Mbamba foé Luc a nga tili

14 Éyoñ éfe a nga ke di nda ntebele bepharisien wua môse Sabbat, a be mbe be kôme’e nye fombô. 2 A nga bo na, môt éziñ a mbe a tele nye ôsu a bili ôkone wo bo na nyule jé é mane bim.* 3 Ane Yésus a nga sili bôte be mbe be kôme’e yeme Metiñe me Moïse a bepharisien na: “Ye atiñe da kañese na be saé môte môse Sabbat ye momo?” 4 Ve be nga ku bivôl. Ane a nga beté môte mo a saé nye a suu nye. 5 Mvuse ya valé a nga jô be na: “Za ya be mia, nge mona fame wé nge ke nnôme nya’a wé a ku ébé, a ye ke ji’a ke vaa nye ébé été môse Sabbat?” 6 A be mbe te ngule ya yalane nye jam éte.

7 Éyoñ a nga yen avale bôte be nga bañete be mbe be tobe’e na ba ke tabe vôme bito ba ba’ale asu beta beyeñe bi ne, ane a nga nyoñ éve’an. A nga jô be na: 8 “Éyoñe môt a te bañete wo abôk aluk, te ke tabe si éto ba te ba’ale asu beta nneñ, éko éziñ a te fe bañete môt a dañe wo. 9 Nde môt a nga bañete mia bebaé a ye so a jô wo na, ‘Va’a môte nyi éto jôé.’ A ôson ôse, wo ye kôlô si a ke tabe si éto ja su’ulan. 10 Ve éyoñe ba te bañete wo, kele’e tabe éto ja su’ulan, ndemben éyoñe môt a nga bañete wo a ye so, a ye jô wo na, ‘A môô, kele’e tabe éto ba te ba’ale asu beta beyeñ.’ Ane beyeñe bevo’o bese ba ye semé wo. 11 Amu môt ase a bete émiene yôp a ye silibane si, a môt ase a sili émiene si a ye betebane yôp.”

12 Mvuse ya valé, a nga jô fe môt a nga bañete nye na: “Éyoñe wo bañete bôte na be zu di zañe môs, nge ke mame ngô’é, te loone bemvôé bôé nge bobenyoñ, nge bivuvumane biôé, nge minkukume mi bôte mia nyiñe vôm ô too. Amu be fe be ne bañete wo, a nalé a viane bo ma’ane môé. 13 Ve éyoñe wo bo abô’ô bidi, bañete’e minzôzoé, mimbômbôk, miñyeyem, mindindim; 14 a wo ye bo mevak, amu be nji bi jôm éziñe ya bulane wo. Amu wo ye bi ma’an môé awolo ya ñwomane miñwuane ya bôte be ne zôsô.”

15 Éyoñ a nga wô’ô mejô mete, môte wua ya beyeñe be mbe valé a nga jô nye na: “Meva’a me bo’o a nyu a di* Éjôé Zambe été.”

16 Yésus a nga jô nye na: “Môt éziñ a nga bo beta abô’ô bidi mame ngô’é a bañete abui bôt. 17 Éyoñ awolo ya di mame ngô’é é nga kpwaan, ane a nga lôme mbo ésaé wé na a ke kate bôt a nga bañete na, ‘Za’ané amu mame mese me ntoo nkômesan.’ 18 Ve bese be nga taté na ba jeñ atyebe ya bo teke so. Nyu ôsu a nga jô nye na, ‘Me nga kuse si a ma yiane ke yene je; jamé’é ma, me vo’o so.’ 19 A nyu mbok a nga jô na, ‘Me nga kuse nyak awôm* a ma ke ve’ele be, me yen ane ba saé; jamé’é ma, me vo’o so.’ 20 Nyu mbo’o fe a nga jô na, ‘Me ndôme luk, a amu nalé me vo’o so.’ 21 Nde mbo ésaé a nga bulan a zu kate masa wé mame mete mese. Ane masa ya nda a nga wô’ô mbia ôlun a jô mbo ésaé wé na, ‘Jika’a ke beta minjoñ a bone minjoñe ya tison a soo ma minzôzoé, mimbômbôk, mindindim a miñyeyem.’ 22 Éyoñe mbo ésaé a nga bulan, a nga jô na, ‘A masa mame mese wo te jô na me bo me maneya bo me, ve aba é ngenane teke jaé.’ 23 Nde masa a nga jô mbo ésaé na, ‘Kele’e minjoñ a mezen a tindi be na be zu, ndembene nda jame ja ye jaé. 24 Amu ma kate mia na, teke môte wua ya ba me nga bañete a ye tye’e bidi biame ya mame ngô’é.’”

25 Beta nsamba bôt a mbe a kele’e dulu a Yésus, ane a nga kôñelan a jô be na: 26 “Nge môt a zu be ma a nyeke’e ésa wé, nyia, ngal, bon, bobenyañ a bekale bé, ôwé, to’o ényiñe* jé ébien a dañe ma, a vo’o bo ñyé’é wom. 27 Môt ase a nji be’e élé mintaé* jé a tôñe ma, a vo’o bo ñyé’é wom. 28 Éve’an é ne na, za ya be mia a kômbô lôñe nkum a ye ke taté tabe si a fase nge a bili abime moné da yiane na a mane nkum ôte? 29 Nge nalé momo, a ne taté mbôka’a ve a teke bo ngule ya mane nkum ôte, a bôte bevo’o bese ba yene de ba ye taté na ba kpwe’ele nye, 30 be jô’ô na: ‘Môte nyi a nga taté na a lôñ, ve a nji bo ngule ya mane.’ 31 Nge ke na, njô bôte mbé a kômbô ke wosane njô bôte mbok, a ye ke taté tabe si a fase ba be bevee melebe bé, nge a bezimbi 10 000 a ne ke wosane njô bôt a zu wosane nye a bezimbi 20 000? 32 Nde nge a nji bo ngule ya bo de, nté nyu mbok a ngenan ôyap, a lôme nsamba befol ayoñ ô ke bo élat a nye. 33 Avale da fe, kômané yeme na, môt a bo teke lume biôme bi mo bié bise mvus, a vo’o bo ñyé’é wom.

34 “Nya ajôô a ne na, nku ô ne mvaé. Ve nge nku ô jañele ngule jé, jé ja ye beta ve wô ngul? 35 Ô nji bo mfi asu si nge na si é bo atek. Bôte ba wua wô fé. Nyu a be’e melo ya wôk, a wô’ôk.”