Kalate Paul a nga tili Behébreu
6 Nde éyoñe ji, amu bi li’iya atata’a ñye’elan ajô Krist mvus, njika’a biané nsôñane ya bo bitôtôlô, sa ke na bia bôé mbôka’a ôfe, ñwô ôte ô ne nkôñelane nleme ya biwuwua bi mam a mbunane be Zambe, 2 ñye’elane ya nduan a mbetane mo, ñwômane miñwuan a ntyi’ane mejô ya nnôm éto. 3 A bia ye bo de, nge Zambe a kañese.
4 Amu, mfa’a ya ba mise me nga yombô éyoñe jia ya biyoñe bise, ba be nga tye’e mvean ô ne zezé ya yôp, ba be ntoo benyoñe ngabe ya mfufube nsisim, 5 a ba be nga tye’e mbamba mejô me Zambe, a mbamba be mame ba ye veban émo* ja zu, 6 ve be nga yale fé, be vo’o ki beta bo be na be nyiñe mfa’a ya kôñelane minlem, amu bebiene ba beta tyelé Mona Zambe élé a wo’o nye ôsone bôt été. 7 Amu, si ja nyoñ ébotane ja so be Zambe éyoñe ja nyu mveñe ja noñe kom ése, a mvuse ya valé si ja ve bijebejeba bi ne mfi asu bôte be nga bé bie. 8 Ve nge ja ve biyo a minsinik, ja ye wuabane fé a é ntoo bebé ya yo’oéban, ja ye su’ulane di’iban.
9 Ve mfa’a wônan, a bôte ma nye’e, bi too ndi na mame me ne mvaé abui ma yange mia, mame me tii a nyiian, akusa bo bia kobô nalé. 10 Amu Zambe a nji bo ékotekote na a vuan ésaé jenan a nye’ane mi nga liti asu éyôlé jé, amu ésaé mia bo, a mia ke ôsu a saane mimfufup. 11 Ve bia yi na, môt ase ya be mia a liti aval ôdidi’i da, ndemben a ne kôme ba’ale ndi nlem ése akekui memane, 12 ndembene mi ne bo te bo minleles, ve bo bevu ya ba be ne benyoñe ngabe ya bengaka’a a zene ya mbunan a ôjibi.
13 Amu éyoñe Zambe a nga bo Abraham ngaka’a, Zambe a nga kane ngana be émien amu teke môt a dañe nye, 14 a jô’ô na: “Ma ye fo’o botane wo a ma ye fo’o bo na mvoñe bôte jôé é fôé.” 15 Nde éyoñ Abraham a litiya ôjibi, a nga bi ngaka’a éte. 16 Amu bôte ba kane ngana a éyôlé môt a dañe be, a ngana jap ja telé nsañeta’ane amu é ne sitam asu dap. 17 Avale te fe, éyoñe Zambe a nga tyi’i na a tu’a kôme liti benyoñe ngabe na nsôñane* wé ô se ngule ya tyendé, a nga yemete ngaka’a* éte a nkanane ngana, 18 asu na, a zene ya mame mebaé me vo’o ki tyendé, mme fe Zambe a se ngule ya laa minsos, bia bia tube na bia ke asoé, bi ne bi ngule nyul a tu’a bi a mo mebaé ndi nlem é tele bia ôsu. 19 Bi bili ndi nlem éte, ane atyi étyé asu ényiñ,* a é ne été, a é yeme ne zeñ, a ja nyiin éndelé mvus, 20 vôme Yésus a nga nyiin ane nkee ôsu, nnye a nga bo beta prêtre ane Melkisédek nnôm éto a nnôm éto.