Kalate Paul a nga tili Beéphésien
3 Amu jam éte, ma Paul, mone mimbô’ô Krist Yésus ajô denan, mia bôte ya meyoñ . . . 2 nge é ne fo’o été na, mi nga wô’ô be kobô’ô ajô éto mba’ale ya beta mvame Zambe é nga vebane be ma amu ajô denan, 3 na a zene ya nlitane nje me nga yeme nsolane jam ô ne étyi, avale fe me nga taté mia tili. 4 Nde éyoñe mia lañe kalate nyi, mi ne yem avale ma wô’ô nsolane jam ô ne étyi mfa’a ya Krist. 5 E miaé mi bôte mivok, nsolane jam ôte ô nji litibane be bone be bôt, aval ô litibaneya den e be mimfufube minlôman a bekulu mejô a zene ya nsisim, 6 ñwô ôte ô ne na, bôte ya meyoñ, éyoñe be yebeya mbamba foé a tabe nlatan a Krist Yésus, ba ye bo nsamba a bia bi ne benyoñe élik a nye, a bibu’a ya nyul éte jia, a ngaka’a Zambe éte ja ye tôébane be be aval ane be bia. 7 Me nga bo mbo ésaé ya jam éte, avale mvean ô ne zezé ya beta mvame Zambe, nnye ate a nga vebane be ma a zene ya ésaé ya ngule jé.
8 E be ma, môt a dañe tyôtyoé mimfufube mise, beta mvam ate a nga veban, ndembene ma yiane kañete meyoñe mbamba foé ajô ya akume Krist be vo’o ki vek, 9 a ma yiane bo na môt ase a yene nta’ane mame ya nsolane jam ô ne étyi, ñwô ôte ô mbe ô solô mimbu mise mi be Zambe, nnye a nga té biôme bise. 10 Nalé a nga boban a zene ya ékôane bekristen, na éyoñe ji, fe’e Zambe ja yené mevale meval é yené be bijôé, a be bôte bijôé, e bevôme be ne yôp été. 11 Jam éte da wô’an a nsôñane ya nnôm éto, ñwô ôte ô nga kômban a zene ya Krist, Yésus Tate wongan. 12 A zene jé, bia kobô teke ko woñ, a bi ne fili ya subu Zambe bebé, bi too ndi nlem a zene ya mbunane wongane be Krist. 13 Nde, ma jô mia na mi bo te bili atek a zen éziñ, mfa’a ya minju’u miam ajô denan, amu minju’u mite mi ne duma asu denan.
14 Amu jame di, ma kut Ésa wongane meboñe si, 15 nnye ate, nda bôt ése ya yôp a si é be’e éyôlé jé. 16 Ma ye’elane na a ve mia a zene ya abui duma dé, na mi bo ngule mfa’a ya bôte mi ne été wôé, a zene ya nsisime wé, 17 a na, a zene ya mbunane wônan, mi ne bi Krist a too minleme mienan été a nye’an. Ngo’o nge mi ne bi ngule minkañ a yeme mbôka’a ôte yôp, 18 ndemben a mimfufube mise, mi ne bo ngule ya kôme yeme nya ñyemane, jé é ne ndam, ayap a ôyabe yôp a édok, 19 a na mi yeme nye’ane Krist, ñwô ôte wo dañe ñyeman, nde mi ne jaé a njalan ôse Zambe a ve.
20 Nde be nyu, avale ngule jé ja bo ésaé be bia, a ne bo a dañe biôme bise bi ne ngule ya sili nge simesan, 21 e be nye, duma é bo’ok a zene ya ékôane bekristen, a zene ya Krist Yésus miaé mi bôte mise nnôm éto a nnôm éto. Amen.