Kalate baa Paul a nga tili Timothée
1 Paul, nlômane Krist Yésus a zene ya nkômbane Zambe, ñwô ôte wo wô’an a ngaka’a ya ényiñ é ne be Krist Yésus, 2 ma tili Timothée, mone ya nye’an:
Beta mvam, mvam a mvo’é bia so be Zambe Ésa wongan a be Krist Yésus Tate wongane bi tabe’e be wo.
3 Ma ve Zambe akiba, nnye ma bo ésaé é ne étyi ane bemvamba bame be nga bo a mone môte ya nlem a ne mfuban, teke vuane simesane wo meye’elane me nja’ane mam alu ba môs. 4 Ma simesane mili’i môé a me bili beta nkômbane ya yene wo, ndembene me ne bo njalan a mevak. 5 Amu ma simesane mbunane wôé ô ne te medu’an, ñwô ô nga taté tabe be nyo émvame Loïs a be nyua Eunice, a me too ndi na ô ne fe be wo.
6 Amu jam éte, ma ba’alane wo na ô so* mveane Zambe ane ba so nduan, ñwô ô ne be wo amu me nga beté wo mo mam. 7 Amu Zambe a nji ve bia nsisime ya woñ, ve nsisime ya ngul, nye’an a mbamba mfasane mam. 8 Nde, te wôk ôsone ya kañete ajô Tate wongane nge ajô dam, mone mimbôk asu Tate, ve bo’o nkômesane ya jibi minjuk asu mbamba foé, ô tabe’e ngule Zambe mebun. 9 A nga nyii bia a a nga loone bia a nloone ya étyi, sa ke amu mimboone miangan, ve amu nsôñane wé émien a amu beta mvame wé, nnye ate a nga vebane be bia élat a Krist Yésus ôsusua biyoñe ya kôa, 10 ve éyoñe ji beta mvam ate a ne fo’o été a zene ya ñyenane ya Nyii wongane Krist Yésus, nnye a nga tyam awu a a nga faé éfufup ényiñ a zene ya jôm é vo’o ndaman, mbamba foé, 11 amu nnye, me nga tebe nkate foé, nlôman a ñye’ele.
12 Ajô te nde ma fe ma tôbane mame ma, ve me nji wôk ôson. Amu ma yeme Nyu me nga buni a me too ndi na a ne ngule ya ba’ale jôme me nga naane be nye akekui môs ôte. 13 Kele’e ôsu a ba’ale éve’ela ya mbamba mejô* ô nga wô’ô be ma, a mbunan a nye’ane bia so élat a Krist Yésus. 14 Kôme’e ba’ale biôme bi ne dia bite ô nga nyoñ a zene ya mfufube nsisim, nnye ate a too be bia.
15 Avale wo yem, bôte bese ya ngoto ya Asie be nga lume ma mvus, to’o Phygèle a Hermogène. 16 Tate a mvama’ane bôte be ne nda bôt Onésiphore, amu a nga ve ma ngule nyule kom ése a a nji wô’ô bengôkobe mimbô’ô bam ôson. 17 Ve éyoñ a mbe Rome, a nga nyoñ éyoñe ya jeñe ma a a nga yene ma. 18 Tate a bo’o na mvame ja so be Yéhôva* é zu be nye môs ôte. A môte mfe a nji kôme yem ane wo, mame mese a nga bo Éphèse.