Kalate Paul a nga tili Bephilippien

4 A bobejañe ma nye’e, me ne ôjeja’a ya beta yene mia, mi ne meva’a mam a ma’ane mam.* A bôte ma nye’e, kelané ôsu a yeme ne zeñe be Tate été avale mia bo le.

2 Ma jô Évodie ba Syntiche na be bo tyiñe jia* be Tate. 3 A môô,* ma ye’elane fe wo na, ô ke ôsu a volô binga bete. Amu binga bete, nsamba a Clément a bôte bevo’o bia bebe bia saé, be nga saé a ma a ngule jap ése asu mbamba foé. Biyôlé biap bise bi ne ntilane kalate ya ényiñ.

4 Va’ané kom ése be Tate, ma ba’alane mia na va’ané! 5 É yené’é be bôte bese na mi ne teke yemete na mame me bobane ve ane mia yi. Tate a ntoo bebé. 6 Te tyelané minleme yôp amu jam éziñ, ve katané Zambe mame menane mese a zene ya meye’elan, meye’elane me nja’an a mvean akiba. 7 A mvo’é Zambe, nje éte é ne anen a dañ abime bi ne simesan, ja ye ba’ale minleme mienan a asimesane denan a zene ya be Krist Yésus.

8 Nde a bobejañ, mame mese me ne benya mejôô, mame mese me ne éjijin, mame mese me ne zôsô, mame mese me ne mfuban,* mame mese ba yiane nye’e, mame mese ma wô’é mvo’é melo amu ma wônô, mame mese me ne mvaé, mame mese ma yiane duma, kelané ôsu a fase* mame mete. 9 Bo’ané mame mese mi nga yé’é be ma a kañese, ma mi nga wô’ô me so’o anyu dam, ma mi nga yene me bo’ok, a Zambe ya mvo’é a ye bo a mia.

10 Me ne meva’a be Tate, amu mia te dañe liti ma na mia nye’e ma. É ne été na mi mbe mi nye’e ma, ve mi nji be mi bili fane ya liti ma de. 11 Me nji jô nalé amu me bili miñyian, me maneya yé’é mfi ya vak a abime biôme me bili. 12 Ma yeme nyiñ a abui, ma yeme fe nyiñ a tyôtyoé. Mfa’a ya jam ése a été ése me ne tebe, me nga yé’é jame bôt abui be nji yem. Me ne nyiñe to’o me bili abui bidi, to’o me nji bi jôme ya di; to’o me bili abui biôm, to’o me nji bi abui biôm; me nga yé’é mfi ya vak a abime biôme me bili. 13 Mfa’a ya mame mese, me bili ngule Tate a ve ma.

14 Ve to’o nalé, mi nga yeme bo amu mi nga su’u ma minju’u miam été. 15 Ôwé, a mia bekristene ya Philippes, miabebiene mia kôme fe yeme na, éyoñe mi nga taté wô’ô mbamba foé, éyoñe me kôlô’ô Macédoine, mia étame mi nga zu volô ma a kañese mvolane wom, teke ékôane bekristen éfe é nga bo nalé. 16 Nté me mbe Thessalonique, mi nga lôme ma atôm asu miñyiane miam, sa ke ve éyoñe jia, ve biyoñe bibaé. 17 Me nji jô nalé amu ma ja’é mia jôm éziñ, ve jôme ma sôñ é ne jame da ye bo na mi bi mbamba éyôlé. 18 Ma jembane ki jôm éziñ, me bili biôm a dañ abime ma yi, amu Épaphrodite a nga zu ve ma atôme mi nga lôme ma, nde é ne mbamba menyum, metuna’a Zambe a kañese, ma ma ve nye nleme mvaé. 19 Zambe wom, nnye a bili étua abui biôm, a ye jalé miñyiane mienane mise a zene ya be Yésus Krist. 20 Duma é bo’o be Zambe wongan a Ésa wongane nnôm éto a nnôm éto. Amen.

21 Mi bata’ane ma mintobane mise, mmie mi ne beyé’é be Krist Yésus. Bobejañe bese bia be be bi ne va ba batane mia. 22 Mintobane mise, e dañedañe mi ya nda bôte César mia batane mia.

23 Beta mvame Tate Yésus Krist, a bo’o a mbamba mfasane wônan.