Mbamba foé Jean a nga tili

9 Nté a mbe a kelek, a nga yene môt a mbe ndim aso abialé. 2 A beyé’é bé be nga sili nye na: “A Rabbi za a nga bo nsem, ye môte nyi, ye bebiaé bé, na a bialé ndim?” 3 Yésus a nga yalane na: “Sa ke môte nyi nge bebiaé bé mbe be nga bo nsem, ve jam éte é nga bobane na, bôte be bo ngule ya yene ngule Zambe be nye. 4 Bia yiane bo bisaé bi Nyu a nga lôme ma nté môs ô ngenan, alu é nga zu, éyoñe môt a vo’o bo ésaé. 5 Nté me ngenane be bôte ya si nyu, me ne éfufube bôte bese ya si.” 6 Éyoñ a maneya kobô mejô mete, a nga tui menden e tyia a fu’u mbotok a menden, a wo’o môt ate mboto’o mis 7 A a nga jô nye na: “Kele’e woban e piscine ya Siloam” (éyoñe ba kôñelan éfia éte ja tinane na, “Nlôman”). Ane a nga ke woban a éyoñ a nga bulan a mbe a nga yen.

8 Éyoñe bôte be mbe be too nye bebé a ba be nga too be yene’e ane a ja’é be nga yene de, be nga taté na ba jô na: “Ke môte nyu nnye a wô’ô zu tabe va a bo’o zak, sa nalé?” 9 Bôte béziñe be mbe be jô’ô na: “A ne nnye.” Bevo’o be mbe be jô’ô na: “Teké’é, ve a funane nye.” Môt a nga ke ôsu a jô na: “A ne ma.” 10 Nde be nga sili nye na: “Nde aval avé mise môé ma te yombô?” 11 A nga yalane na: “Môte ba loone na Yésus, a te fu’u mbotok a wo’o ma wô mis, a jô ma na, ‘Kele’e wobane Siloam.’ Ane ma te ke a woban a taté na ma yen.” 12 Éyoñe te be nga jô nye na: “Môt ate a ne vé?” Nye na: “Me nji yem.”

13 Be nga kee môt a mbe ndime be bepharisien. 14 E viane zu kui na, môse Yésus a nga fu’u mbotok a yoé môte mis ô mbe môse Sabbat. 15 Awolo éte ébien, bepharisien fe be nga taté na ba sili môt aval a te bo na a yen. A nga jô be na: “A te wo’o ma mboto’o mis, ane ma te ke woban, a me nga yen.” 16 Ane bepharisien béziñe be nga taté na ba jô na: “Nyuna a nji bo môt a so be Zambe, amu a nji semene Sabbat.” Bevo’o be nga jô na: “Nne môt a ne mbo nsem a ne bo avale mesimba di aya?” Ane be nga kandane mengam. 17 Be nga beta sili môt a mbe ndime na: “Wo jô aya mfa’a wé, amu mise môé mme a te yoé?” Môt a nga yalane na: “A ne nkulu mejô.”

18 Ve bejuif be nji be be buni’i na a nga be ndim a na a nga yen, akekui be nga loone bebiaé bé. 19 A be nga sili be na: “Ye mone wônane mia jô na a nga bialé ndime nnye nyi? Nde, aval avé a nga yen éyoñe ji?” 20 Bebiaé bé be nga yalane na: “Bia yeme na nyina a ne mone wongan a na, a nga bialé ndim. 21 Ve aval a nga yen éyoñe ji, bi nji yem, nge môt a te yoé nye mis, bi nji yem. Sila’ané nye. A ntoo nya môtô. Émien a yiane kobô asu dé.” 22 Bebiaé bé be nga jô nalé amu be mbe be ko bejuif woñ, amu e zu koone na, bejuif be maneya kôme na, nge môt éziñ a kañese nye ane Krist, môt ate, ba yiane nye titane synagogue. 23 Ajô te nde bebiaé bé be nga jô na: “A ntoo nya môtô. Sila’ané nye.”

24 Nde be nga loone môt a mbe ndim éyoñe baa, a jô nye na: “Va’a Zambe duma; bia yeme na môte nyi a ne mbo nsem.” 25 A nga yalane na: “Nge a ne mbo nsem, nge momo, me nji yem. Jame da ma yem é ne na, me mbe ndim, ve éyone ji me nga yen.” 26 Ane be nga sili nye na: “Jé a te bo wo? Aval avé a te yoé wo mis?” 27 A nga yalane be na: “Me kateya mia de, ve mi nji vô’ôlô. Amu jé mia kômbô beta wô’ô de, ye mia fe mi nga kômbô bo beyé’é bé nga?” 28 Éyoñe te nje be nga kpwe’ele nye be jô’ô na: “Wo ô ne ñyé’é môt ate, ve bia bi ne beyé’é be Moïse. 29 Bia yeme na, Zambe a nga kobô bôt, ve mfa’a ya môte nyi, bi nji yeme vôm a so.” 30 Môt a nga yalane be na: “É ne fo’o jame ya kame na, mi nji yeme vôm a so, a too ke na a te yoé ma mis. 31 Bia yeme na, Zambe a vô’ôlô ki bebo minsem, ve nge môt a ko nye woñ a bo nkômbane wé, a vô’ôlô nyuli ate. 32 Aso melu mvus, bi ngenane te wô’ô na, môt a te yoé mise me môt a nga bialé ndim. 33 Nge môte nyi a nji so be Zambe, a nji be ngule ya bo jôm éziñ.” 34 Be nga jô nye na: “Ô mbe njalan a nsem éyoñ ô nga bialé, éyoñe te wo zu ye’ele bia?” Ane be nga wua nye atan!

35 Yésus a nga wô’ô na be nga wua nye atan, a éyoñ a nga koone nye, a nga sili nye na: “Ye wo buni Mona môt?” 36 Môt a nga yalane na: “A monti, za a ne nye, ndembene me buni nye?” 37 Yésus a nga jô nye na: “Ô yeneya nye a nde fe, nnye a kobô a wo va nyi.” 38 A nga jô na: “A Tate, ma buni nye.” Ane a nga vitibi ôsu wé. 39 Ane Yésus a nga jô na: “Me nga zu si nyu amu ntyi’ane mejô ôte, na bôte be nji yen, be yen a ba ke ba yen, be bo ndim.” 40 Ba ya bepharisien be mbe a nye, be nga wô’ô mame mete a be nga jô nye na: “Bia fe bi nji bo mindindim, sa nalé?” 41 Yésus a nga jô be na: “Nge mi mbe mindindim, ve mi ne teke nsem. Ve éyoñe ji mia jô na, ‘Bia yen.’ Minseme mienan mia tabe be mia.”