Mame minlôman

20 Éyoñ zô’é é nga tebe, Paul a nga loone beyé’é na be zu vôm a mbe, a éyoñ a maneya ve be ngule nyul, a nga ya’ane be a ke Macédoine. 2 Éyoñ a maneya ke bitisone bitisone ya wôé, na a ve bebuni ngule nyul a abui mejô a nga kate be, ane a nga ke Grèce. 3 A nga lôte ngon élale wôé, ve amu bejuif be nga bo émo’o na ba kômbô wôé nye éyoñ a mbe a kômbô’ô ke Syrie, ane a nga tyi’i na a bulane Macédoine. 4 Bôte be mbe nsamba a nye be mbe na: Sopater mone Pyrus ya Bérée, Aristarque a Secundus bôte ya Thessalonique, Gaïus ya Derbé, a Timothée a Tychique a Trophime ya ngoto ya Asie, 5 Befame bete be nga ke ôsu, a be mbe be yange’e bia Troas; 6 ve bia, bi nga dañ éfunga Philippes, éyoñ Abô’ô ya belet é ne te mvusu é maneya, bi nga ke koone be Troas mvuse melu metan, a tabe wôé melu zangbwal.

7 Môs ôsu ya sondô, éyoñe bi nga sulane na bi di vôme wua, Paul a nga taté na a kobô be, amu a mbe na a yiane ke môse wo tya’a valé; a nga ke ôsu a bo nkañete wé akekui zañ alu. 8 Abui belambe é mbe vôme bi mbe ntôkan, étune ya nda yôp. 9 Mone ndôman éziñ a too jôé na Eutyche a mbe a too vundu, a nté Paul a mbe a kobô’ô, a nga ke ôyo aval é mbe na, a nga koo nda yôp* a zu ku tyia, éyoñe be nga ke bete nye, a mbe a ntoo mbim. 10 Ve Paul a nga sise vôm a mbe a ku nye yôp a wubane nye a jô’ô na: “Jô’ané miñyôn, amu a vee.”* 11 Ane a nga bet a be’e belet a di, a nga ke ôsu a laan ôbe nté akekui ndibe tyé, ane a nga kôlô valé. 12 Ane be nga nyoñe mona fam a vee a be mbe mevak, a lôte nné.

13 Bi nga ke bet éfunga a ke Assos, vôme bi mbe na bia nyoñe Paul éfunga, éyoñ a nga mane bia kate na bi bo nalé, émien a mbe a kômbô’ô zu a mebo. 14 Éyoñ a zuya koone bia Assos, bi nga be’e nye éfunga, ane bi nga ke Mitylène. 15 Bi nga kôlô valé môs ô mbe ô tya’a valé, ane bi nga suane Chios, ve môs ôvok, bi nga ke Samos, a môs ôvok ô nga tôñe valé, bi nga suane Milet. 16 Paul a nga tyi’i na a lôte mfa’a ya mañe ya Éphèse, na a bo teke jañele éyoñe ngoto ya Asie, amu a mbe a kômbô’ô ji’a kui Jérusalem, éko éziñe môse beta abô’ô ya Pentecôte nge nalé a mbe ngule ya boban.

17 Ve éyoñe a mbe Milet, a nga lôme foé Éphèse na be ke loone bemvendé ya ékôane bekristen. 18 Éyoñe be nga suane vôm a mbe, a nga jô be na: “Mia kôme yem avale ntabane me mbe me bili éyoñe me mbe zañe jenan, éyoñ ôsu me nga suane ngoto ya Asie, 19 me bo’o Tate ésaé ane ôlo, a éjote nyul ése a milik a étibila’a éyoñe bejuif be mbe be jeñe’e na ba wôé ma, 20 ve nté ôte ôse, me nji dip anyu a bo te kate mia mame mese me ne mia mfi,* nge ye’ele mia bôt été, a menda menda. 21 Ve me nga kôme kañete bejuif a begrec ajô ya nkôñelane minleme be Zambe a mbunane be Tate wongane Yésus. 22 A éyoñe ji, mfa’a ya bo jame nsisime wo jô* ma na me bo, ma zu ke Jérusalem, akusa bo me nji yeme jame da ye kui ma wôé, 23 ane ô vaa na tison ése ma ke, mfufube nsisim a ju’u ba’alane ma na mimbôk a étibila’a bia yange ma. 24 Ve me nji yen ényiñe* jam ane jôme ja dañe mfi,* ma yi fo’o ve na, nge me ne mane mbile ma mate a ésaé Tate Yésus a nga ve ma na me jalé ésaé nkañetane mbamba foé ya beta mvame Zambe.

25 “A éyoñe ji, tama yenan! Ma yeme na teke môt éziñe ya bôte me nga kañete foé ya Éjôé Zambe, a ye beta yene ma. 26 Nde miabebiene mi ne ma bengaa môse wuna na, me ne te bijô mfa’a ya jam é ne kui bôte bese, 27 amu me nga mane mia kate nsôñane* Zambe ôse. 28 Taba’ané ntyel a miabebien a mbame mintômba ôse, ñwô ôte mfufube nsisim a nga telé mia betebele na, mi ba’ale ékôane Zambe, nje a nga kus a metyi me Mone wé. 29 Ma yeme na éyoñe ma ye kôlô va, beta bemvu mefane ba ye nyiine zañe jenan a ba ye ke ba’ale mintômba a nye’an ôse, 30 a zañe jenane miabebien, bôte ba ye tebe, a kobô mame me ne minsose na be dutu beyé’é na be tôñe be.

31 “Ajô te momba’ané, a ba’ale ôsimesane na, tañe mimbu milal, alu a môs, me nji si’ibi na ma bemene môt ase ya be mia a mili’i mis. 32 Éyoñe ji, ma li’i mia mo me Zambe a mejô ya beta mvame wé, mme me ne wônô mia, a ve mia éli’i be nga kômesan asu mimfufube mise. 33 Me nji kômbô argent, gôlôt, nge biyé bi môt éziñ. 34 Miabebiene mia yeme na, mo ma me nga saé na, me jalé miñyiane miam a mi mi bôte be mbe a ma. 35 Me nga liti mia mame mese na mia yiane saé a ngul aval éte na, mi su’u ba be ne minte’an, a mia yiane ba’ale mejô me Tate Yésus ma, émien a nga jô na: ‘Meva’a me ne abui be môt a ve, a lôte nyi a nyoñ.’”

36 A éyoñ a nga mane jô mame ma, bese be nga kute meboñe si a ye’elan. 37 Ane bese be nga bôé miñyôn a wubane Paul a nye’an ôse, 38 nlem ô nga bo be mbia mintaé éyoñ a nga jô be na ba ye ke beta yen asu dé. Nde be nga ke litane nye akekui sitima.