Nlitan Jean a nga yen

19 Mvuse mame mete, me nga wô’ô jôm é too ve ane beta tyiñe beta nsamba bitétéa ya yôp été. Bi mbe bi jô’ô na: “Kaña’ané Yah!* Nkôtan, duma a ngule bi ne bi bi Zambe wongan, 2 amu mintyi’ane mejô mié mi ne été a zôsô. Amu a foñesôya beta minga bijabô a nga ndamane si a mvite mame ya bisô’ô* jé, a a nga kune metyi me alo dé, me mbe mo me* beta minga bijabô.” 3 A été été, nsamba bitétéa ya yôp ô nga jô éyoñe baa na: “Kaña’ané Yah!* A ôtita ô so’o be minga bijabô wo bete nnôm éto a nnôm éto.”

4 Bemvendé 24 a bevevee bitétéa binyin, be nga kute meboñe si mfa’a ya kañe Zambe, nnye ate a too éto njôan, a be nga jô na: “Amen! Kaña’ané Yah!”*

5 Nde fe, tyiñ é nga so éto njôan é jô’ô na: “Kaña’ané Zambe wongan, mia alo dé ése, mia mia ko nye woñ, bone be bôt a beta be bôt.”

6 A me nga wôk éduñ é too ane tyiñe beta nsamba bitétéa ya yôp é too fe ane éduñ abui mendim, a aval ane éduñe ngule bezo’oyañ. Be mbe be jô’ô na: “Kaña’ané Yah,* amu Yéhôva* Zambe wongan, nyu a bili ngul ése, a tatéya na a jôé ane njôô! 7 Bi tame vak, a ava’a dangan é nemba’an, mveané nye duma amu awolo alu’u Mone ntômba é kuiya a minga wé a ntoo nkômesan. 8 Yaa, be nga ve nye biyé bia ngemban, mfuban, nya ndomboo, amu nya ndomboo a ne ndeme ya zôsô mimboone mi mame mimfufup.”

9 A éngele a nga jô ma na, “Tili’i: Mevak a ba be nga bañete na be zu di bidi ya mame ngô’é alu’u Mone ntômba.” A nga beta jô ma na: “Mejô mete me ne mejô me Zambe, me ne été.” 10 Éyoñ éte me nga ku mebo mé si, asu na me kañe nye. Ve a nga jô ma na: “Tabe’e ntyel! Te bo jam éte! Ma fe me ne ôlo ane wo, a ane bobenyoñe be bili ésaé ya kañete ajô Yésus. Kañe’e Zambe! Amu nkañete ajô Yésus wo soo nkulan ajô.”

11 A me nga yene yôp é yombô’ô, a tama yenan! Éfumulu ékabela. A môt a mbe a bete ékabela a mbe a too jôé na, Étabe ndi a Benya mejôô, a a tyi’i mejô a bo bita e zôsô été. 12 Mise mé me ne nkaba’a nduan, a abui bediadème* é ne nye nlô yôp. Éyôlé é ne nye ntilane nyul, a teke môt a ne yem éyôlé éte nge ô vaa ve émien. 13 A be’e éyé ya yôp é bili metoé* metyi, a jôé dé é ne na Mejô me Zambe. 14 Minkane bita ya yôp mi be’e nya ndomboo a too éfumulu a mfubane mi mbe mi tôñe’e nye, mi bete bikabela bi too bifumulu. 15 A beta ayap a akabe nkpwaté mekôn a mbe a kui nye anyu, mfa’a ya bibi meyoñ, a a ye wulu be a ntum étyé. Nde, nnye fe a miat ôlune ya ayaa Nyu a bili ngul ése ébé ba miate woon. 16 Éyé jé ya yôp, ôwé, abé dé, éyôlé é mbe ntilan, Njô bôte ya bejô bôt a Tate ya betate.

17 A me nga yene fe éngele a tele nlô jôbô, a a mbe a yôta’ane tyiñe yôp a loon anon ése da yele ézezañe yôp* a jô’ô na: “Za’ané va, mi tôkan asu beta dina bidi Zambe ya mame ngô’é, 18 ndembene mi ne di minsône bejô bôt, minsône bivete bezimbi, minsône mingungule mi bôt, minsône bikabela a ba ba bete bie yôp, minsône mi bôte bese, ba be ne fili a alo, ba be ne bone be bôt a beta be bôt.”

19 A me nga yene tit afan a bejô bôte ya si a minkane bita miap be sula’ane mfa’a ya bo bita a nyu a mbe a too ékabela yôp a nkane bita wé. 20 A be nga bi tit afan a évuse nkulu mejô, nje éte ja bo mendeme mise mé mfa’a ya du’u ba be nga bi ndeme ya tit afan a ba ba kañ éve’ela jé. Bese bebaane be nga wuabane vevee mbe’e nduane wo yôñ a soufre été. 21 Ve ba be nga li’i, be nga wôéban a ayabe nkpwaté mekôn é mbe é so’o anyu nyu a too ékabela yôp. A anon ése é nga jaé a minsône miap.