Mbamba foé Matthieu a nga tili

17 Éyoñe melu mesamane me lôteya, Yésus a nga nyoñe fo’o ve Pierre, Jacques a Jean monyañe wé a kee be beta nkôle yôp. 2 Nde Yésus a nga veñesane be mis été; asu dé é nga taté na da faé ane nlô jôbô, biyé bié ya yôbe ki bi nga taté na bia faé* ane éfufup. 3 E teme na, Moïse ba Élie be tele valé be laan a nye. 4 Nde Pierre a nga jô Yésus na: “A Tate, a ne mvo’é amu bi ne va. Kañese’e na me lôñe menda bindelé melal, jia asu dôé, jia asu Moïse a jia asu Élie.” 5 A ngenan a kobô’ô, nde beta nkut a faék abui a nga bômane be, ane tyiñ é nga so nkut été é jô’ô na: “Mone wome nyu, ma nye’e nye, ma wô’ô nye mvaé. Vô’ôlané nye.” 6 Éyoñe be nga wô’ô nalé, beyé’é be nga kute meboñe si a ko mbia woñ. 7 Ane Yésus a nga subu be bebé a nambe be, a jô be na: “Teba’ané tetele, te koone woñ.” 8 Éyoñe be nga bete mis, be nji yene môte mfe ve Yésus. 9 Éyoñe be mbe be siliki’i nkôl, nde Yésus a nga ve be abendé na: “Te mia kate môte jame mia te yen akekui Mona môt a ye wômô miñwuan.”

10 Ve beyé’é bé be nga sili nye na: “Amu jé bescribe ba jô na, Élie a yiane taté so?” 11 A nga yalane be na: “Élie a yiane fo’o so, na a zu kôme mame mese avale me mbe ôsusua. 12 Ve, ma kate mia na Élie a soya, ve be nji yeme nye, a be nga bo nye jôm ése be nga kômbô bo nye. Avale te fe, Mona môt a zu tôbane minju’u mo map.” 13 Ane beyé’é be nga yeme na, a kobô ajô Jean Baptiste.

14 Éyoñe be nga kui vôme nsamba bôt ô mbe, nde môt éziñ a nga subu nye bebé a kute meboñe si ôsu wé a jô na: 15 “A Tate, mvama’ane mone wom amu a ku ésesé, a ne fe mbia nkôkon. Biyoñe biziñ a wô’ô ku nduan été, biyoñe biziñe ki mendim été. 16 Ma te kee nye be beyé’é bôé, ve be nji kui na be saé nye.” 17 Yésus a nga jô be na: “A miaé bôt ô ne teke mbunan, ma ye ke ôsu a nyiñ a mia akekui éyoñ évé? Ma ye ke ôsu a jibi mia akekui éyoñ évé? Za’ané nye va.” 18 Nde Yésus a nga komekane mbia nsisim, ane a nga kôlô mona fame nyul, ane a nga bo mvo’é awolo éte ébien. 19 Ane beyé’é be nga koone Yésus vôm a mbe étam, ane be nga sili nye na: “Amu jé bia te kate vaa wô?” 20 Nde a nga jô be na: “Amu mbunane wônan ô ne tyôtyoé. Ma kate fo’o mia na, nge mbunane wônan ô ne abim ane fese moutarde,* wôna mia ye jô nkôle wu na, ‘Kôlô’ô va ô ke li,’ a wo ye kôlô, teke jôm éziñe ja ye kate mia.” 21 *——

22 A mbe éyoñe be mbe ntôkane vôme wua Galilée, nje Yésus a nga jô beyé’é bé na: “Mona môt a zu koñebane mo me bôt, 23 a ba ye wôé nye, alu lale a ye wômô.” Jam éte é nga bo na be wô’ô nleme mbia mintaé.

24 Éyoñe be nga kui Capernaüm, bôte ba nyoñe bedrachme bebaé* be nga zu yene Pierre a sili nye na: “Ye ñye’ele wônan a ne étyi te ya’ane toya ya Temple? 25 Nde a nga yalane be na: “A ya’an.” Ve éyoñe be nga nyiine nda été, nde Yésus a nga taté nkobô a sili Pierre na: “A Simon, wo simesan aya? Beza ba ya’ane bejô bôte ya si nyu moné nge ke toya,* ye bone bap ye bôte befe?” 26 Éyoñ a nga yalane na: “Bôte befe,” ane Yésus a nga jô nye na: “Ôwé, bone be njô bôte ba yiane ki ya’ane toya. 27 Ve mfa’a ya na, bi bo te bo na be wôk ôlun,* kele’e mañ, ô wua nnop, kos ôsu wo ye taté bi, yo’é je anyu, wo ye koone nsañe moné* été, nyoñe wô ô ke ya’ane toya asu bia wo.”