Mbamba foé Matthieu a nga tili

25 “Nde be ne vek Éjôé ya yôp a bindune bengon awôme bi nga nyoñe belambe bap, a ke tôbane fame ja zu lu’u minga. 2 Bengone betane ya été be mbe mekut, ba bevo’o betane ki mimfefek.* 3 Amu ba be mbe mekut, be nga nyoñe belambe bap teke nyoñe mbon, 4 ve ba be mbe mimfefek, be nga nyoñe belambe bap a mende’e mimbon. 5 Amu fame ja zu luk é nga bo teke ji’a so, bese be nga ndeñ ôyo, a su’ulane ke ôyo. 6 Zañ alu, be nga wô’ô bôte be yôta’ane na, ‘Fame ja zu luk é soya! Kuané nseñe mi ke tôbane je.’ 7 Ane bindune bengone bite bise bi nga vee ôyo, a kômesane belambe bap. 8 Bengone be mbe mekute be nga jô ba be mbe mimfefe’e na, ‘Va’ané bia mone mbone wôé, amu belambe bangane be nga zu dim.’ 9 Nde ba be mbe mimfefe’e be nga yalane be na, ‘Bi nji buni na mbon ôte wo ye yiane bia bese. Miabebiene kelané kuse mbone be bôte ba kuane wô.’ 10 Nté be mbe zene na ba ke kuse mbon, nde fame ja zu luk é nga li’i é suane be mvus. Bindune bengone bi mbe nkômesan, bi nga ke nyiine nda abôk a nye, ane be nga fete mbé. 11 Mvuse mon éyoñ, ane bindune bivo’o bi nga suan a jô na, ‘A monti, monti, yo’é bia mbé!’ 12 Ane a nga yalane na, ‘Ma kate fo’o mia na, me nji yeme mia.’

13 “Momba’ané, amu mi nji yeme môse nge awolo.

14 “A ne fo’o ve ane môt a loon alo dé, a mane li’i de biôme bi mo bié ôsusua na a ke dulu. 15 A nga li’i môt ôsu, betalent betan,* nyi baa betalent bebaé, nyi mbo’o ki talent wua; a nga ve môt ase abime da yiane ngule jé, ane a nga ke dulu. 16 Été été, môt a nga bi betalent betan a nga ke bo makit, a bi betalent befe betan. 17 Avale da fe, môt a nga bi betalent bebaé a nga beta bi bebaé befe. 18 Ve mbo ésaé a nga bi fo’o ve talent wua, a nga ke fa’a si, a solé moné masa wé.

19 Mvus ayap éyoñ, masa alo éte a nga so dulu, nde a nga zu bo alo dé sito’o ya moné a nga li’i de. 20 Nde môt a nga bi betalent betan, a nga soo betalent befe betan, a nga jô na: ‘A masa, ô nga li’i ma betalent betan, tame yen, me beteya bi befe betan.’ 21 Masa wé a nga jô nye na: ‘Abeñ, ô ne fo’o mbamba mbo ésaé, a nyu a yeme ba’ale élat! Ô nga yeme ba’ale biôme bi ne tyôtyoé, ma ye fe ve wo biôme bi ne abui na ô ba’ale, za’a vak a masa wôé.’ 22 Môte mbok a nga bi betalent bebaé, a nga so betalent befe bebaé a jô na, ‘A masa ô nga li’i ma betalent bebaé, tame yen, me beteya bi befe bebaé.’ 23 Masa wé a nga jô nye na: ‘Abeñ, ô ne fo’o mbamba mbo ésaé, a nyu a yeme ba’ale élat! Ô nga yeme ba’ale biôme bi ne tyôtyoé, ma ye fe ve wo biôme bi ne abui na ô ba’ale, za’a vak a masa wôé.’

