Mbamba foé Jean a nga tili
20 Môs ôsu ya sondô, Marie Madeleine a nga kune ke soñ, e zu koone na dibi é ngenan, a a nga yene na ako’o ya soñ é vasebaneya. 2 Nde a nga zu mbile be Simon Pierre a be ñyé’é mbok, nyu Yésus a mbe a nyeke’e abui. A nga jô be na: “Ba te vaa Tate e soñ, a bi nji yeme vôme ba te ke bôé nye.”
3 Ane Pierre a ñyé’é mbo’o be nga kui atan a ke soñ. 4 Bese bebaane be nga taté na ba mate mbile nsamba, ve ñyé’é mbok a nga mate mbil avôl a dañe Pierre, ane a nga taté ke kui soñ. 5 A nga kumbu a yene biyé bi ndombo bi bôô valé, ve a nji nyiin été. 6 Nde Simon Pierre a nga so mvuse jé, a nyiine soñ. Ane a nga yene biyé bi ndombo bi bôô valé. 7 Éyé é mbe nye ntiñetane nlô é mbe é bôô a bebandas bevok, ve é mbe mvulukane vôme wé étam. 8 Nde ñyé’é mbok a nga taté kui soñ, nnye fe a nga nyiin a yen a buni. 9 Amu be mbe be ngenane teke wô’ô mintilane mia jô na a yiane wômô miñwuan. 10 Nde beyé’é be nga bulane menda map.
11 Ve Marie a mbe a tele nseñ a yônôk. Nté a mbe a yônôk, a nga kumbu a fombô soñ été, 12 ane a nga yene beéngele bebaé be be’e bifumulu biyé be too vôme be nga bôé mbime Yésus, wua a too mfa’a ya nlô a nyu mbok a too mfa’a ya mebo. 13 A be nga jô nye na: “A minga amu jé wo yôn?” A nga yalane be na: “Be vaya Tate va, a ma yeme ki vôme ba te ke bôé nye.” 14 Éyoñ a maneya jô nalé a nga kôñelan a yene Yésus a tele valé, ve a nji yeme na a mbe Yésus. 15 Yésus a nga jô nye na: “A minga, amu jé wo yôn? Wo jeñe za?” A nga buni na a ne mbé afup, nde a nga jô nye na: “A monti nge wo wo te vaa nye va, kate’e ma vôme wo te nye ke bôé, a ma ye ke nyoñe nye.” 16 Yésus a nga jô nye na: “A Marie!” Éyoñ a nga kôñelan, a nga jô nye nkobô Hébreu na: “Rabbouni!” (nnye a tinane na, “A Ñye’ele!”) 17 Yésus a nga jô nye na: “Jôké’é ma me ke, amu me ngenane te bete be Ésa wom. Ve kele’e be bobejañ a jô be na, ‘Me nga bete be Ésa wom a Ésa wônan, a be Zambe wom a Zambe wônan.’” 18 Marie Madeleine a nga so a kate beyé’é foé: “Me yeneya Tate!” A a nga kate fe be mam a nga jô nye.
19 Éyoñe mame ngô’é me nga kui môs ôte, môs ôsu ya sondô, a mimbé mi mbe mfetane vôme beyé’é be mbe be too, amu be mbe be ko bejuif woñ, Yésus a nga so a tebe zañe jap a jô be na: “Mvo’é é bo’o be mia.” 20 Éyoñ a maneya jô nalé, a nga liti be mo mé a mvaé jé. Nde beyé’é be nga vak amu be nga yene Tate. 21 Yésus a nga jô be na: “Mvo’é é bo’o be mia. Fo’o ve aval Ésa wom a nga lôme ma, ma fe ma lôme mia.” 22 Éyoñ a maneya jô nalé, a nga kute be mvebe a jô be na: “Nyoñané mfufube nsisim. 23 Nge mi jamé minseme mi môt éziñ, mia ye jaméban, nge mi ba’ale mi mi môt éziñ, mia ye ke jaméban.”
24 Ve Thomas, môte wua ya minlôman Awôm a mibaé, nnye fe be mbe be lo’one na, Mbias, a nji be a be éyoñe Yésus a nga so. 25 Nde beyé’é bevo’o be nga kate nye na: “Bi yeneya Tate!” Ve a nga jô be na: “Nge me bo te yene vôme* be nga bômôlô nye mesene mo mé, a futi ônyui wome vôme be nga bômôlô nye mesen, a futi wo wom e mvaé jé, me vo’o kañese de.”
26 Nde, mvuse melu muam, beyé’é bé be nga beta tabe mfetane nda été, a Thomas a mbe a be. Yésus a nga so akusa bo mimbé mi mbe mfetan a tebe zañe jap a jô na: “Mvo’é é bo’o be mia.” 27 Mvuse ya valé, a nga jô Thomas na: “Futi’i ônyui wôé va a yene mo mam, a nyoñe wo wôé ô futi’i wô mvaé jam été, a jôké’é bisô,* ve buni’i.” 28 Nde Thomas a nga yalan a jô nye na: “A Tate wom, a Zambe wom!” 29 Yésus a nga jô nye na: “Ye ô nga buni amu wo te yene ma? Mevak a ba ba buni te tame yen.”
30 Nya ajôô a ne na, Yésus a nga bo mesimba mefe ézezañe beyé’é bé, mme me nji bo ntilane mvulukane kalate wu. 31 Ve mame ma me nga tilibane na mi buni na Yésus a ne Krist, Mona Zambe, a na mi bi ényiñ a zene ya éyôlé jé, amu mia buni.