Kalate ôsu Paul a nga tili Timothée

6 Bôte be ne ébôñeté ya éto ôlo be kele’e ôsu a simesane na, bemasa bap ba yiane beta ésemé, ndembene bôte ba ye bo te kobô éyôlé Zambe a ñye’elan abé môs éziñ. 2 Nde fe, ba be bili bemasa be ne bekristene be nji yiane biasé be amu be ne bobenyañ. Ve ba yiane bo be ésaé a nlem ôse, amu ba ba yene mfi ya mbamba ésaé wop be ne bebuni a bôte ba nye’e.

Kele’e ôsu a ye’ele be mame mete a ve be melebe ma. 3 Nge môt éziñ a ye’ele ñye’elan ôfe, a na ô nji wô’an a ñye’elan ô ne mfi* wo so be Tate wongane Yésus Krist nge kañese ñye’elane wo wô’an a mboone Zambe ésaé a nlem ôse, 4 môt ate a ne mvusan a mebun a a nji ve’ele yeme jôm. A bili mbia fulu ya bo mintañete a bensañeta’ane ajô ya bifia. Mame mete mme ma soo éviele, môman, bibôta* a mbia befe’e, 5 ba wômane kom ése étome bone mejô ya bôte fek é maneya ndaman, bôte ba ndamane benya mejôô be simesa’ane na, mboone Zambe ésaé a nlem ôse ô ne zene ya bik. 6 E nya ajôô, mboone Zambe ésaé a nlem ôse ô ne zene ya bik, nge bia yeme vak a abime bi bili. 7 Amu bi nji soo jôme si nyu a bi se ngule ya kee jôm éziñ. 8 Nde, nge bi bili jôme ya di a jôme ya jaé,* bia ye vak a biôme bite.

9 Ve bôte ba kômbô bo minkukume ba ye ku meve’ele été a ôlam a abui mbia minkômbane ya bôte be ne te fek, mmie mia ndamane bôt a kee be njañan été. 10 Amu nye’ane moné ô ne ndi ya mbia be mame bese, a amu be nga ve ngule ya jalé ñyian ôte, bôte béziñe be nga yale fé mfa’a ya mbunan a telé bebien avale minjuk ése été.

11 Ve wo, môta Zambe, tube’e biôme bite. Ve tôñesa’ane zôsô, mboone Zambe ésaé nya mboone, mbunan, nye’an, mbane ya jibi a évôvoé nlem. 12 Wosa’ane benya mewosane ya mbunan, tuka’a bi ényiñe ya nnôm éto, nje éte be nga loone wo a nje éte ô nga meme bôt été ôsu abui bengaa.

13 Ôsu be Zambe, nnye a ba’ale biôme bise vevee a be Krist Yésus, nnye ate a ne ngaa a nga kobô mbamba mejô ôsu be Ponce Pilate, ma ve wo metiñe ma 14 na ô tôñ atiñ a nlem ô ne mfuban a te bijô, akekui éyoñe Tate wongane Yésus Krist a ye yené, 15 nnye a ne mevak, a susu’a Njôô a ye yené mbamba éyoñ. A ne Njôô ya ba ba jôô ane bejôô a Tate ya ba ba jôô ane betate, 16 nyu étam a bili ngule ya bo te wu, nyu a too vôm éfufube môt a vo’o ke subu bebé é ne, nyu môt a ngenane te tame yen a a vo’o ke yen. Duma a ngule ya nnôm éto bi bo’o be nye. Amen.

17 Va’a bôte be ne akum émo* ji atiñe* na be bo te bo mebun,* a na be futi ndi nleme jap, sa ke akum é ne mane tyi’ibi, ve be Zambe, nnye a ve bia akap biôme bise bia bu’ubane bie. 18 Jô’ô be na be bo mvaé, be bo abui mbamba be mam, be bo anyep,* nkômesane ya ve bôte bevok. 19 Nalé a ye bo na be tôkan asu dap bebiene mbamba mbôka’a asu melu ma zu, ndembene ba ye bi nya ényiñi a mo mebaé.

20 A Timothée, ba’ale’e jôme be nga ve wo, sa’ale’e minkañete mia ndamane jôm é ne étyi a miñye’elane mi nji wô’an a benya mejôô, mmie mite ba loon ékotekot été na, “ñyeman.” 21 Amu be nga tôñ avale miñye’elan éte, abui é nga yalé fé mfa’a ya mbunan.

Beta mvam a tabe’e be mia.