Mbamba foé Matthieu a nga tili
3 A nga bo na, melu Jean Baptiste a mbe a kañete’e bôte nkôte si ya Judée, 2 a jô’ô na: “Kôñela’ané minlem, amu Éjôé ya yôp é ntoo bebé.” 3 Môt ate nnye nkulu mejô Ésaïe a nga jô nye na: “Tyiñe ja so nkôte si: ‘Kômané Yéhôva* zen! Sôané mezene mé.’” 4 Jean a mbe a be’e ngômesan é too a mimvote mi chameau,* a be’e kandé ékôp angeteñ. A mbe a ja’a bitandak a wôé wo so afan. 5 Ane bôte bese ya Jérusalem a Judée ase, a mesi mese me ne fefele Jourdain be nga taté na ba ke be nye, 6 ane Jean a nga du* be ôsôé Jourdain été, be nga meme fe minseme miap bôt été.
7 Éyoñ a nga yen abui bepharisien a besadducéen be za’a duban, nde a nga sili be na: “Mia mvoñe mekpwe, za a nga lebe mia na mi tube mbia ayaa a zu? 8 Bo’ané ñhe mame ma liti na mi kôñelaneya minlem. 9 Te mia ve’ele jô miabebiene na, ‘Bi bili ésa wongan Abraham.’ Amu ma kate mia na, Zambe a ne ngule ya bo na meko’o ma me veñesane bone be Abraham. 10 Ôvôn ô mbôô tine bilé. Ba ye ba’é élé ése é nji wume mbamba bibuma a wua je nduan été. 11 Mfa’a wom, ma du mia mendim été, ve môt a ye so mvuse jame nnye a dañe ma, me nji yiane vaa nye besilefase minkole mebo. A ye du mia a mfufube nsisim a nduan. 12 A mbili ése’ese jé e mo, a ye mane fubu vôme ba bôme blé, a ye ba’ale blé nda ba ba’ale bidi, ve a ye di’i bivua nduane môt éziñ a vo’o ki dim.”
13 Nde Yésus a nga suane Jourdain a so’o Galilée na a ke be Jean, na a du nye. 14 Ve Jean a nga kam a jô nye na: “Ke wo wo yiane du ma, amu jé wo jô ma na me du wo?” 15 Yésus a nga yalane nye na: “Tame jô’é na nalé a bobane den, amu a zen éte, bia ye bo mame mese me ne zôsô.” Ane a nga jô’é, teke fe beta kamane nye. 16 Éyoñ a maneya duban, Yésus a nga vame mendime yôp, yôbe ve yombô, ane a nga yene nsisime Zambe ô so’o yôp, aval ane zum, ô za’a be nye. 17 Nde tyiñ é nga so yôp é jô’ô na: “Mone wome nyu, ma nye’e nye, ma wô’ô nye mvaé.”