Kalate ôsu Paul a nga tili Bethessalonicien

2 A bobejañ, miabebiene mia kôme yeme na, njomane bi nga zu mia jom ô nji be zezé. 2 Avale mia yem, akusa bo bi nga taté juk a tôbane mbia étibila’a e Philippes, Zambe a nga ve bia ayo’o nlem* asu na, bi kate mia mbamba foé wé, ja’a bia tôbane mewosan.* 3 Sa ke amu na bia fu’u fé* nde bia kate mia mame mete, nge amu bi bili nyé mboone mam, nge ke amu bia kômbô du’u mia, 4 ve amu Zambe a nga yene mvaé ya ve bia ésaé ya kañete mbamba foé, ajô te nde bia kobô, sa ke na bôte be wô’ô bia mvaé, ve na Zambe a wô’ô bia mvaé, amu nnye a fase minleme miangan.

5 Mia kôme yeme na, bi nji belane mbamba bifia na bi du’u mia, nge ke jô ve anyu na bi ne mbamba be bôt amu bia sôñe jôm éziñe be mia; Zambe a ne bia ngaa! 6 Bi nji bo de amu bia yi na bôte be ve bia duma, nge na mia, nge bôte befe, be ve bia duma; ve, amu bi ne minlômane mi Krist, bi mbe ngule ya beté mia adite mbe’e bitul. 7 Ve bi nga viane bo évôvoé e zañe jenan ane nyia a nyia bone bé a voñôlô be.* 8 Amu bia wô’ô mia mintaé, bi nga ve ngule jangan ése,* na bi kañete mia mbamba foé Zambe, a na bi ve mia binyiñe* biangan amu bia nyane mia abui.

9 A bobejañ, miabebiene mia kôme yeme beta ésaé bi nga bo a njuk ôse bi nga wu asu denan. Éyoñe bi nga kañete mia mbamba foé Zambe, bi nga saé alu ba môs asu na, bi bo te beté môt éziñe ya be mia mbe’e ô ne mbia tañ bitul. 10 A bebuni, mi ne bia bengaa, a Zambe fe a ne bo’olô aval avé bi nga kabetane mia a bo mame me ne zôsô, a teke bijô mise menan. 11 A bobejañ, mia kôme yeme na bi nga ke ôsu a lebe mia, a volô mia minlem, a ye’ele môt ase ya be mia aval ane ésa a bo bone bé, 12 asu na mi ke ôsu a wulu avale da yiane mise me Zambe, nnye ate a nga loone mia Éjôé jé a duma dé.

13 A bobejañ, bia ve Zambe akiba kom ése amu na, éyoñe mi nga wô’ô mejô me Zambe bi nga kañete mia, mi nga kañese me, sa ke ane mejô ma so e be bôt, ve ane me ne fo’o, mejô ma so be Zambe, mme ma bo ésaé be mia, mia bebuni. 14 A bobejañ, bo’ané bevu ya bikôane bi Zambe bia wulu ba’aba’a a Yésus bi ne Judée, amu avale bejuif ba tibili bekristene ya Judée, avale te fe bôte ya ayoñe denane ba tibili mia. 15 Bejuif bete mbe be nga wôé Tate Yésus a bekulu mejô, mbe fe be nga tibili bia. Be nji ve Zambe nleme mvaé, nde fe be nji jeñe mvaé môt éziñ, 16 ba kômbô fe kamane bia na, bi kate bôte ya meyoñe foé ja ye ve be ényiñ. Éyoñe ba bo nalé, ba kô’ôlane minseme miap. Zambe a ye su’ulane yaa be.

17 Ve éyoñe bi nga kandane* mia, a bobejañ, fo’o ve mon étun éyoñ (mi nga jembane bia mis sa ke minlem été), amu beta nkômbane wongan, bi nga ve ngule jangan ése na bi yene mia a mis.* 18 Ajô te nde bi nga kômbô zu jome mia, yaa ma Paul, me nga jeñe mezene ya zu jome mia biyoñe biyoñe bibaé, ve Satan a nga tebe bia zen. 19 Ndi nleme fé bi bili, meva’a mevé bi bili, ma’ane* mevé bi bili be Tate Yésus éyoñ a ntoo valé?* Ye sa ke mia? 20 A bobejañ, mi ne fo’o duma dangan a meva’a mangan.