Kalate baa Paul a nga tili Becorinthien

10 Ajô te, ma Paul, ma ye’elane mia a nje’ebane nlem a mbamba nleme Krist, me ne éjote nyul éyoñe me ne ézezañe jenan, ve ayok éyoñe me se ke a mia. 2 Ma ye’elane na éyoñe ma ye so, me bo te bo ayok a nyoñe ngule mintyi’ane ma simesane na ma ye nyoñ, be bôte ba yene bia ane nge bi nga bo mam ane bôte ba tôñe mame ya minsôn. 3 Amu, akusa bo bia nyiñ ane bôte bevo’o bese, bi nji bo bita ane bôte ba bo. 4 Nya ajôô, biôme mewosane biangane bi nji so be bôt, ve bi ne ngul a zene ya Zambe, mfa’a ya té mbia be asimesane si. 5 Amu bia té mbia be asimesane si, a jôm ése ja wosane ñyemane Zambe, a bia kee ôsimesan ôse minkôme na ô bo Krist mewôk; 6 a bi ne nkômesane ya foñesô avale melo ése, éyoñe mi litiya na mewô’ô menane me ntoo ngumba.

7 Mia yene mam avale me ne. Nge môt éziñ a too ndi nleme be émiene na a ne môte Krist, a beta’a ñhe fase jame di: Aval a ne môte Krist, nde bia fe bi ne bôte be Krist. 8 Amu to’o ma bo mon éngeleze’e mfa’a ya ngule Tate a nga ve bia, na bi ve mia ngule nyul, sa ke na bi te’elane mia, ma ye bo te bi ôsone nyul. 9 Me nji yi na mi yene ve ane ma si’ili mia a zene ya bekalate bam. 10 Amu ba jô na: “Bekalate bé be ne adit a ngul, ve éyoñ émien a ne valé a ne avale môte be ne biasé, a nkobô wé ô ne jôm é ne zezé.” 11 Môt ate a yeme’e ñhe na, jame bia jô* bekalate bangan été éyoñe bi ne momo, nde fe bia ye bo éyoñe bia ye so. 12 Bi nji kômbô telé biabebien été jia a bebo éngelezek, nge bo ane be. Ba tyi’i bebiene mejô avale bebiene ba yene na é ne mvo’é, a mboon ôte wo liti na be nji bi ñyeman.

13 Bia ye ke bo éngelezek ajô ya mame me nji fombô ésaé be nga ve bia na bi bo, ve bia ye bo éngelezek ajô ya ésaé Zambe a nga ve bia,* nje fe é ne ésaé ya kañete mia. 14 Bi nji bo jôm éziñe Zambe a nji jô bia na bi bo, éyoñe bi nga so be mia, ve bi mbe bôte be ôsu be nga kañete mia mbamba foé ajô Krist. 15 Teké’é, bi nji bo éngelezek a ésaé môte mfe, na bi ke tebe asu ésaé be nji ve bia, ve bi too ndi na mbunane wônane wo ye ke ôsu a nen. Ndemben ésaé bi nga bo be mia ja ye ke ôsu a nen, abôta nkañete denan été. Nde ñhe, bia ye bo ngule ya ke ôsu a bo nya abuii, 16 ndembene bi ne kañete mbamba foé minlame mife, na bi bo te bo éngelezek a ésaé é bobaneya abôta nkañete môte mfe. 17 “Ve nyu a bo éngelezek, a bo’o je be Yéhôva.”* 18 Amu sa ke nyu a sek émiene nnye a yené mvaé e mise me Zambe, ve nyu Yéhôva* a sek.