Mbamba foé Jean a nga tili
10 “Ma bele fo’o ane ma jô mia na, nyu a nji nyiin abemba mintômba été a lôte’e mbé, ve a viane lôte zene fe, môt ate a ne ñwuwup a mbu’u menda. 2 Ve nyu a lôte mbé a ne mba’ale mintômba. 3 Mba’ale mbé a yoé nye mbé, a mintômba mia vô’ôlô tyiñe jé. A loone ntômba wé ôse a éyôlé jé, a kee mie nseñ. 4 Éyoñ a maneya kuli émié mise nseñ, a tebe mie ôsu a mintômba mia tôñe nye, amu mia yeme tyiñe jé. 5 Mia ye ke tôñe nneñ a zen éziñ, ve mia ye tube nye amu mi nji yeme tyiñe beyeñ.” 6 Yésus a nga nyoñe be éve’ane ji, ve be nji wô’ô jam a mbe a jô’ô be.
7 Nde Yésus a nga beta jô na: “Ma bele fo’o ane ma jô mia na: Me ne mbé asu mintômba. 8 E ba bese be nga zu señe jame be ne miñwuwup a bebu’u menda; ve mintômba mi nji vô’ôlô be. 9 Me ne mbé, nyu ase a zu be ma na, a nyiin abemba, a ye nyiñ a nyili ate, a ye nyiin abemba été a kui nseñ a yene jôme ya di. 10 Ñwuwube wo so ve na ô wup a wôé a tyam. Me nga so na, mi bi ényiñ a bu’ubane je. 11 Me ne mbamba mba’ale mintômba; mbamba mba’ale mintômba a ve ényiñe* jé asu mintômba. 12 É ne été na, a ne fo’o ve mba’ale mintômba ba ya’an, a a nji tyelé nleme yôp asu mintômba. Éyoñ a yene beta mvu afan a za’ak, a tup, a li’i mintômba, a beta mvu afan a mane bi mie, a tyamelane mie 13 amu a nji nyoñe ngap a mintômba. 14 Me ne mbamba mba’ale mintômba. Ma yeme mintômba miam, a mintômba miame mia yeme ma, 15 fo’o ve aval Ésa wom a yeme ma a ma yem Ésa wom; a ma ve ényiñe* jam asu mintômba.
16 “A me bili mintômba mife mi nji bo abemba di, mili mite fe, ma yiane zu mie été, a mia ye vô’ôlô tyiñe jam a mia ye bo mbame wua a bi mba’ale wua. 17 Ajô te nde Ésa wom a nye’e ma, amu ma ve ényiñe jam, ndembene me ne beta bi je. 18 Teke môt a vaa ma je, ve ma ve je a ntyi’ane wome mamien. Me bili ngule ya ve je a me bili ngule ya beta bi je. Atiñe di, me nga nyoñe de be Ésa wom.”
19 Bejuif be nga beta kandane mengam amu mejô ma. 20 Abui ya be be é mbe é jô’ô na: “Mbia nsisim a jôé nye, nde fe a ne akut, amu jé mia vô’ôlô nye?” 21 Bevo’o be nga jô na: “Nyuna a nji bo mejô me môte mbia nsisim a jôé nye. Mbia nsisim a vo’o ki yoé bôte be ne ndime mis, sa nalé?”
22 E melu mete, Abô’ô ya môse be nga ve Zambe Temple é nga bobane Jérusalem. A mbe éyoñ avep é mbe nya ngulu, 23 a Yésus a mbe a wulu’u Temple mbala’a si Salomon. 24 Ane bejuif be nga bômane nye a taté na ba jô nye na: “Nté ôvé wo ye tyelé bia minleme* yôp? Nge ô ne Krist, kate’e bia de bôsa.” 25 Yésus a nga yalane be na: “Me kateya mia ve mi nji buni. Ve mame ma bo e jôé Ésa wome ma bo’olô ajô dam. 26 Ve mi nji buni amu mi nji bo mintômba miam. 27 Mintômba miame mia vô’ôlô tyiñe jam a ma yeme mie, a mia tôñe ma. 28 Ma ve mie ényiñe ya nnôm éto, a teke môs éziñe mia ye jañ a zen éziñ, a teke môt a ye wôlé ma mie mo. 29 Mintômba Ésa wom a nga ve ma, mi ne dia abui, a teke môt éziñ a ne wôlé mie mo me Ésa wom. 30 Bia Ésa wom, bi ne jôme jia.”*
31 Ane bejuif be nga beta to’é meko’o na ba lume nye. 32 Yésus a nga sili be na: “Ma te mia bo abui mbamba be mame be so’o be Ésa wom. Jam avé mia lume ma de mekok?” 33 Bejuif be nga yalane nye na: “Bia lume wo mekok, sa ke amu mbamba jame ve, amu ébiasé;* amu wo, ô kusa bo môta binam, wo jô womiene na ô ntoo zambe.” 34 Yésus a nga yalane be na: “Ye é nji bo ntilane Metiñe me Moïse a nga ve mia na, ‘Me nga jô na: “Mi ne bezambe”’?* 35 Nge a nga loone na, ‘bezambe’ bôte mejô me Zambe me nga liti na be mbe be bili mekua, ve mintilane mi se ngule ya bo momo, 36 ye mia jô ma, ma Ésa wom a nga fubu a lôme si nyu na, ‘Wo biasé Zambe,’ amu ma te jô mia na, ‘Me ne Mona Zambe’? 37 Nge me nji bo mam Ésa wom a yi na me bo, te mia buni ma. 38 Ve nge ma bo me, to’o mi nji buni ma, buna’ané mame ma bo, ndembene mi ne yem a ke ôsu a yeme na Ésa wom a ne a ma, a na me ne a Ésa wom.” 39 Nde be nga beta jeñe na ba bi nye, ve a nga solane be mo.
40 A nga beta ke e Jourdain yat, vôme Jean a nga taté na a du bôt, a tabe wôé. 41 A abui bôt é nga zu be nye a taté na da jô na: “Jean a nji bo ve asimba da, ve mame mese Jean a nga jô mfa’a môte nyi, me mbe fo’o été.” 42 A abui bôt é nga buni nye vôm ate.