Kalate ôsu Paul a nga tili Becorinthien

3 Nde a bobejañ, me nji kui na me kobô mia ane bôte ba wulu avale nsisime wo jô, me nga kobô mia ane bôte ba wulu avale minsône mia jô, ane bone be bongô e Krist été. 2 Me nga ve mia menyañe na mi nyu, sa ke benya bidii, amu mi nji be ngul. To’o éyoñe ji mi ngenane te bo ngul, 3 amu mi ngenane bôte ya minsôn. Nté ôse éviele a mômane bi ne zañe jenan, ye nalé a nji liti na mi ne bôte ya minsôn amu mia ke ôsu a bo mam ane bôt? 4 Amu éyoñe môte wua ya be mia a jô na: “Ma, me ne môte Paul,” a nyu mbo’o na, “Ma, me ne môt Apollos,” ye nalé a nji liti na mi ne ane bôte bevo’o bese?

5 Za a ne Apollos? Ôwé, za a ne Paul? Be ne bebo bisaé be nga volô mia na mi bo bebuni, fo’o ve avale Tate a nga ve môt ase ya be be. 6 Ma me nga bé, Apollos a nga sôé mendim, ve Zambe a nga bo na é ke ôsu a yaé, 7 ajô te ñhe, nyu a bé a nji bo jôm, ja’a nyu a sôé mendim, ve Zambe nnye a bo na é yaé. 8 Éyoñe ji, nyu a bé a nyu a sôé mendim, bese be ne jôme jia,* ve môt ase ya be be, a ye nyoñe ma’ane mé, aval ésaé jé é ne. 9 Amu bi ne benyoñe ngabe ya ésaé Zambe, ve mi ne afube Zambe a bé, melôñe me Zambe.

10 Avale beta mvame Zambe a nga vebane be ma, me nga bôé mbôka’a ane ntyetyeñe masa wo lôñe menda, ve môte mfe nnye a lôñe mbôka’a ôte yôp. Ve môt ase a tabe’e ntyel éyoñ ése a aval a lôñe mbôka’a ôte yôp. 11 Amu teke môt éziñ a ne bôé mbôka’a ôfe, a dañe wu ô mbôô, ñwô ôte ô ne Yésus Krist. 12 Mbôka’a ôte yôp, môt éziñ a ne lôñ a or, argent, a meko’o me ne édima, nde fe môte mbok a ne lôñ a bilé, a bikumba’a,* a minkôte bilok, 13 ve, da ye kôme yené, aval ésaé môt ase a nga bo é ne môse meve’ele, môs ôte nduane ja ye liti aval ésaé môt ase a nga bo é ne. 14 Nge ésaé môt a nga lôñe mbôka’a ôte ja tabe ayap, a ye bi ma’an. 15 Nge ésaé môt éziñe ja mane di’i nduan été, môt ate a ye jañele ésaé jé, ve jame da émien a ye sa’ale njañan, a ye bo ane môte bôte befe ba vaa nduan été.

16 Ye mi nji yeme na miabebiene mi ne temple Zambe, a na nsisime Zambe ô too be mia? 17 Nge môt éziñ a tyame temple Zambe, Zambe a ye tyame nye amu temple ate a ne étyi, a mi ne temple Zambe.

18 Môt éziñ a bo’o te du’u émien: nge môt éziñe ya be mia a simesane na, a ne fek émo* ji, a bo’o akut, ndemben a ne bo fek. 19 Amu fe’e ya émo ji, é ne akute mise me Zambe. Amu é ne ntilane na: “A bi mimfefek atyeñe dap été.” 20 É ne fe ntilane na: “Yéhôva* a yeme na, asimesane ya mimfefek é ne momo.” 21 Nde môt éziñ a bo’o te bo éngelezek amu mame bôte ba bo. Amu biôme bise bi ne émbienan, 22 to’o Paul nge Apollos, nge Céphas,* nge émo, nge ényiñ, nge awu, nge biôme ya éyoñe ji, nge biôme bia zu, biôme bise bi ne émbienan. 23 Ve mia, mi ne bebo bisaé be Krist, a Krist a ne mbo ésaé Zambe.