Mame minlôman
17 Ane be nga tyi’ilan Amphipolis a Apollonie a suane Thessalonique, vôme synagogue bejuif a mbe. 2 Aval a mbe a jaé zu a bo, Paul a nga ke koone be synagogue été a besabbat belal, a nga jeñe na a volô be na be wô’ô Mimfufube mintilan, 3 a nga kate be na é mbe é sili’i na Krist a tôbane minjuk a wômô miñwuan, a nga lañe fe be abui bifus a jô’ô na: “Yésus ma kañete mia, nnye a ne Krist.” 4 Jam é nga su’ulan é mbe na, bôte béziñe ya bebe, be nga bo bebuni a yeñ a Paul ba Silas, nde fe abui begrec é mbe é kañe Zambe é nga bo nalé a abui mimfañe mi binga.
5 Ve bejuif njalan a éviele, be nga tôkane mbia be bôte béziñe be mbe be kele’e ba wulu nseñe makite teke jôme ya bo, a bo beta nsamba, ane be nga tindi be na be bo beta zô’é tison éte, be nga ke bu’u mbé ya nda Jason, be jeñe’e Paul a Silas na be zuu be vôme beta nsamba bôt a mbe. 6 Éyoñe be nji koone be, be nga bi Jason a bobejañe béziñe ya tison, a kee be be betebe ôsu be jô’ô na: “Bôte ba, mbe ba bo na jo’ojo’o a* bobane be bôte bese ya si, be suaneya fe va, 7 be ne beyeñe be Jason. Bôte bete bese ba bene tôñe metiñe me César, ba jô na be bili njô bôte mfe nnye a ne Yésus.” 8 Éyoñe nsamba bôt a betebe ôsu ya tisone be nga wô’ô mame mete, be nga wô’ô mbia ôlun; 9 éyoñe Jason a bobejañe be nga mane ya’ane tañe moné betebe ôsu be nga tyi’i na ba yiane ya’an, ane be nga suu be.
10 Alu éte ébien, teke yange, bobejañe be nga jô Paul ba Barnabas na be ke Bérée. Éyoñe be nga suane wôé, be nga ke synagogue bejuif. 11 Bôte ya wôé be mbe be bili nkômbane ya yé’é a lôte ba ya Thessalonique, amu be nga ji’a kañese mejô me Zambe, be vunu’u Mintilane môs ane môs, na be yen, nge mame be nga wô’ô me ne été. 12 Nde, abui ya be be é nga bo bebuni, a beta mimfañe mi binga begrec, a befame béziñe fe be nga buni. 13 Ve éyoñe bejuif be mbe Thessalonique be nga wô’ô na Paul a kañete mejô me Zambe Bérée, be nga ke wôé a tindi bôte na be bo zô’é. 14 Été été, bobejañe be nga jô Paul na a siliki mfa’a ya mañ, ve Silas ba Timothée be nga li’i wôé. 15 Ve bôte be nga ke litane Paul, be nga wulu a nye akekui Athènes, ane be nga bulan, be bili Silas ba Timothée foé na ba yiane ji’a ke koone Paul.
16 Nté Paul a mbe a yange’e be Athènes, nlem* ô nga taé nye, amu a nga yene na tison é mbe njalan a bengulemelan. 17 Nde a nga taté na a laane synagogue a bejuif a bôte bevo’o be mbe valé, na ba zu kañe Zambe. Môs ôse, e makit, a mbe a la’an a bôte be mbe valé. 18 Ve beépicurien* a bestoïcien* be nga taté na ba sañetan a nye be jô’ô na: “Jé mfôfobe môte wu wo kômbô jô?” Bevo’o ke be jô’ô na: “A ne ve ane a kañete ajô ya bezambe bi ne te yem.” Be nga jô nalé amu a mbe a kañete’e mbamba foé ya ajô Yésus, a ajô ya ñwômane miñwuan. 19 Ane be nga bi nye a kee nye Aréopage be jô’ô nye na: “Ye ô ne bia kat atinane ya mfefé ñye’elane wo ve wu? 20 Amu wo kobô bia mame me ne bia éyeya’ane melo, a bia yi na ô kome bia me timin.” 21 Nde fe bôte bese ya Athènes a beyeñ, be mbe be bili fulu ya lôt éyoñe teke bo jôm éziñe ve na, ba kobô nge wô’ô mimfefé mi mam. 22 Paul a nga tebe ézezañ Aréopage a jô na:
“A bôte ya Athènes, ma yene fo’o na mame mese, mia mia dañe ko bezambe woñ a lôte bôte bevok. 23 Éve’an é ne na, nté me mbe me wulu’u a kôme ke ma fombô biôme mia kañ, me nga yene fe autel a too ntilane na, ‘Autel a ne asu Zambe bi nji yem.’ Nde jôme mia kañe teke yem, nje ma kañete mia. 24 Zambe a nga té si nyu a biôme bise bi ne été, nnye a ne Tate ya yôp a si, a nji tabe betemple ba lôñ a mo; 25 nge yange na mo me môta biname mme me saane nye, fo’o ve ane a yi jôm éziñ, amu émiene nnye a ve bôte bese ényiñ a mvebe a biôme bise. 26 A nga té ayoñe bôt ése a zene ya môte wua, na be tabe si ése, a a nga telé biyoñ a minné ya vôme bôte ba yiane tabe, 27 ndembene ba ye jeñe Zambe, to’o ba ke ba bôbe nye a su’ulane yene nye, nya ajôô, a nji bo ôyap a môt ase ya be bia. 28 Nge bi bili ényiñ, nge bia fô’ôsan, a nge bi ne, a ne amu nye, fo’o ve avale betili bekalate benane be nga jô na, ‘Amu bia fe bi ne bone bé.’*
29 “Ajô te, amu bi ne bone be Zambe, bi nji yiane simesane na, Zambe a funane gôlôt nge argent nge akok, ane jôme be nga mane ba a atyeñe mboone mame môta binam. 30 É ne été na, melu mvus, Zambe a nga dime mise mfa’a ya avale ndiman ôte, ve éyoñe ji a kate bôte bese, vôm ase na ba yiane kôñelane minlem. 31 Amu a nga telé môse wua, ñwô a ye tyi’i bôte bese ya si mejô zôsô été a zene ya môt a nga telé, a a nga ve bôte bese ndi nlem éyoñ a nga wômôlô nye miñwuan.”
32 Éyoñe be nga wôk ajô ya ñwômane miñwuan, bôte béziñe be nga taté na ba woé vioé ékpwe’ela, nté ba bevo’o be mbe be jô’ô na: “Bia ye beta wô’ô wo mfa’a ôte éyoñ éfe.” 33 Ane Paul a nga li’i be. 34 Ve bôte béziñe be nga tôñe nye a bo bebuni. Été a mbe na Dionysius, nnye a mbe ntyi’i mejô ya aba mejô ya Aréopage, a minga a too jôé na Damaris a bôte befe.