Mame minlôman
13 Ékôane bekristene ya Antioche é mbe é bili bekulu mejô a beye’ele: Barnabas, Siméon, nnye a mbe jôé na Niger, Lucius ya Cyrène, Manaën nnye ba Hérode njôô ya ngoto be nga bo sikôlô nsamba a Saul. 2 Nté be mbe be bo’o ésaé Yéhôva* a tyi bidi, mfufube nsisim a nga jô na: “Tela’ané Barnabas a Saul fefel, amu me bili ngum ésaé ya ve be.” 3 Nde éyoñe be nga mane ntyiane bidi a meye’elan, be nga beté be mo a suu be.
4 Nde a ngule ya mfufube nsisim, bôte bete be nga siliki Séleucie, a wôé, be nga dañ éfunga na ba ke Chypre. 5 Éyoñe be nga kui Salamine, be nga taté na ba kañete bôte mejô me Zambe besynagogue bejuif. Jean a mbe fe valé a volô’ô be.*
6 Éyoñe be nga tyi’ilan ékôte si ése akekui Paphos, be nga tôbane mone juif a too jôé na Bar-Jésus, nnye a mbe ngbwengbwel a nkulu mejô ya minsos. 7 A mbe a ngovina* Sergius Paulus, ntyetyeñe môt. A nga loone Barnabas a Saul na be zu vôm a mbe, môt ate a mbe a kômbô’ô wô’ô mejô me Zambe. 8 Ve Élymas, ngbwengbwel (nne éyôlé jé ja tinane nalé) a nga taté na a wosane be a jeñe na a kamane ngovina na a buni Tate. 9 Nde Saul nnye fe be mbe be lo’one na Paul, a mbe njalan a mfufube nsisim a nga fombô nye mis été 10 a jô na: “A môt a ne njalan a avale medu’an ése a mbia be mame bese, ô ne mone Diable a nsiñe jôm ése é ne zôsô, ye wo ye fo’o jô’é ésaé ya toñekane mezene me Yéhôva* me ne zôsô? 11 Tame yen! Wo Yéhôva* ô ne be wo a wo ye bo ndim, teke yen éfufube ya môse tañ abim éyoñ éziñ.” A été été, jôm é too ane ôtita é nga bo na a bo teke kôme yen, a dibi é nga ku nye mis. Ane a nga taté na a tyiñelane vôme wua a jeñe’e môt a ne bi nye wo. 12 Nde éyoñe ngovina a nga yene jam é nga boban, a nga bo mbuni, a mbe fe’e ne vema amu mam a nga yé’é ajô Yéhôva.*
13 Ane Paul a bôte be mbe nsamba a nye, be nga kôlô Paphos a tyi’ilane mañe na, be ke kui Pergé ya Pamphylie. Ve Jean a nga li’i be a bulane Jérusalem. 14 Ve be nga kôlô e Pergé a ke Antioche ya Pisidie. Ane be nga ke synagogue ya valé môse Sabbat a tabe si. 15 Éyoñe nlañane Metiñe me Moïse a mejô bekulu mejô ô nga man, kaso ya synagogue a nga jô be na: “A bôt a bobejañ, nge mi bili éfia éziñe ja ve bôte ngule nyul, koba’ane je.” 16 Nde Paul a nga tebe tetele a febe wo wé, a jô na:
“A bôt, bone ya Israël a bôte bevo’o mia ko Zambe woñ, vô’ôlané. 17 Zambe bôte ya Israël a nga tobe bemvamba bangan, a bo na be bo ayoñ é ne ngul, nté be mbe mintabe si ya Égypte. A nga vaa fe be wôé a éwôlô wo jé. 18 A mimbu bebé 40 be nga tabe nkôte si, a nga jibi be. 19 Éyoñ a nga mane tyame meyoñe zangbwal ya si ya Canaan, a nga ve be si éte ane élik. 20 Mame mete mese me nga bobane tañe mimbu bebé 450.
“Mvuse ya valé a nga ve be betyi’i mejô akekui nkulu mejô Samuel. 21 Ve mvuse ya valé, be nga sili a ngul ése na ba yi njô bôt, a Zambe a nga ve be Saül mone Kish, môt a mbe ayoñe bôte Benjamin, a nga jôé fe be tañe mimbu 40. 22 Éyoñ a vaaya nye, a nga ve be njô bôte David; mfa’a ya David ate, émien a nga jô na: ‘Me yeneya David, mone Jessé ane môt a ne mvaé asu nleme wom; a ye bo mame mese ma nye’e.’ 23 Avale ngaka’a jé é mbe, mvoñe bôte môt ate, nje Zambe a nga nyoñe nyii bôtô ya Israël, Yésus. 24 Ôsusua na môt ate a so, Jean a nga mane kañete bôte ya Israël na nduane ñwô ô ne ndeme ya nkôñelane minlem. 25 Ve éyoñe Jean a mbe na a sondô ésaé jé a nga jô na: ‘Mia simesane na me ne za? Me nji bo nye. Ve tama yenan! Môt a zu mvuse jam, me nji bo nyu a yiane tiine nye besilefas minkole be ne nye mebo.’
