Kalate Paul a nga tili Beromain

1 Ma Paul, ôlo Yésus Krist, nnye a nga tobe ma na, me bo nlôman a kañete mbamba foé Zambe, 2 nnye ate a nga ka’ale bia melu mvus a zene ya bekulu mejô bé mimfufube mintilan. 3 A ne foé ja kobô ajô Mone wé, nnye ate a nga so mvoñe bôte David. 4 Da kôme yené na, a ne Mona Zambe, amu Zambe a nga belane ngule ya mfufube nsisime wé na a wômôlô nye miñwuan, ôwé Yésus Krist Tate wongan. 5 A zene jé, Zambe a nga liti bia beta mvame wé, Yésus a nga tobe ma na me bo nlômane mfa’a ya volô bôte bese ya meyoñe na be buni, be bo mewôk, a be ve éyolé jé ôlu’u. 6 Mia fe mi ne ayoñe da ya meyoñe me nga bi nloone* na me tôñe Yésus Krist. 7 Asu ba bese Zambe a nye’e be ne Rome, ba be nga loobane na be bo mimfufup:

Ngo’o nge beta mvame Zambe Ésa wongan, a mvo’é ja so be Zambe Ésa, a be Tate Yésus Krist bia tabe be mia.

8 Ma taté ve Zambe wom akiba a zene ya Yésus Krist, mfa’a wônan, amu ba kañete ajô ya mbunane wônane be bôte bese ya si. 9 Ma bo Zambe ésaé a nleme wom* ôse, éyoñe ma miase mbamba foé ajô ya Mone wé, a Zambe a yeme na, me ne te telé mfa’a ya kobô ajô denane meye’elane mam. 10 Ma ye’elane na me bo ngule ya kui wôé, nge nalé a ne boban, a nge nalé a ne nkômbane Zambe. 11 Ma kômbô fo’o yene mia na, me wônô mia mfa’a ya nsisim, ndembene mbunane wônane wo ye bo ngul; 12 nge ke na, bi veane ngule nyul, môt ase a va’a nyu mbo’o ngule nyul, mbunane wônan a énwom.

13 Ve, a bobejañ, me nji yi na mi dimine na, me nga jeñe na me zu wôé abui biyoñ, ve azukui éyoñe ji, mame méziñe me nga ndeñele ma na te ma zu kañete, a bo abui beyé’é wôé, avale fe ma bo meyoñe mevok. 14 Me bili mvôla mfa’a ya begrec a mfa’a ya bôte ya meyoñe mefe,* mfa’a ya ba be ne fek, a mfa’a ya ba be ne te fek; 15 nde me bili beta nkômbane ya kañete fe mia mbamba foé, mia bôte ya Rome. 16 Amu me nji wô’ô mbamba foé ôson, nya ajôô, a ne beta ngule Zambe a belane nye na, a nyii bôte be bili mbunan, ataté bejuif akui fe begrec. 17 Amu mbamba foé a liti zôsô Zambe a zene ya mbunan a amu mbunan; amu nalé é ne ntilane na: “Ve zôsôa môt a ye nyiñ amu mbunan.”

18 Zambe a liti ayaa dé é so’o yôp, mfa’a ya mbia be mame* bôte ba bo. Ba kamane bôte na be yeme benya mejôô. 19 Be nga kôme liti be jame be ne yeme mfa’a ya Zambe, Zambe a ne Nyu a nga kôme be de liti. 20 Bi ne yeme mefulu me Zambe me ne te yené, nge bia yé’é avale si é nga téban. Bi ne yem aval a ne, éyoñe bia fase biôm a nga té. Biôme bite bia liti na, a bili ngul é ne nnôm éto, a na a ne Zambe. Ajô te be nji bi éfia é ne kalé be. 21 Amu akusa bo be nga yeme Zambe, be nji ve nye duma ane Zambe, nge ve nye akiba. Asimesane dap é ne teke mfi a asu’u ya minleme miap é nga bo na be bo te kôme wôk atinan.* 22 Akusa bo be mbe be jô’ô na be ne fek, ve be nga bo mekut. 23 Be li’i ve Zambe a vo’o wu duma, be nga viane ve bive’ela bi bôte ba wu duma, fo’o ve ane bive’ela bi anon, a betite ba wulu a mebo menyin, a betite ba vutan a abum a ba ba ya’é.

24 Nde Zambe a nga jô’é be na, be jalé mbia minkômbane ya minleme miap a na be bo nyé mboone mam a menyule map. 25 Ba fole benya mejôô be Zambe a minsos. A ba kañ a saane jôme Zambe a nga té, a lôte na be bo de Nté biôm émien, nnye a yian ékaña’a nnôm éto a nnôm éto. Amen. 26 Ajô te Zambe a nga jô’é na, mbia minkômbane miap ya bisô’ô mi jôé be. Binga bap be nga tyendé avale be nga tébane na, ba yiane ke binoñ a befam a taté na ba bo aval é nji yian. 27 Avale te da, befame be nga jô’é avale be nga tébane na, be ke binoñ a binga a be nga dañe jaé a nkômbane ya ke binoñ a befame bevok. Be bo’o mame me ne nyé be be, ve ba ye bi fonose ja yiane mbia mboone wop.

28 Amu be nji simesane na, é ne mfi na be yeme Zambe. Zambe fe a nga jô’é na mbia be asimesane be jôé be, a na be ke ôsu a bo mame be nji yiane bo. 29 Avale bôt éte, é mbe njalan a aval ékotekot ése, mbia be mam, ôzañ akum a mbia mboon.* Be ne njalan a éviele, mewôé me bôt, mendum,* minsos, ziñ,* be too fe ékobôkobô,* 30 ba kobô bôte bevok abé, ba vini Zambe, be ne ébiasé,* be ntoo mebun, be bete’e fe bebiene yôp, ba kômesane na be bo mbia be mam, ba biasé fe bebiaé bap, 31 be ne teke fek, a teke tôé bengaka’a bap,* ba nye’e ki bôte bevok,* nge mvamane be. 32 Ba kôme yeme na Zambe a jô na bôte ba bo avale mam éte ba yian awu. Nge ô vaa na, bebiene ba ke ôsu a bo mame mete, ve ba ndôñelô fe ba ba ke ôsu a bo me.