Kalate ôsu Paul a nga tili Timothée

2 Di ôsu, ma jô mia bese na mi bo meye’elane me nja’an, meye’elan asu bôte bevok, meye’elane ya ve akiba asu kane bôt ése, 2 asu bejô bôt a ba bese be bili beta bito,* ndembene bi ne ke ôsu a nyiñe mvo’é a évôvoé été, bi kañe’e Zambe a nlem ôse a éjijin été. 3 Jam éte é ne mvaé a abeñe mise me Zambe, Nkôté wongan, 4 nnye nkômban ô ne na, kane bôt ése é nyiiban a bi nya ñyemane ya benya mejôô. 5 Amu Zambe a ne wua a ntebe zañe wua a ne ézezañe Zambe a bôt, môte wua, Krist Yésus, 6 nnye a nga ve émien ane ntañe wo yian asu bese,* jam éte é ne di da yiane na be tu’a yemete de mbamba éyoñ. 7 A ne asu ésaé nkañete éte, nje be nga telé ma nkañete mbamba foé a nlôman, ma kañete benya mejôô, me nji laane minsos, me ne ñye’ele ya meyoñe mfa’a ya ajô mbunan a benya mejôô.

8 Nde ma yi na vôm ase, bôte be ke ôsu a ye’elan, be bete’e mo me ne te bijô yôp, teke ôlune nge bensañeta’ane. 9 Avale te da da, binga ba yiane kôme bebien a biyé bi bôô be nyul abeñ,* bi too éjijin a ésemé,* sa ke a mimfen a gôlôt a beperle nge ke biyé bi ne dia abui, 10 ve ba yiane kôme bebien avale da yiane binga ba jô na ba kañe Zambe, nalé ate a ne na, a zene ya mbamba be mame ba bo.

11 Binga be yeké’é be too bivôl* a be sili’i bebiene si éjôé. 12 Me nji kañese na minga a ye’ele nge jôé fam, ve a yiane tabe évôl.* 13 Amu Adam nnye a nga taté kômban, mvuse ya valé Ève. 14 Nde fe, Adam a nji du’uban, ve minga a nga du’ubane nya ndu’ubane a a nga bo ntyame metiñ. 15 Ve, minga* a ye nyiiban a zene ya abiaé vengevenge ve a ke ôsu a ba’ale mbunan a nye’an a mfuban a mbamba mfasan.*