Nlitan Jean a nga yen

1 Nlitane* Yésus Krist, ñwô Zambe a nga ve nye na, a liti alo dé mame ma yiane boban ana’ana. A nga lôm éngele wé na a liti me ôlo wé Jean, a zene ya éngele ate a mendem. 2 Nnye ate a nga kañete mejô Zambe a nga ve nye, a nga kañete fe mejô Yésus Krist a nga ve nye, ôwé, mame mese a nga yen. 3 Meva’a me bo’o be nyu a lañe tyiñe yôp, a nyu a wô’ô mejô ya nkulane mejô wu, a nyu a tôñe mame me ne ntilan été, amu éyoñe be nga telé é ntoo bebé.

4 Ma Jean, ma tili bikôane bekristene* zangbwal, mbie bite bi ne ngoto ya Asie:

Beta mvam a mvo’é bi tabe’e be mia, bi so’o be “Nyu a ne, Nyu a mbe a Nyu a zu,” a be minsisime zangbwal mi tele éto njôane jé ôsu, 5 a be Yésus Krist, “Ngaa be ne tabe nye ndi,” “ntôle ya miñwuan,” a “Njôô ya bejô bôte ya si.”

Be nyu a nye’e bia, a nyu a nga toé bia fili mfa’a ya minseme miangan, a zene ya metyi mé, 6 a nga kôme bia na bi bo éjôé, beprêtre asu Zambe wé a Ésa wé, ôwé, duma a ngule bi bo’o be nye nnôm éto. Amen.

7 Tama yenan! A zu a minkut, a dis ése da ye yene nye, to’o ba be nga jii nye akoñ; a meyoñe mese ya si ma ye bibi mebiene nkuk a mintaé amu nye. Ôwé, Amen.

8 “Me ne Alpha a Oméga,”* nne Yéhôva* Zambe a jô nalé, “Nyu a ne a Nyu a mbe a Nyu a zu, Nyu a bili ngul ése.”

9 Ma Jean, monyañe wônan a nyoñe ngap a mia e minjuk, a éjôé, a mbane ya jibi a Yésus me mbe ékôte si ba loone na Patmos, amu me nga kobô ajô Zambe a kañete ajô Yésus. 10 A ngule ya mfufube nsisim, me nga kui môse Tate, a me nga wô’ô mvuse jam, beta tyiñ a too ane nyi toñ, 11 a jô’ô na: “Jame wo yen, tili’i de mvulekane kalate été, a lôme wô bikôane bekristene zangbwal bi: Éphèse, Smyrne, Pergame, Thyatire, Sardes, Philadelphie a Laodicée.”

12 Me nga kôñelan a fombô na me yene za a kobô ma, a éyoñe me nga kôñelan, me nga yene bitelé belambe zangbwal bi too nkôman a gôlôt, 13 a môt éziñ a funa’ane mona môt, a mbe a tele ézezañe bitelé belambe, a be’e ayap éyé é kui nye mebo, a mbe fe a be’e asese gôlôt é bôma’ane nye tôé. 14 Nde fe, nlô wé a ésile jé bi mbe bifumulu, ane éfumulu sut a neige, a mise mé me mbe ane nkaba’a nduan, 15 a mebo mé me mbe ane mbamba mvot a ngemban éyoñ a nyemé nduan été, a tyiñe jé é mbe ane éduñe ya abui mendim. 16 A a nga bili ateté zangbwal wo wé ya mbo nnôm, akap a ayabe nkpwaté mekôn ô bili meyo mebaé ô mbe ô kui nye anyu, asu dé é mbe aval ane jôp éyoñe da dañe faé. 17 Éyoñe me nga yene nye, me nga ku nye mebo si, aval ane mbim.

Ane a nga beté ma wo wé ya mbo nnôme nyul a jô na: “Te ko woñ. Ma me ne nyu Ôsu a nyu a Su’ulan, 18 a nyu a vee; me mbe ñwuan, ve ô lôô! Me ntoo vevee nnôm éto a nnôm éto, a me bili bidiba’a ya awu a bi ya Soñ.* 19 Nde tili’i mame wo te yen a ma me ne, a mame ma ye bobane mvuse mame ma. 20 Mfa’a ya nsolane jam ô ne étyi ya ateté zangbwal ô nga yene wo wome ya mbo nnôm, a bitelé belambe zangbwal bi ne nkôman a gôlôt: Ateté zangbwal é ne ndeme ya beéngele ya bikôane bekristene zangbwal, a bitelé belambe zangbwal bi ne ndeme ya bikôane bekristene zangbwal.