga bialé be Zambe a nji bi fulu ya bo nsem, ve Mona Zambe* a ba’ale nye, jôme te nje mbia môt a vo’o jôé nye.* 19 Bia yeme na bia so be* Zambe, ve mbia môte nnye a jôé si nyu ése. 20 Bia yeme na Mona Zambe a nga so si va, a nga faé fe bia éfufup* asu na bi yeme nyu a ne zôsô. Bia wulu nsamba a nyu a ne zôsô, a zene ya be Mone wé Yésus Krist. Zambe ate nnye a ne nya Zambee a ényiñe ya nnôm éto. 21 A ayôme bongô, tabané ntyel a bengulemelan.