Kalate Paul a nga tili Tite

3 Kele’e ôsu a ba’alane be na, be sili bebiene si éjôé betebe ôsu ya ngovina, a éjôé bôte be tele be ôsu, be ke fe ôsu a bo be mewôk, be bo nkômesane ya bo avale mbamba jam ése, 2 be bo te kobô môt éziñ abé, te nye’e môman, be yeme kañese asimesane bôte bevok, be bo fe évôvoé a bôte bese. 3 Amu atata’a, bia fe bi mbe teke fek,* melo, njañan, bi mbe alo ya minkômban a mame ya meva’a mevale mese, bi mbe bi nyiñi’i mbia be mam été a minyamete été, bi siña’an, môt ase a siñe nyu mbok.

4 Ve éyoñe mbamba nleme Nyii wongan, Zambe, a nye’an a nga nye’e bone be bôte bi nga yené, 5 (a nji be amu bi nga bo mbamba jam éziñ, ve amu émien a nga mvamane bia), a nga nyii bia a zene ya mendim,* nalé a nga ve bia ényiñ, a bo na bi bo mimfefé mi bôt a zene ya mfufube nsisim. 6 A nga ve bia nsisime wé nya abuii* a zene ya be Yésus Krist Nyii wongan, 7 ndemben, a zene ya beta mvam, bi ne bi mekabe na bi ne zôsô a bo benyoñe ngabe ya ényiñe ya nnôm éto avale da wô’an a ndi nleme bi bili.

8 Mejô mete me ne été, a ma yi fe na ô ke ôsu a ba’alane bôte mame mete na, bôte ba buni Zambe be dañe fase ve avale be ne bo mbamba be mam. Mame mete me ne mvaé, a mfi asu bone be bôt.

9 Ve te futi anyu dôé éyoñe bôte ba sañetan e zezé, éyoñe ba lañe bindan, éyoñe bôte ba luman a juan amu Metiñe me Moïse,* amu mame mete me ne zezé a teke mfi. 10 Nge môt éziñ a kandé bôte mengam, te beta yeñ a nye nge ô tatéya lebe* nye éyoñe jia nge biyoñe bibaé, 11 mbôl avale môt éte é yaleya fé, nde fe da bo nsem, a é tyi’iya ébien ajô.

12 Éyoñe ma ye lôme wo Artémas, nge ke Tychique, jeñe’e a ngul ése na, ô ji’a zu koone ma Nicopolis, amu ma ye tabe tison éte éyoñ avep da ye bo nya ngulu.* 13 Va’a Zénas, nnye a tu’a yeme Metiñe me Moïse* ba Apollos mame ma yiane na dulu dap é wulu mvo’é. 14 Ve bobejañe ba yiane fe yé’é mfi ya bo mbamba be mame na, nge jam éziñe da kui atemetem, be bo ngule ya volô, be za bo teke wume bibuma.*

15 Bobejañe bese bia be be bi ne va ba batane wo. Ô bata’ane bia bôte bese ba nye’e bia be ne mbunan été.

Beta mvame Zambe a tabe’e be mia bese.