Kalate Paul a nga tili Behébreu
2 Amu nalé é ne mfi asu dangane na, bi tu’a baa melo mame bi nga wôk, a lôt abime bi nga bo ôsusua, ndembene bi bo teke yale fé môs éziñ. 2 Amu nge mejô me nga koban a zene ya beéngele me mbe été, a na ntyamane metiñ ôse a melo, be nga nyoñe fonose ja wô’an a zôsô, 3 aval avé bia ye famelan, nge bia biasé avale beta nyiiane di? Amu beta nyiian ate a nga taté na a koban a zene ya be Tate wongan, a a nga fasebane fe asu dangan a zene ya bôte be nga vô’ôlô nye, 4 nté Zambe a mbe a bo’olô jam éte a zene ya mendem, bitua bi mam a abui mesimba a mfufube nsisim a mbe a va’a avale nkômbane wé ô ne?
5 Amu Zambe a nji ke jô na beéngele mbe ba ye jôé bôte ya si ése ja zu, nje éte bia jô je. 6 Ve vôm éziñ, ngaa éziñ é nga jô na: “Za a ne môta biname na ô ke ôsu a simesane nye, nge ke mona môte na ô nyoñe ngap a nye? 7 Ô nga sili nye si mone jôm a dañe beéngele, ô nga jalé nye couronne* ya duma a étôtok, a telé nye na a jôé mimboone mi mame ya mo môé. 8 Ô nga telé biôme bise mebo mé si.” Éyoñ a teléya biôme bise mebo mé si, Zambe a nji li’i jôm éziñ é nji bo éjôé jé si. Ve éyoñe ji, bia yene na, biôme bise bi nji bo éjôé jé si. 9 Ve bia yene Yésus, nnye ate a nga silibane si mone jôm a dañe beéngele, éyoñe ji a mbe’e couronne ya duma a étôtok amu a nga tôban awu, ndemben a zene ya beta mvame Zambe, a tyek awu asu bôte bese.
10 Amu nye, a zene jé biôme bise bi nga téban, a nga kee abui bon e duma, jôme te nje é nga yiane na a bo ñyoé zene ya nyiiane wongan ô ne zôsô a zene ya minjuk. 11 Amu môt a telé étyi,* a bôte be nga teléban étyi, bese bebaane ba so be môte wua, a amu jam éte a nji wôk ôsone ya loone be na “bobejañ”, 12 aval a jô: “Ma ye kañete bobenyañe bame jôé dôé; a ézezañ ékôane bekristen,* ma ye ve wo duma a bia.” 13 A nga beta fe jô na: “Ma ye futi ndi nleme jame be nye.” A na: “Tama yenan! Ma a bone be bone bame Yéhôva* a nga ve ma.”
14 Ajô te nde, amu “bone be bone” be ne benyoñe ngabe ya metyi a minsôn, nnye fe avale da, a nyoñe ngap a metyi a minsôn, ndemben a zene ya awu dé, a ye mane ko’o nyu a soo awu, nnye a ne Diable, 15 na a toé fili* ba bese woñe ya awu ô nga toé éto belo ngumba nté ényiñe wop. 16 Amu sa ke fo’o beéngele mbe a volô, ve a volô mvoñe bôt Abraham. 17 E memane, a nga bo ane “bobenyañe” bé mimfa’a mise, ndemben a ne ngule ya bo beta prêtre a ne mvam a nyu a ba’ale élat e mame me Zambe, ndemben a ne bo metuna’a ya late ngbwa* asu minseme mi bôt. 18 Mbôl émien a nga tebe meve’ele été, a ne ngule ya zu volô ba be tele meve’ele été.