24 “Nde mbo ésaé a nga bi talent wua a nga su’ulane so a jô na, ‘A masa, me mbe me yeme’e na ô ne ayete môt, wo koé bidi vôm ô nji bé, nde fe wo wôlô mefese vôm ô nji se’ese. 25 Nde me nga ko woñ, a ke solé talent wôé si été, moné wôé nyi.’ 26 Nde masa wé a nga yalane nye na: ‘A mbia mbo ésaé, a nleles, ô mbe ô yeme’e na ma kôane vôme me nji bé, a na, ma wôlô mefese vôme me nji se’ese, 27 nga ô mbe ve ke naane moné wome na, éyoñe ma ye bulan, me nyoñe nye a nsenge?

28 “‘Nde nyoñané nye talent ate, a ve nye môt a bili betalent awôm. 29 Amu môt ase a bili abui ba ye beta kô’ôlane nye, a a ye bi abui, ve nyi a nji bi, ba ye vaa nye to’o abim a bili. 30 Ôlo wu wo volô ki ma jôm éziñ; wu’ané wô atan, nseñ e dibi été, nne wo ye yône wôé a latane mesôñ.’

31 “Éyoñe Mona môt a ye so étôto’o jé a beéngele bé nsamba, a ye tabe si étôtok éto njôane jé. 32 Meyoñe mese ma ye tôkan ôsu wé, a a ye kandé bôt, fo’o ve avale mba’ale mintômba a kandé mintômba a bikela. 33 A ye bo na, mintômba mi ke mbo nnôme wé, bikela ki mbo ngale wé.

34 “Nde Njô bôt a ye jô ba be tele nye mbo nnôme na: ‘A bôt Ésa wom a nga botan, za’ané mi zu nyoñe ma’ane menan; mme mete me ne Éjôé a nga kômesan asu denan ôsusua na bone ba taté na ba bialé si.* 35 Me nga wô’ô zaé, ane mi nga ve ma jôme ya di, me nga wôk évé, ane mi nga ve ma jôme ya nyu. Me mbe nneñ, ane mi nga yeme nyoñe ma; 36 me mbe soé,* ane mi nga jalé ma biyé, me nga kon, ane mi nga zu ba’ale ma. Me mbe mimbôk, ane mi nga zu jome ma.’ 37 Nde bôte be ne zôsô ba ye sili nye na: ‘A Tate, môs ôvé bi nga yen ô wô’ô zaé, ane bi nga ve wo bidi, nge na, ô wô’ô évé, ane bi nga ve wo jôme ya nyu? 38 Môs ôvé ô mbe nneñ, ane bi nga yeme nyoñe wo, nge soé ane bi nga jalé wo biyé? 39 Môs ôvé bi nga yene wo ô konôk, nge ke ô too mfetane mimbôk, ane bi nga zu jome wo?’ 40 Ane Njô bôt a ye yalane be na, ‘Ma kate fo’o mia na, éyoñe mi nga bo de monyañe wome wua ya ba ba dañe tyôtyoé ba, ma mi nga bo de.’

41 “Mvuse ya valé a ye jô bôte be ne nye mbo ngale na: ‘Kelané wôé, a bôte biyo’é, mi ke nduane ja yôñe nnôm éto be nga kômesan asu Diable a beéngele bé. 42 Amu me nga wô’ô zaé, ve mi nji ve ma jôme ya di a me nga wôk évé, ve mi nji ve ma jôme ya nyu. 43 Me mbe nneñ, ve mi nji yeme nyoñe ma, soé, ve mi nji jalé ma biyé, me mbe me konô’ôk a mfetane mimbôk, ve mi nji zu ba’ale ma.’ 44 Be fe ba ye jô nye na: ‘A Tate, môs ôvé bi nga yene wo ô wô’ô zaé, ô wô’ô évé, ô too nneñ, ô too soé, ô konôk, ô too mfetane mimbôk, a bi teke zu volô wo?’ 45 A ye yalane be na: ‘Ma kate fo’o mia na, éyoñe mi nga bene de bo monyañe wome wua ya ba ba dañe tyôtyoé ba, ma mi nga bene de bo.’ 46 Jame da yange be é ne awu ya nnôm éto, ve bôte be ne zôsô ba ye bi ényiñe ya nnôm éto.”