26 “A bôt, a bobejañ, mia mi ne bôte ya nda bôt Abraham a bôte bevo’o ba ko Zambe woñ, bia Zambe a nga lôme foé ya nyian ôte. 27 Amu bôte ya Jérusalem a betebe ôsu bap be nji yeme môt ate, ve éyoñe be nga tyi’i nye ajô, be nga tôé mejô bekulu mejô be nga jô, mme mete mi wô’ô lañe yôp été sabbat ase. 28 Akusa bo be nji yene jam éziñ é mbe ve bo na be wôé nye, be nga yemete Pilate na a wôé nye. 29 A éyoñe be nga mane tôé mame mese me mbe ntilan ajô dé, be nga vaa nye élé* a ke bôé nye soñ. 30 Ve Zambe a nga wômôlô nye miñwuan, 31 a tañ abui melu, Yésus a nga yené be bôte be nga wulu a nye, ataté Galilée akekui Jérusalem. Éyoñe ji, bôte bete be nga kañete bôt ajô dé.
32 “Nde, bia kañete mia mbamba foé ajô ya ngaka’a Zambe a nga bo bemvamba. 33 Zambe a nga mane jalé je asu dangan, bone bap, éyoñ a nga wômôlô Yésus; fo’o ve aval é ne ntilane same baa na: ‘Ô ne mone wom; den me ntoo Ésa wôé.’ 34 A ñwômôlan a nga wômôlô nye miñwuane na nyule jé é bo te boé môs éziñ, a nga kobô jam éte a jô’ô na: ‘Ma ye nye’e wo nya nye’ane me nga ka’a David, a ne nye’an ô vo’o ke man.’* 35 Nde a nga jô fe same mfe na: ‘Wo ye ke kañese na mbo ésaé wôé a wulu ba’aba’a a wo, nyule jé é boé.’ 36 Mfa’a wu, David a nga bo Zambe ésaé* miaé bôte wé, ane a nga wu, be nga ke jame nye vôme be nga jame bemvamba bé, a nyule jé é nga boé. 37 Mfa’a ôvok, nyule môte Zambe a nga wômôlô é nji boé.
38 A bobejañ, yemané na, njamane minsem ô ne fo’o ve a zene jé, jame te nde da katebane be mia éyoñe ji 39 avale Metiñe me Moïse ma jô, mia ye ke loobane na te bijô mfa’a ya mame mese, ve mfa’a ya bôte ba buni, mia ye loobane na te bijô a zene jé. 40 Taba’ané ntyele na, jam é nga jôbane mejô bekulu mejô é bo te zu be mia na: 41 ‘Mia mi ne ébiasé, fomba’ané ésaé me nga bo melu menan. Nyina a ne ésaé mi vo’o ke buni na me nga bo, ja’a môt éziñ a kañete mia bone be mame bese ya été. Ve mia ye bo fe’e ne vema a mia ye jañ.’”
42 Éyoñe be nga kui nseñ, bôte be nga ye’elane be na be beta zu kobô mame mete Sabbat a tya’a valé. 43 Nde éyoñe bôte be nga sulan ésulane synagogue be nga mane tyamelan, abui bejuif a beprosélyte be mbe be kañe’e Zambe be nga tôñe Paul a Barnabas a kobô a be, be ye’elane be na be tabe beta mvame Zambe été.
44 Sabbat a nga tya’a valé, bebé bôte bese ya tisone be nga tôkane na ba zu wô’ô mejô me Yéhôva.* 45 Éyoñe bejuif be nga yene minsamba mi bôt, minleme mi nga jaé be a éviele, ane be nga taté na ba té mame mese Paul a mbe a jô’ô si a ébiasé ése. 46 Nde teke ko woñ, Paul ba Barnabas be nga jô be na: “É mbe é yiane na bi taté kate mia mejô me Zambe, ve mbôle mia bene me, a miabebiene mia tyi’i na mi nji bo bôte ba yiane bi ényiñe ya nnôm éto, tama yenan! Bi bia zu fo’o ke be bôte ya meyoñ. 47 Amu Yéhôva* a nga jô bia mejô ma na: ‘Me teléya mia ane éfufube ya meyoñ, ndembene mi ne kañete si ése meku’u menyin, zene ma ye belane je na me nyii bôt.’”
48 Éyoñe bôte ya meyoñe be nga wô’ô nalé, be nga taté na ba vak a ve mejô me Yéhôva* duma, a bôte bese be mbe be bili mbamba été nsisim asu ényiñe ya nnôm éto be nga bo bebuni. 49 Nde fe mejô me Yéhôva* me nga mialan a nlam ôte ôse. 50 Ve bejuif be nga tindi mimfañe mi binga mi mbe mi ko’o Zambe woñ a mimfañe mi bôte ya tisone na be tibili Paul a Barnabas a titane be tisone jap. 51 Nde be nga sase mbuluk ô mbe mebo map na be bemene be a ke Iconium. 52 A bebuni be nga ke ôsu a bo njalan a mevak a mfufube nsisim.