Kalate Jacques a nga tili
4 Bita a mewosane bia so vé zañe jenan?* Ye bi nji so minkômbane mienane ya minsôn été, mmie mia juane nyule jenan été? 2 Mia kômbô, ve mi nji bi. Kom ése mia wôé a mia nyamete, ve mi nji kui na mi bi. Mia bo bita a juan. Mi nji bi amu mi nji ja’é. 3 Éyoñe mia ja’é, mia ye ke bi, amu mia ja’é a mbia nsôñan, ndembene mi ne jalé minkômbane ya minsône mienan.
4 A bôte ba lume Zambe mvus, ye mi nji yeme na amvôé a émo é ne ziñ a Zambe? Ajô te nde, nyu ase a kômbô bo amvôé a émo a bo émiene nsiñe Zambe. 5 Nge ke na, ye mia simesane na éfuse ji ja jô zezé na: “Nsisim ô nga zu kôm éto be mia wo ke ôsu a tabe été”? 6 Ve, beta mvam a ve a ne anen. Nde é ne ntilane na: “Zambe a wosane bôte ba bete bebiene yôp, ve a ve ba ba sili bebiene si beta mvame wé.”
7 Ajô te, sila’ané miabebiene si éjôé Zambe; ve tubané Diable, a a ye ke mia ôyap. 8 Suba’ané Zambe bebé, a a ye subu mia bebé. Sôba’ane mo menan, a mia bebo minsem, a tunané minleme mienan, mia mi be’e minleme mibaé. 9 Mia yiane bo nya nya éyôé a yôn. É nji yiane na mi woé, ve mia yiane yôn, é nji yiane na mi bo mevak été, ve mia yiane bo éyôé. 10 Sila’ané miabebiene si mise me Yéhôva,* a a ye bete mia yôp.
11 Te beta kobané môte mbok abé, a bobejañ. Nyu a kobô monyañ abé nge tyi’i monyañe wé ajô a kobô metiñ abé a tyi’i fe metiñ ajô. Éyoñe ji, nge wo tyi’i metiñ ajô, ô nji beta bo nyu a tôñe metiñ, ve ô ntoo ntyi’i mejô. 12 Môte wua nnye étam a ne Mvee metiñ a Ntyi’i mejô, nyu a ne ngule ya nyii a too fe ngule ya wôé. Ve wo, ô ne za na ô tyi’i môte mbo’o mejô?
13 Bôte béziñe ya be mia ba jô na: “Den, nge ki akiti bia ye ke tisone nyi, a bia ye tabe wôé ngumba mbu, bia ye bo makit, a bia ye bi abime nsenge éziñ,” 14 ve mi nji yem avale binyiñe bienane bia ye bo akiti. Amu mi ne ane ndutuu, nje éte ja yené ôyôme nté a mvuse ya valé ja jañ. 15 Ve mia yiane jô na: “Nge Yéhôva* a kañese, bia ye nyiñ a bo jame si nge jame ka.” 16 Ve éyoñe ji mia tametan a éngelezek ése mame mia ye bo. Aval éngelezek éte é ne abé. 17 Ajô te, nge môt a yem aval a ne bo jam é ne mvaé, ve a teke de bo, a ne nseme mfa’a wé.