Kalate ôsu Pierre a nga tili

4 Mbôle Krist a nga tôbane minju’u minsôn été, mia fe taba’ané nkômesane ya bi aval été nsisime da;* amu môt a nga tôbane minju’u minsôn été a nji beta bi fulu ya bo minsem, 2 ndemben a ne nyiñ abim éyoñ é li’iya nye na a nyiñe minsôn été, sa ke na a beta bo minkômbane mi bôt, ve na a bo nkômbane Zambe. 3 Amu mi lôteya abui éyoñe na mia bo nkômbane ya meyoñ, éyoñe mi mbe mi bo’o mimboone ya mvite mame teke wô’ô nyé nge ôson,* mi jalé’é mame ya bisôk aval é nji yian, mi nya’a meyok a lôte nné, mi bo’o mbia mebôk,* mi viba’ane bilam a kañe bengulemelan. 4 Be ne fe’e ne vema amu mia ke ki fe ôsu a dumban a be mvit ényiñe ba nyiñ, jôme te nje ba kôbô mia abé. 5 Ve, bôte bete ba ye yalane mame be nga bo be nyu a ne nkômesane ya tyi’i bevevee a miñwuane mejô. 6 E nya ajôô, jôme te nje mbamba foé a yiane katebane fe be miñwuan, ndemben, akusa bo be biya ntyi’ane mejô minsôn été e mise me bôt, be ne nyiñ avale da wô’an a nsisime mise me Zambe.

7 Ve, memane ya mame mese me ntoo bebé. Ajô te, bo’ané fek a ye’elane kom ése.* 8 Jame da dañe mame mese é ne na, môt ase a nye’e nyu mbo’o nya nye’ane, amu nye’ane wo buti abui minsem. 9 Bo’ané anyep, ve teke kobô menyiñ. 10 Abime mveane môt ase a nga bi, a bela’ane de mfa’a ya volô môte mbok, aval ane mbamba ntebele beta mvame Zambe, nnye ate a yené mevale meval. 11 Nge môt éziñ a kobô, a kobô’ô na a kate mejô ma so be Zambe; nge môt éziñ a bo ésaé, a bo’o je a ngule ja so nye be Zambe; ndembene mame mese, Zambe a ne bi duma a zene ya be Yésus Krist. Duma a ngule bi ne émbié nnôm éto a nnôm éto. Amen.

12 A bobejañe ma nye’e, te mia bo fe’e ne vema mfa’a ya minju’u mia tôbane mie, fo’o ve ane éyeye’ane jame da kui be mia. 13 Ve, mbôle mia fe mia tôbane minju’u nsamba a Krist, mia yiane ke ôsu a vak, ndemben éyoñe duma dé da ye yené, mi ne vak, a dañe bo mevak. 14 Nge mia bi minkomekan* amu jôé Krist mi ne mevak, amu nsisime ya duma, ôwé, nsisime Zambe ô ne be mia.

15 Ve, môt éziñe ya be mia a bo’o te tôbane minjuk amu a ne ñwôé bôt, nge ke ñwuwup, nge ke mbo mbia be mam, nge ke môt a futi anyu éza mam. 16 Ve nge môt a tôbane minjuk, amu a ne kristen, a bo’o te wôk ôson, ve a kele’e ôsu a ve Zambe duma nté a be’e jôé dé. 17 Amu éyoñ é kpwaaneya na ntyi’ane mejô ô taté nda Zambe. Éyoñe ji, nge wo taté be bia, jé ja ye bobane mfa’a ya bôte ba bo mbamba foé Zambe melo? 18 “A nge da ye bo ayaé na zôsôa môt a nyiiban, da ye ñhe ke bo aya be môt a biasé Zambe a be nyu a ne mbo minsem?” 19 Ajô te nde, bôte ba tôbane minjuk amu ba bo nkômbane Zambe, be kele’e ôsu a bo mbamba be mam a bôé bebiene* mo me Nté biôme bise, nnye ate a ne te laane minsos.