Mbamba foé Marc a nga tili

13 Nté a mbe a kôlô’ô Temple, ñyé’é wé wua a nga jô nye na: “A Ñye’ele tame yen aval abeñe meko’o di a mbamba menda!” 2 Ve Yésus a nga jô nye na: “Nga ô lôô abeñe menda di? Teke vaa nge beté, akok éziñe da ye ke li’i é bete akok avo’o yôp, teke tyamban.”

3 Nté a mbe a too Nkôle Beolivier a lôô Temple, Pierre, Jacques, Jean a André be nga zu koone nye a too étam a jô nye na: 4 “Kate’e bia, éyoñ évé mame ma ma ye boban a ndeme fé ja ye liti bia na, mame ma mese me ntoo bebé ya man?” 5 Nde Yésus a nga jô be na: “Taba’ané ntyele na, môt éziñ a du’u mia. 6 Abui bôte da ye so, é bela’ane jôé dam é jô’ô na, ‘Ma me ne nye,’ a abui da ye buni na ba bele. 7 Nde fe éyoñe mia ye wô’ô be kobô’ô ajô bita a mefoé bita, te kooné woñ, amu mame mete ma yiane taté boban, ve asu’ulan é ngenane te bo bebé.

8 “Amu ayoñe da ye wosan a ayoñ avok, a éjôé ja ye wosan éjôé évok, mimfô’ôsane mi si mia ye bo bevôme bevôm a bemfumbale ya zaé ba ye bo, mame mete mese me ne ane éyoñe minga a taté na a kô’ôlô mie.

9 Ve mia, taba’ané ntyel, amu bôte ba ye kee mia meba mejô a ba ye yite mia besynagogue, ba ye telé mia ôsu bengovina a ôsu bejô bôt amu ma. A jam éte da ye ve mia fane ya kate be mame mia buni. 10 Nde fe mbamba foé a yiane taté katebane meyoñe mese. 11 Éyoñe ba ye bi mia na, be kee mia aba mejô éziñ, te tyelané minleme yôp mfa’a ya jame mia ye jô, ve jam ése nsisime Zambe wo ye tindi mia na mi jô awolo éte, jô’ané de, amu sa ke mia mia kobô, ve mfufube nsisim. 12 Nde fe, monyañ a ye kee monyañe na be wôé nye, a ésa a ye kee mone na be wôé nye, a bongô ba ye wosane bebiaé a bo na be wôé be. 13 A bôte bese ba ye vini mia amu éyôlé jam. Ve môt a ye bo mbane ya jibi* akekui asu’ulan a ye nyiiban.

14 “Ve éyoñe mia ye yene jôm é ne angôndô ja soo ntyamane é tele vôm é nji yiane tebe, (môt a lañ a tuka’a fo’o fas), bôte be ne Judée be taté na ba tup a ke minkôl. 15 Môt a ne nseñe ya nda yôp, a bo’o te sise nge nyiine nda jé été na a ke nyoñe jôm éziñ; 16 a môt a ne afup a bo’o te bulane mvuse na a ke nyoñ éyé jé ya yôp. 17 Ngo’o binga ba ye bo mebum, a ba ba ye nyia bone melu mete! 18 Kelané ôsu a ye’elane na, jam éte é bo te kui éyoñ avep é ne nya ngulu; 19 amu melu mete étibila’a ja ye bo, a aval étibila’a éte é ngenane teke tame kui ataté éyoñe Zambe a nga té si, akekui melu mete, a ja ye ke beta kui. 20 Amu, nge Yéhôva* a nji bo na, melu mete me bo étun, teke môt éziñ a ye nyiiban, ve amu mintoban, a nga bo na melu mete me bo étun.

21 “Nde fe, nge môt éziñ a jô mia na, ‘Tama yenan! Krist a ne va,’ nge ke na, ‘Tama yenan! Nnye nyuli,’ te mia buni de. 22 Amu bekrist be ne minsos a bekulu mejô be ne minsose ba ye yené, a bo mesimba a bitua bi mame na bôte be yale fé, to’o bôte Zambe a nga top, nge nalé a ne boban. 23 Nde, taba’ané ntyel, me maneya kate mia mame mese ôsusua na ma boban.

24 “Ve melu mete, mvus étibila’a éte, nlô jôbô a ye bo évindi a ngone ja ye ke beta faé, 25 a ateté da ye ko é so’o yôp été a mengule ya yôp été ma ye fô’ôsan. 26 A ba ye yene Mona môt a so’o minkut été a beta ngul a étôtok. 27 Nde fe a ye lôme beéngele a tôkane mintobane mié mi so’o bivuñulu binyin, ataté aku’u si, akekui aku’u yôp.

28 Yéke’ané jame di éve’ane ya élé figuier, nné ane mintyaé mia bo bisôsoñ a na, mekaé ma taté na ma kui été, mia yeme na ésep é ntoo bebé.* 29 Avale te fe, éyoñe mia ye yene mame ma me boba’an, yemané na a* ntoo bebé, a ntele mbé. 30 Ma kate fo’o mia na, a zen éziñ, miaé bôte wu wo ye ke mane wu ôsusua na mame ma mese ma boban. 31 Yôp a si bia ye lôt, ve mejô mame ma ye tabe nnôm éto a nnôm éto.

32 “Mfa’a ya môs ôte a awolo éte, môt éziñ a nji yem, to’o beéngele ya yôp, to’o Mon, fo’o ve Ésa. 33 Taba’ané ntyel, momba’ané, amu mi nji yem éyoñ awolo éte da ye kpwaan. 34 A ne ane môt a ke dulu si é ne ôyap a li’i bebo bisaé bé na, be ba’ale nye nda a ve môt ase ya be be ngule ya bo ésaé jé, a kate fe môt a ba’ale mbé na a tabe évevé. 35 Nde kelané ôsu a mombô, amu mi nji yem éyoñe mie ndaa a ye so, nge mame ngô’é, nge zañ alu, nge ôsusua melendé me tyé,* nge ndibe tyé, 36 na éyoñ a ye suan atemetem, a bo te koone mia mi kele’e ôyo. 37 Ve jame ma jô mia, ma jô de bôte bese: Momba’ané.”