Nlitan Jean a nga yen
16 A me nga wô’ô tyiñ é yôta’an, é so’o vôm a dañ étyi, é jô’ô beéngele zangbwal na: “Kelané a sôé bisua zangbwal ya ayaa Zambe e si.”
2 Nyi ôsu a nga ke a sôé ésua jé e si. A beta étyel a too mintaé a nga bi bôte be mbe be bili ndeme tit afan a ba be mbe be kañe’e éve’ela jé.
3 Nyi baa a nga sôé ésua jé e mañ été. A me nga mane bo metyi, fo’o ve ane vôme ba te wôé môt, a bevevee bitétéa* bise bi nga mane wu, ôwé, biôme ya mañ.
4 Nyi lale a nga sôé ésua jé asôé été a mejeñe* mendim été. A me nga mane bo metyi. 5 Me nga wôk éngele a jôé mendim a kobô’ô a jô’ô na: “Wo, Nyu a ne a Nyu a mbe, Nyu a ba’ale élat, Nyu a ne zôsô, amu ô maneya bo mintyi’ane mejô mi, 6 amu be nga sôé metyi mimfufup a ma bekulu mejô, a ô nga ve be metyi na be nyu amu ba yiane de.” 7 A me nga wôk autel a jô’ô na: “Ôwé, Yéhôva* Zambe, Nyu a bili ngul ése, mintyi’ane mejô miôé mi ne été a zôsô.”
8 Éngele nyini a nga sôé ésua jé nlô jôbô yôp a be nga ve nlô jôbô ngule ya di’i bôt a nduane jé. 9 A bôte be nga mane dik a zene ya ngul ayôñ, ve be nga kobô éyôlé Zambe ébiasé, nnye ate a bili ngule ya jôé minju’u mite, a be nji ke kôñelane minlem a ve nye duma.
10 Éngele tane a nga sôé ésua jé éto njôane tit afan. A éjôé jé é nga bo dibi, a be nga taté na ba nyalé ayeme dap amu mintaé miap, 11 ve be nga kobô Zambe ya yôp ébiasé amu mintaé miap a ébiasé jap, a be nji li’i mam abé map.
12 Éngele samane a nga sôé ésua jé e beta ôsôé Euphrate, a mendime mé me nga mane kôte mfa’a ya kômesane zen asu bejô bôte ba so mfa’a jôp da tôô.*
13 A me nga yene mvite minkobô* élal é too ane minkongo mi so’o anyu dragon a anyu tit afan a anyu nkulu mejô ya minsos. 14 A ne minkobô mia so a ngule ya mbia minsisim a mia bo mesimba, a mia ke e be bejô bôte ya si ése, na mi ke tôkane be nsamba, asu bita ya beta môse ya Nyu a bili ngul ése.
15 “Tame yen! Ma zu ane ñwuwup. Mevak a nyu a mombô a ba’ale biyé bié ya yôp, ndemben a ne bo te wulu soé a bôte be ne bo teke yen ôsone wé.”
16 A mia tôkane be vôme ba loone nkobô Hébreu na, Armaguédon.*
17 Éngele zangbwale a nga sôé ésua jé mfebe été. A beta tyiñ a nga so vôm a dañ étyi éto njôan, a jô’ô na: “É bobaneya!” 18 A befeleves a metyiñ a bezo’oyañe be nga bo, beta mfô’ôsane si fe a nga bo aval é ngenane teke bobane nté ane bôte be nga tabe si nyu, a mfô’ôsane si ôte ô nga yametan a bo nya ngulu. 19 Beta tison a nga kabane bitune bilal, a tisone ya meyoñ é nga ku, a Zambe a nga simesane beta Babylone na a nyuu nye élaé woone ya beta ayaa wé. 20 Nde fe, bikôte bi si bise bi nga tup a minkôle mi nji beta yené. 21 Nde beta meta’a, da é too adit bebé talent wua,* be so’o yôp be nga ku bôte nyul a bôte be nga kobô Zambe ébiasé amu nju’u ya meta’a ôte ô mbe ngul a lôt avale ba jaé zu ba yen.