Mbamba foé Luc a nga tili

5 A nga bo na, môs éziñ, Yésus a tele fefele lac ya Génésareth,* nsamba bôt ô yemete’e nye mvus, ô vô’ôlô ane a ye’ele be mejô me Zambe. 2 A nga yene bifunga bibaé bi tele e fefele mañ, beyobe kose be nji be été wôé amu be mbe be sôbe’e mevot. 3 A nga bet éfunga jia ya été, e ji Simon, ane a nga jô Simon na a bo na éfunga éte é ke mañ été mone jôm, ane a nga tabe si éfunga été a taté na a ye’ele minsamba mi bôt. 4 Éyoñ a nga mane ye’ele be, a nga jô Simon na: “Kele’e éfunga, vôme mañe me ne édok, a wuané mevote menane valé na mi bi kos.” 5 Ve Simon a nga yalane na: “A Ñye’ele, bia te saé ngumba nté alu teke bi jôm, ve avale wo jô ma zu wua mevot.” 6 Nde éyoñe be nga bo nalé, be nga bi abui kos, a mevote map me nga taté na ma nyabé. 7 Nde be nga febe bôte be mbe éfunga évo’o na be zu volô be, ane be nga so, a bifunga biap bibaé bi nga jaé a kos aval é mbe na bi nga taté na bia nyoñe mendime si. 8 Éyoñe Simon Pierre a nga yene nalé, ane a nga ke kute Yésus meboñe si a jô nye na: “Kôlô’ô vôme me ne a Tate, amu me ne mbo minsem.” 9 Amu ba be bôte be mbe nsamba be nga dañe kam amu be nga bi abim abui kos éte, 10 to’o Jacques, a Jean bone be Zébédée fe be mbe be saé a Pierre be nga kam. Ve Yésus a nga jô Simon na: “Te ko woñ, ataté éyoñe ji, bôte mbe wo zu bi vevee.” 11 Nde be nga kee bifunga e kindik, a li’i biôme bise a tôñe nye.

12 Éyoñ évok, e zu koone na Yésus a ngenane tison, ane môt a too zame nyul ése a nga yene nye. Ane a nga kute meboñe si a buti asu si a ye’elane nye a jô’ô na: “A Tate, nge wo kañese ô ne saé ma.” 13 Ane a nga same wo a nambe nye a jô nye na: “Ma kañese! Bo’o mvo’é.” Été été zam é nga mane nye nyul. 14 Nde a nga ve nye abendé na a bo teke kate de môt éziñ, a nga jô nye na: “Ve kele’e liti womiene be prêtre a ve mveane Moïse a nga jô na môt a te bo mvo’é a yiane ve, na ô liti bôte bevo’o na ô ntoo mvo’é.” 15 Ve be mbe be dañe kobô ajô dé, a beta minsamba mi bôte mi nga tôkane na mi vô’ôlô nye a na a saé akone dap. 16 Ve a mbe a ju’u ke vôme bôte be nji be, na a ye’elan.

17 E melu mete, Yésus a mbe a ye’ele’e bepharisien, a beye’ele metiñe be mbe be so’o minlame ya Galilée a Judée a Jérusalem be mbe be too valé. A ngule Yéhôva é mbe é bo’o ésaé be Yésus na a saé bôt. 18 A tame yen! Bôte be nga so be be’e môt a too ñyemelan énoñ ôkon, be nga jeñe na be nyiin a ke bôé nye vôme Yésus a mbe. 19 Ve be nji kui na be nyiin amu nsamba bôt, nde be nga bet andil, éyoñe be maneya tube de, ane be nga suu nye a bô énoñe nkôkone jé, ézezañe bôte be mbe be tele Yésus ôsu. 20 Éyoñ a nga yene mbunane be mbe be bili, a nga jô na: “A môt, me maneya jamé wo minseme miôé.” 21 Nde bescribe a bepharisien be nga taté na ba jô minlem été na: “E nyina a ne za, a kobô Zambe ébiasé? Nge ô vaa Zambe, za mfe a ne jamé minsem?” 22 Ve éyoñe Yésus a nga yeme mame be mbe be fase’e minleme miap été, a nga sili be na: “Amu jé mia fase nalé minleme mienan été? 23 Jé é ne tyi’ibi ya jô, ye na, ‘Minseme miôé mi ntoo njaman,’ nge na, ‘Tebe’e tetele a wulu’? 24 Ve mfa’a ya na mi yeme na, Mona môt a bili ngule ya jamé minsem e si va...” A nga jô môt a mbe ñyemelane na: “Ma jô wo na, tebe’e tetele, ô to’é énoñe nkôkone jôé a ke nda jôé.” 25 Ane môt a nga tebe tetele ôsu wop, a to’é énoñe nkôkone jé a ke nda jé, a kele’e a ve Zambe duma. 26 Ane bese be nga tabe fe’e ne vema a ve Zambe duma, mbôle woñ ô nga bi be, be mbe be jô’ô na: “Dene bia te fo’o yene bitua bi mam!”

27 Mvuse mame mete Yésus a nga kui nseñ, ane a nga yene nyoñe toya a too jôé na Lévi a too si wofise ba nyoñe toya, ane a nga jô nye na: “Za’a bo ñyé’é wom.” 28 Ane a nga tebe tetele a li’i mame mese, a taté na a tôñe nye. 29 Nde Lévi a nga bo beta abô’ô bidi nda jé asu Yésus, abui benyoñe toya é mbe fe valé a bôte befe ba be be be mbe be ja’ak. 30 Ane bepharisien a bescribe bap be nga taté na ba kobô beyé’é bé menyiñe be jô’ô na: “Amu jé mia di a nyu fufulu a benyoñe toya, a bebo minsem?” 31 Ane Yésus a nga yalane be na: “Dokita a nji bo mfi asu bôte be ne mvo’é minsôn, ve asu minkôkon. 32 Me nga so na me zu loone bebo minseme na be kôñelane minlem, sa ke bôte be ne zôsô.”

33 Be nga jô nye na: “Beyé’é be Jean be ba tyi bidi amu Zambe, a bo meye’elane me nja’an, a beyé’é bepharisien fe ba bo nalé, ve émbôé ba di a nyu.” 34 Yésus a nga jô be na: “Mi vo’o ki yemete bemvôé be môt a zu lu’u na be tyi bidi nté a ngenan a be, sa nalé? 35 Ve môse wo zu, éyoñe môt a luk a ye ke beta bo a be, nde ba ye tyi bidi asu Zambe melu mete.”

36 A nga ve fe be éve’ane na: “Môt éziñ a vo’o nyoñ éfus éyé é ngenane mvo’é na a beté abaka éyé é ntoo ntuk, nge a bo nalé wôna éyé é ngenane mvo’é ja ye limiti ji é ntoo ntuk a bo na abé é dañe nen. 37 Nde fe, môt éziñ a vo’o futi mfefé woone mende’e me ékop me ntoo minnôm, nge a bo nalé, mende’e me ékôp me ne mane tui, mfefé woone wo ye mane tup mende’e me ékôp, a woon a ye kubu si, a mende’e me ékôp fe ma ye mane ndaman. 38 Ve ba yiane futi mfefé woone mimfefé mende’e me ékôp. 39 Éyoñ a maneya nyu nnôma woon, môt éziñ a vo’o kômbô nyu nyi a ne mfefé, amu a jô na, ‘Nnôma woon a ne mvaé.’”