Kalate Jude a nga tili

1 Jude, ôlo Yésus Krist, ve monyañe Jacques; ma tili mintoban, bôte be Zambe, Ésa wongan a nye’e, ba a nga ba’ale asu Yésus Krist:

2 Mvam a mvo’é a nye’ane bi kele’e ôsu a nene be mia.

3 A bôte ma nye’e, me nga kômbô tili mia ajô ya nyiiane wongane bia bese, ve ma te yene mvaé ya tili mia mfa’a ya liti mia mfi ya ve ngule jenan ése asu na, mi ba’ale mbunan ô nga vebane be bôte Zambe a nga top, éyoñe jia ya biyoñe bise. 4 Ma tili mia amu bôte béziñe be nga nyiine zañe jenan, mbe bete Mintilane mi nga kobô ajô dap melu mvuse na ba ye bi mekua, amu ba belane beta mvame Zambe ane atyebe ya bo mvite mame teke wô’ô nyé nge ôson,* a ba liti a mimboone miap na Yésus Krist, masa wongan, a nji bo Tate wop.

5 Akusa bo mia kôme yeme mame mete mese, ma kômbô ba’alane mia na Yéhôva* a nga nyii bebo bisaé bé si ya Égypte, mvuse ya valé, a nga su’ulane jiane ba bese be nji buni nye. 6 Wôna, Zambe a nga wua beéngele béziñ édo’o dibi été, nté ba yange ntyi’ane mejô ya beta môse wé, amu be nji ba’ale été jap ya ôsusua, a kôlô vôme ba yiane nyiñ. 7 Avale te fe, Zambe a nga jiane bôte ya Sodome a Gomorrhe, a bitisone ya mefefel a zene ya beta nduan ya nnôm éto, amu be nga bo mvite mame ya bisôk,* a tôñe mbia minkômbane miap ya minsôn; jam é nga kui be da ve bia beta abendé.

8 Akusa bo nalé, bôte bete ba fase fe ve mbia be mam, ba bo mvite mame ya bisôk a tindi bôte befe na be vu be, ba biasé bôte be tele be ôsu, ba kobô fe mimfufup abé. 9 Ve éyoñe Michel, njôô beéngele* ba Diable be nga bi mejô amu be mbe be suñe’e mbime Moïse, a nji ve’ele tyi’i nye ajô a bela’ane mbia bifia, a nga jô nye ve na: “Yéhôva* émien a komeka’ane wo.” 10 Ve mame mese bôte bete be nji tu’a wôk, ba kobô me abé. Mame ke ba tu’a wôk, mme ma yale be fé, amu ba bo me teke fas ane betite ya afan.

11 A ne fo’o mbia jam asu dap! Amu be nga tôñe zene Caïn, be nga ji’a fe vu ôzañ akume Balaam, jôme te nje be nga wu, amu be nga tôñe Coré éngana’a jé. 12 Bôte bete, be ne ane beta meko’o be solô mendime si, éyoñe mia bo mebôk a bobenyoñ, beba’ale mintômba ba toñe ve bebiene teke ko woñ. Minkute mi ne teke mendim, mmie mfebe a wo’otô li a li, bilé bi ne teke wume bibuma éyoñe ja yian, bi maneya kôt,* teke fe minkañ. 13 Mintyôa mi mañe mia zu wua mame ma wo’o be ôsone kindik, ane ateté é nji bi ngume zene ya tôñ, jame da yange be é ne ve dibi ya nnôm éto.

14 Ôwé, Hénok fe, môte zangbwale ya mvoñe bôt Adam a nga kulu ajô. A nga kobô ajô dap na: “Tama yenan! Yéhôva* a zu a bizu’u* beéngele bié 15 na a zu tyi’i bôte bese mejô. A ve fe bôte bese be nji ko Zambe woñe mekua a lat a mbia be mame bese be nga bo, a mame mese mbia bebo minseme bete be nga jô nye ma bo nyi’i melo.”

16 Bôte bete ba kobô menyiñ éyoñ ése, ba tatan amu be nji nye’e fatan ényiñe jap, ba tôñe minkômbane ya minsône miap, ba bo éngelezek a menyu map, ba wumulu bôt* amu ba sôñe jôm éziñe be be.

17 Ve mia, a bôte ma nye’e, te mia vuane mame minlômane mi Tate Yésus Krist mi nga jô,* 18 mi nga ba’alane mia na: “Éyoñe ya asu’ulan, bôte ba ye bo bekpwe’ele bôt, ba ye tôñe minkômbane ya minsône miap a bo mame Zambe a vini.” 19 Bôte bete ba nye’e nkanda’ane mengam, ba bo mam ane betite ya afan,* be nji tôñe zene nsisime Zambe wo liti be. 20 Ve mia, a bôte ma nye’e, yemeta’ané mbunane wônan ô ne nya étyii, mi ye’elane fe a mfufube nsisim, 21 asu na mi ba’ale miabebiene nye’ane Zambe été, nté mia yange nkoon éngôngole Yésus Krist, Tate wongan, a ényiñe ya nnôm éto melu ma zu. 22 Nde fe, kelané ôsu a liti bôte be bili bisô nleme na mia wô’ô be mintaé;* 23 kôta’ané be, mi vaa be zene ya njañan* été. Ve kelané ôsu a liti bôte bevo’o na mia wô’ô be mintaé,* mi bo’o de a woñ; nté mia bo de, mia yiane ñhe vini mbia mboone wop.

24 Zambe a ne ngule ya ba’ale mia, a volô mia na mi bo teke kolé ôbak, asu na mi yeme ne zeñ a jaé a mevak, teke bijô mise mé, amu a ne Zambe a ne étôtok. 25 Duma, étôtok, ngul a éjôé bi bo’o be Zambe, nnye étam a ne Nyii wongan a zene ya be Yésus Krist Tate wongane nnôm éto a nnôm éto. Amen.