Kalate Paul a nga tili Bephilippien
3 A bobejañ, jame ma su’ulane kate mia é ne na, mi ke ôsu a va’a be Tate. Me nji wô’ô nju’u ya ke ôsu a tili mia avale mame da, amu a ne asu mvo’é jenan.
2 Taba’ané ntyel a bemvu; taba’ané ntyel a bôte be ne bo mia abé, taba’ané fe ntyel a bôte ba vañe balé bebiene meveñe nyul. 3 Bia bi nga tyi’ibane metyele minleme miangan été, bia bia bo Zambe ésaé a ngule ya mfufube nsisim, bia bi too Yésus Krist nya ndii, bi nji tabe ndi a mame ya minsôn. 4 Me bili abui beamu ya tabe ndi a mame ya minsôn a lôte bôte bese.
Nge môt éziñ a buni na a bili beamu ya tabe ndi a mame ya minsôn, ma ma dañe bi beamu ya bo de: 5 me nga tyi’iban atyel alu muamô, me ne môte ya ayoñ Israël, nda bôte Benjamin, mone hébreu, bebiaé bame be mbe behébreu, me nga tôñe metiñ ane mone pharisien; 6 mfa’a ya bo mam a ayôñ ése, me nga tibili ékôane bekristen,* me mbe teke bijô amu me mbe me tôñe’e metiñe ne tiññ. 7 Ve me nga mane jô’é* mame mese me mbe me yene’e anen amu Krist. 8 Jame da dañ é ne na, ma kañese jô’é mame mete mese amu ma yene na ñyemane ya yeme Krist Yésus, Tate wom ô ne dia abui. Amu nye, me nga kañese jô’é mame mete mese a yene me ane mbuan,* ndembene Krist a ye wô’ô ma mvaé 9 a nyoñe ma ane ñyé’é wé. Me nji jô na me ne zôsô amu ma tôñe Metiñe me Moïse. Ve me ne zôsô amu ma buni Krist. Nya ajôô a ne na, bôte bese ba buni Krist be ne zôsô mise me Zambe. 10 Nsôñane wom ô ne na, me yeme nye, me yeme ngule ya ñwômane wé, ma fe me jibi minjuk ane nye, a kañese wu ane émien a nga wu, 11 a yene nge ma fe me ne bo nyoñe ngabe ya ñwômane miñwuane ya atata’a.*
12 Ma jô ki na, me ntoo nyoñe ngabe ya été, nge ke na me ntoo mfubane teke ayeñ, ve ma ke ôsu a mate mbile wom, na me yene nge ma fe me ne bi jôm é nga bo na Yésus Krist a tobe ma.* 13 A bobejañ, me nji simesane na me biya je, ve jam é ne été é ne na, me vuaneya mame ya mvus, éyoñe ji ma fombô ve ma ya ôsu. 14 Ma kee mbile wom ôsu na me bi ma’ane ya nloone Zambe yôp été, a zene ya be Yésus Krist. 15 Nde, bôte bese ya be bia be ne bitôtôlô nsisim, ba yiane yene mam aval éte, ve nge mia yene mam aval afe a lat a jam éziñ, Zambe a ye volô mia na mi yeme wô’ô jam éte. 16 Nde ñhe, abim ése bi yaéya mfa’a ya ésaé bia bo Zambe, nkelané ôsu a abo dulu éte.
17 A bobejañ, mia bese mi vu fe ma, a ke fe ôsu a beme mise menane be bôte ba nyiñ avale mi nga yene bia bi nyiñi. 18 Amu abui bôt é ne. Me nga jaé kobô ajô dap, éyoñe ji me nga kobô ajô dap me yônôk, mbe bete ba wulu ane besiñe ya élé mintaé* Krist. 19 Ba ye su’ulane jañ, zambe wop a ne abume dap, ba bo éngelezek* a mame ma yiane bo na be wôk ôson, a ba dañe fase ve mame ya si nyi. 20 Ve éto jangan é ne yôp été, bia yange fe a ôjeja’a ôse na Tate Yésus, nkôté wongan a zu, 21 nnye a ye bo na nyule mete’e jangan é tyendé a bi duma ane* nyule jé, a zene ya beta ngule wé, nnye a bo na biôme bise bi tabe éjôé jé si.