Kalate Paul a nga tili Becolossien

4 A bemasa, nyiñané a bebo bisaé benane zôsô été a avale da yian, mi yeme na mia fe mi bili Masa yôp été.

2 Mi bo’o mbane meye’elan, mi mombô’ô mfa’a ôte a mveane Zambe akiba. 3 Nté ôte ôse, mi ye’elane fe asu dangane na Zambe a ve bia fane ya kañete, asu ya na bi bo ngule ya kate bôte nsolane jam ô ne étyi wo fombô Krist; amu nsolane jam ôte ñwô me nee wô mimbôk, mengata’a été. 4 Asu na me bo ngule ya kañete wô bôte ne ngeññ avale ma yiane de bo.

5 Éyoñe mia yeñ a bôte ya nseñ, kelané ôsu a wulu a fek, mi yeme belan éyoñe jenan.* 6 Bifia bienane bi bo’o zame kom ése, ntyitan a nku, na mi yem avale mia yiane yalane môt ase.

7 Tychique, mojañe ma nye’e, éwôlô mbo ésaé a môte bia nye bia saé be Tate a ye kate mia mame mese mia kômbô yeme mfa’a wom. 8 Ma lôme mia nye na mi yem avale bi ne nné a na a zu volô mia minlem. 9 Ba Onésime, bialé-bialé ya wôé, mojañ a yeme ba’ale élat a nyu ma nye’e ba ye so nsamba; ba ye kate mia mame mese ma bobane nné.

10 Aristarque, mojañe bia nye bi ne mimbôk a batane mia; Marc fe, mone ndômenyañe Barnabas (nnye me nga kate mia na éyoñ a ye so wôé, mi yeme’e nyoñe nye). 11 Yésus nnye fe ba loone na Justus, a ne wua ya bobejañe be ne ntyi’an atyel. Balé bete mbe étame be ne bôte bia be be bia saé asu Éjôé Zambe, ba ve fe ma ngule nyul.* 12 Épaphras, mbo ésaé Yésus Krist a nga taté be a mia a batane fe mia. A ve ngule jé ése asu denan éyoñ ése a ye’elane Zambe, na mi ke ôsu a bo bitôtôlô bekristen a yeme ne zeñe mame mese ma fombô nkômbane Zambe akekui asu’ulan. 13 Ma bo’olô fo’o na a ve ngule jé ése asu mfi wônan, a asu mfi bekristene ya Laodicée a ba ya Hiérapolis.

14 Luc, dokita bia nye’e a batane mia, Démas fe a batane mia. 15 Mi bata’ane ma bobejañe ya Laodicée a Nympha a ékôane bekristene ja bo bisulane nda jé. 16 Éyoñe mia ye mane lañe kalate nyi ékôane bekristene jenan, bo’ané na be ke fe lañe nye ékôane bekristene ya Laodicée; mia ki, jeñané fe na mi lañe kalate a so Laodicée. 17 Mi kate’e fe Archipe na: “Kôme’e bo ésaé ô nga kañese be Tate, a sondô je.”

18 Mebatane mame le, ma Paul, ma tili a wo wome mamien. Te mia vuane mengata’a mam. Beta mvame Zambe a tabe’e be mia.