Kalate ôsu Jean a nga tili
3 Tama yenan abim Ésa a nga nye’e bia, amu a nga kañese na bi loobane na bone be Zambe. Bi ne fo’o bone be Zambe! Jôme te nje si nyu é nji yeme bia, amu é nji yé’é yeme nye. 2 A bôte ma nye’e, bi ntoo bone be Zambe, ve bi ngenane teke yem avale bia ye bo melu ma zu. Jame bia yem é ne na, éyoñe bia ye ke wôé, bia ye yene Zambe a bi nyul é ne ane énjé. 3 Nde fe, môt ase a bili ndi nlem éte a tun* émien, fo’o ve ane Yésus émien a ne étyi.
4 Môt ase a ke ôsu a bo nsem a tyame metiñ, amu nsem ôbien ô ne ntyamane metiñ. 5 Mia yeme fe na, Yésus a nga zu vaa minseme miangan, a émien a nji bo nsem éziñ. 6 Môt ase a ke ôsu a kabetane nye a nji bi fulu ya bo minsem; môt ase a bili fulu ya bo minsem a ngenane teke yene nye, nge ke yeme nye. 7 A ayôme bongô, te mia jô’é na môt a du’u mia; môt a bo mame me ne zôsô nnye a ne zôsôa môt, fo’o ve ane Yésus émien a ne zôsô. 8 Môt a ke ôsu a bo minsem a so be Diable, amu Diable a bo minsem aso atata’a.* Jôme te nje, Mona Zambe a nga zu asu na a zu tyame mimboone mi mame mi Diable.
9 Môt ase a nga bialé be Zambe a nji bi fulu ya bo nsem, amu mvoñe bôte Zambe é ne be nye, môt ate a vo’o ki bi fulu ya bo nsem, amu a nga bialé be Zambe. 10 Nsela’ane a ne zañe bone be Zambe a ba be Diable nnye nyi: Môt ase a bo ki mame me ne zôsô a nji bo mone Zambe. Môt ase a vini monyañe wé, a nji bo mone Zambe. 11 Foé mi nga wôk aso atata’a nje nyi: Bia yiane nye’esan, wua a nye’e nyu mbok. 12 Bi nji yiane vu Caïn, nnye a mbe mone mbia môt, nde a nga wôé monyañe wé. Amu jé a nga wôé nye? Amu mam a mbe a bo’o me mbe abé, ma me monyañe wé ke me too zôsô.
13 A bobejañ, te mia kam éyoñ émo ja vini mia. 14 Bia yeme na bi mbe mimbim, ve mbôle bia nye’e bobejañ, bi nga nyiñ. Môt a nji nye’e a ngenane mbim. 15 Môt ase a vini monyañ a ne ñwôé bôt, mia ke mia kôme yeme na, teke ñwôé bôt éziñ a ye bi ényiñe ya nnôm éto. 16 Bi nga yeme jôm é ne nye’an amu Yésus a nga ve ényiñe* jé asu dangan, ajô te, bi ne ntindane ya ve binyiñe* biangan asu bobejañ. 17 Ve nge môt a bili biôme bi mo* a lôô monyañe wé a yiik mvolan, ve teke mvamane nye, aval avé a ne jô na a nye’e Zambe? 18 A ayôme bongô, bi nji yiane nye’e ve a biyaé bi anyu, bia yiane liti de a mimboon a benya mejôô.
19 Jame di nde da ye yemete bia na bi ne benya mejôô été, a na Zambe a nye’e bia, 20 nge da kui na nleme wongane wo ve bia mekua mfa’a éziñ, bi nji yiane vuane na Zambe a dañe nleme wongan, nde fe, a yeme mame mese. 21 A bôte ma nye’e, nge nleme wongan ô nji ve bia mekua mfa’a éziñ, bi ne ñhe ye’elane Zambe teke ko jôm éziñe woñ. 22 Nde fe mbôle bia tôñe metiñe mé, a mbôle bia bo mam a nye’e, a ye ve bia jôm ése bi ne sili nye. 23 Atiñe dé é ne na, bi buni jôé Mone wé Yésus Krist a nye’esan, fo’o ve aval a nga jô bia na bi bo. 24 Nde fe na, môt a tôñe metiñe me Zambe nnye a wulu ba’aba’a a nye, a Zambe fe a ye kabetane môt ate. Mfufube nsisim a nga ve bia a bo na bi yeme na bia be nye bi ne nlatan.